Read njo OBENDANGERTEM 14 Bible Online

OBENDANGERTEM 14 - njo bible

OBENDANGERTEM 14

¹Samson Timnai alu, aser Timna nung pai Filistia nunger jala rongnung tetsür ka angu.

²Idangji pa atu, aser tebu o tetsü na dang ashi, “Ni Timna nung Filistia nunger jala rongnung tetsür ka nguogo; anungji tang kü kibutsü asütsü la anir arujang.”

³Saka tebu o tetsü nati pa dang ashi, “Memejeptokba Filistia nunger nungiang na kibutsü agitsüba, ner sosem jala rongnung mesüra asen nübur rongnung tetsür ka danga mali no?” Saka Samsoni tebu dang ashi, “La kü nem anir arujang; kechiaser ni la dak saklok.”

⁴Saka tebu aser tetsü nati aji KIBUBA nungia ta memetet; kechiyong Filistia nunger anema pai mapang ka ajia liasü. Iba mapang nung Israel nunger Filistia bangdak kübok liasü.

⁵Idangji Samson, tebu aser tetsü den, Timnai alu, aser pa Timna tsükmenatzü lui aru; aser ajiang, molusongzü pungtu kati pa dak arüloktsü;

⁶aser KIBUBA tanela tashi tulu pa madak aru; aser pai nabong chanu ka shisaba amai, molusongzüji shidang; aser pa ket nung kecha mali asü, saka pai kechi inyak aji tebu o tetsü na dang mashi.

⁷Pa alu aser tetsür denji jembi; aser Samsoni la dak saklok.

⁸Aser kenpiga lir, pai la agitsü meyip; aser pai molusongzü tasü mangji reprangtsü ai, aser ajiang, molusongzü temang nungji ninang metema, aser mojitzü liasü.

⁹Pai aji teka nung am, aser pai chiyunga ao; aser pa tebu aser tetsü dangi aru, aser parnok nem agütsü, aser parnoki achi. Saka pai molusongzü tasü mang nungi agizük ta parnok dang mashi.

¹⁰Samson tebu tetsürla dangi alu, aser Samsoni yangji benjong ka yanglu; kechiyong yamaji asangurtemi inyaka liasü.

¹¹Aser kodang nisungtemi pa angu, parnoki pa den alitsü medemer semer anir aru.

¹²Samsoni parnok dang ashi, “Tang ni nenok dang teratatsü ka asüngdangdi: benjong tenetnü tsüngda nungji nenoki kü dang aji kechiar shitetra, aser bushitetra, idangji ni nenok nem kümpa semoksü semer aser benjong semoksü semer agütsüdi.

¹³Saka nenoki aji kü dang meratetra, idangji nenoki kümpa semoksü semer aser benjong semoksü semer kü nem agütsütsü.” Aser parnoki pa dang ashi, “Onoki angadi, ne teratatsüji shiangjong,”

¹⁴aser pai parnok dang ashi: “Tachisang nungi langka tachitsü adok, Tashi tait nungi langka tanang adok.” Aser asemnü nunga parnoki teratatsüji kechiar meshitet.

¹⁵Pezünübuba nung parnoki Samson tebutsü dang ashi, “Teratatsüji kechiar nebuba mesüzükang, aji mesüra na aser nebuer ki onoki mi agi rongtoktsütsü. Onok sensak tendaktsütsü nai onok jatep asü?”

¹⁶Aser pa madang Samson kibutsüi ajeb, aser ashi, “Nai ni tesempa ang sempar, nai nibo memeimer; ozü yimer madang nai teratatsü ka agütsü, aser aji kechiar nai kü dang mashi.” Aser pai la dang ashi, “Ajiang, ni kübu o kütsü na danga mashi, aser ne dangbo shidi ma?”

¹⁷Aser parnok benjong matem tashi lai tenetnü ajeb; aser tenetnübuba pai la dang ashi, kechiaser lai pa kanga anung. Idangji lai pei yimer dang teratatsüji ashi.

¹⁸Tenetnüba nung ano anü maidangsa yimti nisungtemi pa dang ashi, ‘Ninang mojitzü dang kechi tanangba? Molusongzü dang nungi kechi tashi taitba?’ Samsoni parnok dang ashi, “Nenoki kü nashi lamen den aliji mangensa asübo, nenoki kü teratettsüji mebushitetla.”

¹⁹Idangji KIBUBA tanela tashi agi pa dangi aru, aser pai Ashkeloni lua par semer tepseta parnok süoshi rakzük aser aji teratettsü shiteter nemji agütsü. Aser pa mit kanga adoka tebuer kidangi shilang.

²⁰Aser Samsoni tebutsüji pa medemer shibai pa mein, pa nem agütsü.