Read njo OBENDANGERTEM 17 Bible Online

OBENDANGERTEM 17 - njo bible

OBENDANGERTEM 17

¹Efraim tenem lima nung nisung ka tenüng agi Mika liasü.

²Pai tetsü dang ashi, “Ne sen taribi noklang terka samaba atema nai atakatema jembiba kü narongi angashiogo. Ajiang iba senji kü den lir, kechiaser ni ibaji agi.” Idangji tetsüi ashi, “Kü chir, KIBUBAi na moajangma.”

³Kodang pai sen noklang terkaji pa tetsü nem meyipa agütsü, lai ashi, “Ni iba sen jagi kü chir nem süngyanglu ka melutettsü asoshi KIBUBA nem bendanga agütsür. Anungji ni aji ne nem meyipa agütsütsü.”

⁴Kodang pai senji tetsü nem meyipa agütsü, lai taribi sen noklang ana agiteta aji taribi atsünger nem agütsü, shibai temulutetba süngyanglu noksa ka yanglu. Aser itemji Mika kidang yutsü.

⁵Aser iba nisung Mika, tsüngrem ki ka liasü, pai putir temeshi sobutsü aser terafim yanglu, aser par chir ka bendanga agütsü, shiba pa putir aküm.

⁶ Item anogo nung Israel nung chuba mali asü; nisung shiai pei sünütsü dang asü.

⁷Iba mapang nungji Yihuda lima Bethlehem nung Levi nunger asangur ka liasü.

⁸Pai Yihuda lima Bethlehem yimtiji toktsür talidak ka bushia ao. Pa aodang Efraim tenem lima nung Mika kidangi aru.

⁹Mikai pa dang asüngdang, “Na kong nungi arur?” Pai langzü, “Ni Yihuda lima Bethlehem nung Levi nunger ka lir, aser ni talidak ka bushia senzür.”

¹⁰Mikai pa dang ashi, “Kü den liang, aser kübu ka amai aser kü putir ka amai kümang, aser ni ne nem küm ka nung taribi sen ter agütsütsü, aser sobutsü tabensa ka aser ne chiyungtsü agütsütsü.” Aser Levi nungbaji ai.

¹¹Anungji Levi nungbaji nisungba denji alitsü mulungtet aser asangubaji par jabaso rongnung ka ama pa madang liasü.

¹²Aser Mikai Levi nungbaji meshiteta bendanga agütsü, aser asangur nisungji pa putir aküm, aser pa Mika kidang liasü.

¹³Idangji Mikai ashi, “Tangbo KIBUBAi ni azükarutsütsü ta ni metet, kechiaser kü putir asütsü Levi nunger ka lir.”