Read njo OBENDANGERTEM 15 Bible Online

OBENDANGERTEM 15 - njo bible

OBENDANGERTEM 15

¹Kenpiga lir Wheat aluruwa mapang Samson nabong chanu ka bener tebutsü semdangi alu. Pai ashi, “Ni kübutsü taktangi aitsü.” Saka la tebui pa aitsü memela.

²Pai ashi, “Atangji nai la kanga sempar ta ni bilemer, anungji ni la ne medemer nem agütsüogo. Tenu la dang nungi tobur tajungba masü no? Anungji la ang agiang.”

³Samsoni parnok dang ashi, “Tanbo ni Filistia nunger dang inyakba atema kü dak atongtsü mali.”

⁴Anungji Samsoni oa shirong noklang asem apu, aser milenpung bena aru; aser pai teben o teben na alentep aser teben anana tsüngda nung milenpung kaka alenloktsü.

⁵Kodang pai milenpung nungji mi tsüklok, pai shirongtemji Filistia nunger lu tsük adoka alidak jagi odaktsü; aser tsükpong aser tsük adoka aliba aser oliv tsüki rongtoktsü.

⁶Idangji Filistia nungeri ashi, “Ya shibai inyak?” Aser parnoki ashi, “Timna nungba tanük Samson; kechiaser pai pa kibutsü agi aser la par medemer nem agüjadok.” Aser Filistia nungeri atu, aser la aser la tebu mi agi rongset.

⁷Samsoni parnok dang ashi, “Nenoki kü dang yamai inyaker süra, nia nenok dak mang mayang tashi manentsü.”

⁸Aser pai parnok telongpu aser tepi yiruja aika tepset. Idangji pai Etam lung jakmai lua idakji ali.

⁹Idangji Filistia nunger Yihuda nung tua anen aser tanendak yanglur Lehi amak.

¹⁰Anungji Yihuda nisungtemi asüngdang, “Kechiba onok anema nenok aru?” Parnoki langzü, “Onok Samson pua alentsü asoshi oda pai onok dang inyakba ama pa danga inyaktsü atu.”

¹¹Idangji Yihuda nisung meyi asem Etam lung jakma jagi alu, aser Samson dang ashi, “Filistia nunger asenok madak yimsüsürtem ta nai memetet no? Ajangla ya nai onok dang kechi inyak? Pai parnok dang ashi, kü dang parnoki inyakba ama nia parnok dang inyak.”

¹²Parnoki pa dang ashi, “Filistia nunger ket nung onoki na agütsütsü asoshi na alentsü onok alu. Samsoni parnok dang ashi, nenok sasa ni metepsettsü ta azüngashiangma.”

¹³Parnoki pa dang ashi, “Masü, onoki na odang alentsü aser parnok ket nung agütsütsü; onoki na metepsettsü.” Anungji parnoki pa lisü tasen ana agi alen aser pa lung nungjagi bener atu.

¹⁴Kodang pa Lehi-i aru, Filistia nungeri pa den ajuruteptsü washia atu; aser KIBUBA tanela tashi agi pa madaki aru, aser pa tepen nung aliba lisüji kümpok nung mi kaoba mesüka liasü, aser pa teben alenbaji yimsa-a oadok.

¹⁵Pai gado tekümret tajem ka angu, aser pa teka adoka aji ajepa aru, iba jagi pai nisung meyi ka tepset.

¹⁶Aser Samsoni ashi, Gado ka tekümret agi, nangtep nangtepa; Gado tekümret ka agi, nisung meyi ka ni tepset.

¹⁷Kodang pa jembiba anen, pai tekümretji pa ket nungi mereptokadok; aser iba li dangji Ramath-lehi[4] aja.

¹⁸Aser pa kanga tzüra-a liasü, aser pai KIBUBA dang aja aser ashi, “Ne tenzüker ket agi iba tekümzük tulu nai melaogo; aser ni tang tzüra agi asütsü no, aser memejeptoker ket nung tsüktsü no?”

¹⁹Aser Lehi nung aliba ali tarokdak Tsüngremi lapoka sangdang, aser iba nungi tzü apok; aser kodang ajem, pa tanela tanaben aru, aser pa asentenshi. Anungji iba tenüngji En-Hakor[5] ta aja, tanü tashi Lehi nung lir.

²⁰Aser Filistia nunger tendak pai küm metsü Israel o bendang.