Read njo OBENDANGERTEM 19 Bible Online

OBENDANGERTEM 19 - njo bible

OBENDANGERTEM 19

¹Item anogotem nung kodang Israel nung chuba maliasü, Efraim tenem linük tatemlen oagi Levi nunger ka liasü. Pai Yihuda lima Bethlehem nungi tezüngatsü agi.

²Saka lai pa anema nüktapangta mapa inyak, aser Yihuda lima Bethlehem nung tebuer kidangi la oadok, aser lai idakji ita pezü liasü.

³Idangji la kinungpui la mesüzüka anir arutsü asoshi ao. Pa den pa kilir aser gado ana anir ao. Kodang pa tetsürla tebu kidangi aru, pai pa pelashishia agizük.

⁴Aser tetsürla tebui pa anendakja, pa den asemnü munga parnoki chia jema yangji ali.

⁵Pezünübuba anepdang yakta shishir aotsü renem, saka tetsürla tebui tanük dang ashi, “Amtsük teraka agi ne mulung tashi itdakjang ajiser ang nenok yoktsü.”

⁶Anungji parnok amen, aser tenaprong külemi chia ajem; aser tetsürla tebui nisungba dangji ashi, “Ni mepishir, hai-haura ka-a taonungbo odang liang, aser ne mulung pela-a liang.”

⁷Aser nisungbaji aotsü arameso; saka tokoi pa dang mepishi, aser yangji pa ano amung.

⁸Aser pungunübuba nung aotsü pa anepdang yakta arameso; aser tetsürla tebui ashi, “Ni ne dang mepishir, ne mulung tashi itdakjang, aser anü manga-a malu tashi ata-a liang.” Anungji parnoki külemi chia ajem.

⁹Saka kodang nisungba pa tezüngatsü aser kilirji aotsü apuso, pa toko, tetsürla tebui ashi, “Tang joko nikongdang atonger. Joko anü taor anungji taonungbo idaki dang anenang, aser ne mulung tiptema jangratemdakjang. Asüngnep yakta saker nenok pei kidangi oang.”

¹⁰Saka aonung ka ayiptsübaji memulungi nisungba jagi aramesoa Yebus, aji Yirusalem leni aru. Pa den pa tezüngatsü, kilir aser gado ana dena aru.

¹¹Parnok Yebus anasa alidang anü talur liasü, anungji kilir jagi pei kibur dang ashi, “Arung asenoki Yebus nunger yimti nungji anendi aser taonung idakji yipdi.”

¹²Pa kiburi langzü, “Masü shirnok Israel nunger masü, parnok aener yimti leni asenoki maotsü. Asenoki Gibea leni odi.”

¹³Ano pai pei kilir dang ashi, “Arung asenoki Gibea mesüra Rama atongtsü merangdi aser tenaji ka mesüra ka nung taonung anendi.”

¹⁴Anungji parnok pei lenmangi ao, aser parnok Benjamin linük Gibea anasa alidang anü alu.

¹⁵Aser parnoki Gibea nungji anentsü ai, aser yimti lenjem nung amen; saka shingaia parnok pei kidangi anendaktsütsü maniok.

¹⁶Aser ajiang, nikongtsütsü Efraim nunger tambur ka, shiba Gibea nung semloka alir tambur ka alu mapa nungi adokya liasü, (aser yangji alirtemji Benjamin nunger liasü).

¹⁷Pai pa tenük rangketa yok, aser yimti yimtong nung aen jajar nisungji angu; aser tambur jagi ashi, “Na koleni aor? aser na kolen nungi arur?”

¹⁸Pai pa dang ashi, “Onok Bethlehem Yihuda nungi Efraim tenem linük külen tsütsü ao ni ilen nung jagi lir, aser ni Bethlehem Yihudai ao aser tang ni kü kidangi aor; aser ni anioktsü nisung shinga mali.”

¹⁹Ozü gado asoshi monü aser chiyungtsü lir; aser ni asoshi, ne kilitsür aser ne tenzükertem den aliba asangur asoshia amtsük aser yi lir; kecha agia anünga mali.

²⁰Tambur jagi ashi, “Ne den yimjung liang; na tenüngdaktsü ajak ni anebalutsü, yimtong nung dang tanen.”

²¹Anungji pai pa pei kidangi anir aru aser gado nem chiyungtsü agütsü; aser parnoki pei tetsüng shidok aser chia ajem.

²² Parnok mulung pelashishia alidang, ajiang, yimti sanger, samesa nisungtemi, kiji meketa lungbang, aser kishi nung akoshi; aser parnoki ki kibur tambusang dangji ashi, “Ner kidangi aitba nisungji shir-ar anir adokang; onoki parnok dak maksüa benshitsü.”

²³Idangji ki kiburji parnok dangi tugua ashi, “Kü adianutem nenoki yamai mejungi tebenshima, kechiaser iba nisung ya kü aener lir; yamala maksütsüji pa dak teinyakma.

²⁴Ajiang, yangi kü tasüngtet jala, aser pa tezüngatsü lir. Ni parnok tang nenok dangi anir adoktsüdi, aser nenoki parnok nenok sünütsü sang, saka iba nisung dakbo nenoki tamajung kecha teinyakma.”

²⁵Saka nisungtemi pa dang manga; anungji nisungbajagi pa tezüngatsü atsüa aru, aser parnok dangi anir adok; aser parnoki anepdang tashi la dang mashi-i benshi: aser kodang sangwa mapang atong, parnoki la odaktsü.

²⁶Idangji tetsürlai anepungi aru, aser la kibur alidak nisungbar kishizüngdang mesangwa tashi ontaka ali.

²⁷Aser la kiburji anepdang arameso, aser kishiji lapok, aser pa lenmangi aotsü adok: aser ajiang, tetsür pa tezüngatsüji la teka tzüen nung yur kishi züngdang ontaka liasü.

²⁸Aser pai la dang ashi, sakang, odi; saka ola maliasü, idangji pai la gado rongdong nung aben, aser nisungbaji arameso aser par kidangi ao.

²⁹ Aser kodang pa par kidangi aru, pai nok ka bena aru, aser pa tezüngatsü dak ameta yadoker pai shipu abensa-a ter-anasü küma alangsa, aser Israel litsü ajakleni yok.

³⁰Aji angur ajaki ashi, “Ijip lima nungi Israel adokba anogo nungi tanü tashi iba amai kodanga matalok aser ataloka maru; ya indang bilemdangang, lemtepang, aser jembiang.”