Read njo OBENDANGERTEM 18 Bible Online

OBENDANGERTEM 18 - njo bible

OBENDANGERTEM 18

¹Item anogo nung Israel nung chuba maliasü; aser item anogo nung Dan kini pa pei alitsü asoshi senmang ka bushia liasü; kechiyong iba anogo tashi Israel kin rongnung parnok senmang kecha parnok dangi marui liasü.

²Anungji Dan nungeri parnok kin yongsük ajonga nungi tasü tait nisung pungu, Zora nungi aser Eshtaol nungi, linük ladangtsü aser süjema senzütsü yok; aser parnoki parnok dang ashi, “Oang aser alimaji süjema senzüang.” Aser parnoki Efraim tenem lima, Mika kidangi aru, aser yangji anen.

³Parnok Mika kidang alidang, parnoki Levi nungba asangur olaji shitet; aser parnoki meyip aser pa dang ashi, “Shibai na yagi anir aru? Idaki na kechi inyaker Yangi ne mapa kechi?”

⁴Mikai pa dang kechi inyak, item ajak pai parnok dang shia liasü, aser pai ashi, “Pai ni aar ayu, aser ni pa putir lir.”

⁵Parnoki pa dang ashi, “Onoki ne dang mepishir, onok aoba ya takok angutsü mangutsü Tsüngrem nungi metetdakjangma.”

⁶Putir jagi parnok dang langzü, “Yimjung nung oang. Nenok aotsüba lenmangji KIBUBAi mulungba lir.”

⁷Idangji nisung punguji pila aser Laishi aru, aser yangji aliba nisungtem angu, koda parnok Sidon nunger mesüka ajem ajema aser kümzüka aliba angu; kechiyong yangji parnok dang tamajung inyaktsüsa tashi aliba shinga mali, aser parnok Sidon nunger nungi talang nung liasü, aser nisung shinga den kecha sentaktepa mali.

⁸Kodang parnok Zora aser Eshtaoli aru, parnok adianutemi parnok dang asüngdang, “Nenok osang kechi?”

⁹Parnoki ashi, “Aramesoang, parnok anema asenoki tudi: kechiyong onoki alimaji nguogo; aser ajiang, aji kanga junger: aser nenok ajem ajema alitsü no? Aotsü aser alimaji agitsü asoshi anüalema teli.

¹⁰Kodang nenok odir, tesüngjem nung aliba nübur alima kati arutsü, aser alimaji tulu; kechiaser Tsüngremi aji nenok nem agütsüogo; alima nung aliba kecha agi manüngtsüba alinük ka lir.”

¹¹Zora aser Eshtaol nungi Dan nunger kinunger, nisung noklang trok rara sobutsü sobur ao.

¹²Parnok atu, aser Yihuda nung Kiriath-jearim nung anen, anungji tanü tashi iba dangji parnoki Mahaneh-dan[6] ta ajar; ibai Kiriath-jearim sülen lir.

¹³Aser idak nungjagi, parnoki Efraim tenem lima ajanga ao, aser Mika kidangi aru.

¹⁴Idangji Laish lima ladangi aor nisung pungu jagi parnok adianutem dang ashi, “Item kidang putir temeshi sobutsü ka aser terafim,[7] aser süngyanglu ka aser temulutetba noksa ka lir ta nenoki meteter ma? Anungji tang nenoki kechi inyaktsü bilemdangang.”

¹⁵Aser parnoki ilen nung jagi meyip, aser Levi nunger asangubar kidangi Mika alidaki aru, aser pa koma ali asüngdang.

¹⁶Aser nisung noklang trok shirnok Dan chirtem liasü; rara sobutsü sobur süngkhümi ailen noktak.

¹⁷Aser alima ladangi aoba nisung punguji atu, aser ilen jagi ait, aser süngyanglu, putir temeshi sobutsü, terafimji aser temulutetba noksa bena aru; putirji süngkhümi aiba lenmang nung rara sobutsü sobuba nisung noklang trok denji noktak.

¹⁸Kodang itemi Mika kidangi ai, aser süngyanglu, putir temeshi sobutsü, terafim aser temuluba noksa bena aru, putir jagi parnok dang ashi, “Nenok kechi inyaker?”

¹⁹Parnoki pa dang ashi, “Na ajem ajema liang, ne ket agi ne bang nembangang, aser onok den arung, aser na onok tebu ka aser putir ka sang. Na asoshi nisung ka kidang putir asütsü tajungba asü, mesüra Israel nung kin ka aser kibong madak putir asü tajungba masü no?”

²⁰Aser putirji temulung pela-a liasü, aser putir temeshi sobutsü, terafim, aser süngyanglu aben aser nüburtem den ao.

²¹Anungji parnok meyip aser pila-a ao, aser tila tanur o kiset shiruru aser osettem parnok jakdang ayu.

²²Kodang Mikar kidang nungi parnok apiga ao, Mikar ki anasa aliba nisungtem külemi sentep, aser Dan chirtemji menep.

²³Aser parnoki Dan chirtem dang ayimten, aser parnoki pei tejak meyip, aser Mika dang ashi, “Telok yamai arutsüsa na kechi agi timatemer?”

²⁴Pai ashi, “Nenoki ni yangluba tsüngremtem bener aor aser putir anir aor, aser nibo kechi anünga ali? Ajangla, kechiba nenoki kü dang, kechi agi na timatemer ta asüngdanger?”

²⁵Dan nungeri pa dang ashi, “Mit aketer kari ne dak sotakra, na aser ne kibong taküm sama-a lir onok rongnung ne ola tadok.

²⁶Idangji Dan nungeri parnok lenmangi ao; aser Mikai parnokji onsara tashi tait ta ajitet nung pai meyipa kidangi ao.”

²⁷Idangji Mikai yanglua aliba aser pa putir anir Dan nungerji Laish nung süngjem süngjema aliba nisungtem dangi arua, parnok nok agi samatsü aser parnok yimti rongtoktsü.

²⁸Iba yimti tekümzüker shinga mali asü, kechiaser aji Sidon nungi talangka pilar, aser parnokji shinga dena tesendaktep mali asü. Yimtiji Bethrehob anasa lenten ka nung liasü. Dan nungeri idakji yimti yanglur ali.

²⁹Parnoki yimti tenüngji parnok tebu Dan shiba Israel nung aso, pa nüngten Dan ta aja, saka tamasabo yimti tenüngji Laish liasü.

³⁰Yangji Dan nungeri parnok asoshi süngyangluji ayu, aser Israel tepuokdaki mai tashi, parnoki Gershom chir Yonathan, Mosa semchir pa aser par chirtem putir liasü.

³¹Anungji Shilo nung Tsüngrem ki kopiga liasü, papigaji Mikar süngyangluji parnoki ayu.