Read njo OBENDANGERTEM 16 Bible Online

OBENDANGERTEM 16 - njo bible

OBENDANGERTEM 16

¹Aser Samson Gazai ao, aser angji pai nüktapangtatsür ka angu, aser pa la dangi ai.

²Aser Gaza nunger dang Samson aruogo, ta metetdaktsü; aser parnoki pa meketbang, aser aonung tepiyong süngkhüm nung mita ali, aser aonung tepiyong ajemajema ashi, “Anepdang mesangwa tashi asenoki ata-a lidi, ajiser asenoki pa tepsetdi.”

³Aser ayatrem tashi Samson mejanga ali, aser ayatrem nung pa arameso aser yimti süngkhüm kishi dak aser tongshi ana dak amet, aser itemji atsütet, tarütangtsü ajak, aser pa tapubang nung itemji apur Hebron jakdang aliba tenem kolaki bener atu.

⁴Iba sülen Sorek lenten nung tetsür ka tenüng agi Delila pai meim.

⁵Aser Filistia nunger kiburtem la dangi aru aser la dang ashi, “Pa mesüzükang, aser pa tashi tulu kong lir, aser asenoki pa alentsü aser pa madak kibur asütsüsa, kechi tasa agi asenoki pa aputsü, aji reprangang; aser onok shiai ne nem taribi noklang terka ka agütsütsü.”

⁶Delilai Samson dang ashi, “Na tashi tulu kong ali, aser na koda alentettsü aser azükoka yutettsü, aji yimlibilema kü dang shiangma.”

⁷Samsoni la dang ashi, “Mekongi aliba lijak anem tenet agi parnoki ni alenra, idangjibo ni tashi meiti akümtsü, aser tangar nisung ama dang alitsü.”

⁸Idangji Filistia nunger kiburtemi la nem mekongi aliba lijak anem tenet bener arutsü, aser item jagi lai pa alen.

⁹Tang taktang telungba nung lai nisung mita atadaktsü. Aser lai pa dang ashi, “Samson, Filistia nunger na aputsü arur!” Saka milak nung angjang ka arongba mesüka lijak anemji pai tokdangadok. Anungji pa miim tashiji kong nungiar aji mungutet.

¹⁰Aser Delilai Samson dang ashi. “Ajiang, nai ni mezüngmeshiogo, aser kü dang yazüogo: yimlibilema na koda alentsüar, tang kü dang shiangma.”

¹¹Aser pai la dang ashi, “Parnoki mamshidangba lisü taseni ni alenra, idangji ni tashi mait akümtsü aser tangar nisung ama dang alitsü.”

¹²Anungji Delilai lisü tasen bena arua item jagi pa alen. Aser taktang telung nung lai nisungtem miima yur, pa dang ashi, “Samson, Filistia nunger na aputsü arur!” Saka pai pa tepen nungi lisüji angsü angjang ka ama dang toktang.

¹³Aser Delilai Samson dang ashi, “Tang tashi nai ni mezüngmeshiogo, aser yazüogo. Na koda alentsüar kü dang shiangma.” Aser pai la dang ashi, “Kü kolak nung ku tejong tenet sü nung taksemra aser aji akanga sentaktepra, idangji ni tashi mait aser tangar nisung ama akümtsü.”

¹⁴Anungji pa mejanga alidang Delilai ku tejong tenetji sü nung taksem; aser itemji lai akanga sentaktep, aser pa dang ashi, “Samson, Filistia nunger na aputsü arur!” Saka mejangba nungi pa sak, saka takradong, sütakba aser alem atsür oadok.

¹⁵Aser lai pa dang ashi, “Ne mulungjang kü den mali nung nai koda, Ni na meimer ta shitet? Nai ni asemben mezüngmeshiogo, aser nai ne tashi tulu kong ali aji kü dang mashir.”

¹⁶Aser kodang lai pa anogo shia kanga anung, aser pa ajongshi, pa nela laksetadok.

¹⁷Aser pai la dang pa mulung ajak metetdaktsü, aser la dang ashi, “Kusünok kodanga kü kolak nung matalokdang; kechiyong kütsü nu menden nungi ni Tsüngrem asoshi Nazarit lir. Kü ku südokra, idangjibo, kü tashi-i ni toktsütsü, aser ni tashi meiti akümtsü, aser tangar nisung ama tashi meiti akümtsü.”

¹⁸Kodang Delilai la dang pa mulung ajak pai shiogo ta ajitet, lai Filistia nunger kiburtem tajai yoka ashi, “Tanbo atung, kechiyong pai kü dang pa mulung ajak shiogo.” Idangji Filistia nunger kiburtem la dangi atu, aser parnok ket nung senji bener la dangi atu.

¹⁹Aser lai pa la tepi manung mejangdaktsü, aser lai nisung ka aja, aser pa nem pa tekolak nung ku tejong tenetji südokdaktsü. Idangji lai pa kangshitsü tenzük, aser pa tashi oadok.

²⁰Aser lai ashi, “Samson, Filistia nunger na aputsü arur!” Aser amua aoba nungi pa sak, aser ashi, “Ni akhi amato oadoktsü aser kü sasa sadema alitsü.” Saka KIBUBAi pa toktsüogo ta pai memetet.

²¹Aser Filistia nungeri pa pua arua, pa tenük aroktoktsü; aser Gazai pa anir alu, aser yongmen yinzü agi pa alen, aser tepuokdak pai tsük menüng.

²²Saka ku südoker külen pa tekolak nung tanaben ku meyitsü tenzük.

²³Tang Filistia nunger kiburtemi parnok tsüngrem Dagon nem tenla tulu agütsütsü aser pelateptsü tenzük, kechiaser parnoki ashi, “Asen tsüngremi asen tsükchir Samson asen ket nung agütsüogo.”

²⁴Kodang nisungtemi pa angu, parnoki pei tsüngrem tenüng sanga ashi, “Asen tsüngremi asen tsükchir asenok ket nung agütsüogo, shibai asen lima raksatsü aser asenoka aika tepset.”

²⁵Kodang parnok mulungjang aka-asoa aküm, parnoki ashi, “Asenok pelateptsü asoshi Samson jaang”. Anungji parnoki tepuokdak nungi Samson aja, aser pai parnok asoshi asayadaktsü. Aser parnoki pa tongshi tsüngda nung noktakdaktsü,

²⁶aser Samson pa teka nung amba tanur dangji ashi, “Ni metaloktsü asoshi ki tangeta aliba tongshiji kü nem mimdangdakjang.”

²⁷Tang kiji tebur aser tetsür agi sünga liasü, aser Filistia nunger kibur ajak yangji liasü, aser kilem manung tebur aser tetsür meyirijang asem shi Samson asayaba repranga liasü.

²⁸Idangji Samsoni KIBUBA dang aja, aser ashi, “Oh KIBUBA Tsüngrem ni ne dang mepishir, ni bilemtetangma aser tashi itdakjangma, ni ne dang mepishir, tanbai dang, Oh Tsüngrem, oda kü tenük ana asoshi ni Filistia nunger dak mang ayangtsüsa.”

²⁹Aser Samsoni ki tangeta aliba tiyong tongshi ana dak amet, aser pai item dak metalok, ka pa tajichi agi, aser kaji tabelen agi sot.

³⁰Aser Samsoni ashi, “Filistia nunger den ni südakjang.” Aser pa tashi ajak agi pai angema alu; aser kiji kiburtem madak aser yangji ia alir ajak madak lao. Anungji taküm alidang pai kwi tepset, iba dang nungi pa asüdang tepsetba timba liasü.

³¹Idangji pa adianu aser par kinunger ajak alu aser pa bener tua Zora aser Eshtaol tsüngda pa tebu Manoa leper nung arem. Pai küm metsü Israel o bendang.