Read njo OBENDANGERTEM 2 Bible Online

OBENDANGERTEM 2 - njo bible

OBENDANGERTEM 2

¹KIBUBA tenyar ka Gilgal nungi Bokimi atu aser ashi, “Ni nenok Ijip nungi anitet aser nenok tsüraburtem dang nangzükba limai nenok anir aru.” Aser ni ashi, “Ni nenok den tezüngzüktepba kodanga meraksatsü,

²aser nenoki iba lima aliba nisungtem den tezüngzüktepba kecha meyanglutsüla, saka nenoki parnok tenladak raksatsütsüla. Aji saka nenoki kü ola manga. Kechiba nenoki ya inyak?

³Anungji tang ni nenok dang ya ashir, ni nenok tsüngdang nungi parnok maridoktsü; parnokji nenok asoshi ayi ka alitsü, aser parnok tsüngremtemji nenok asoshi sang ka alitsü.”

⁴Kodang KIBUBA tenyari Israel nübur ajak dang yamaji jembi, nüburtemi tashi agi ajeb.

⁵Anungji parnoki iba linük dang Bokim ta aja, aser idakji parnoki KIBUBA dang tetepsetba tenla agütsü.

⁶Kodang Yihusuai nüburtem senshidaktsü, Israel nunger shiai pei senmang aliba linükji agitsü ao.

⁷Yihusua arishi tepiyong, aser tamburtem shirnok Yihusua sülen taküm liasü, aser shirnoki KIBUBAi Israel asoshi mapa tulu inyakba angu, parnok arishi tepiyong Israeli KIBUBA tenzük,

⁸Nun jabaso KIBUBA tenzüker Yihusua arishi küm noklang ka ser ter nung asü.

⁹Aser Gaash tenem anüdoklentip, Efraim tenem lima nung, pa senmang Timnath-heres arrtsü kübok parnoki pa arem.

¹⁰Aser iba putu ajak pei tsürabur dangi ao, aser parnok sülen KIBUBA memetetba mesüra pai Israel asoshi inyakba memetetba putu ka adok.

¹¹Israel chirtemi KIBUBA nükdang kechi majung aji inyak, aser Baaltem tenzük;

¹²parnok Ijip lima nungi anir adokba, par tsürabur Tsüngrem, KIBUBA senzüka toktsü, aser tangar tsüngrem sülen anitak, parnok meketa alir tsüngremtem, aser parnok sasa item dang apudak: aser parnoki KIBUBA ain adokdaktsü.

¹³Parnoki KIBUBA senzüka toktsü aser Baal aser Ashtarot tenzük.

¹⁴Aser Israel anema KIBUBA ain adok aser rakzükraktemer nem parnok rakzükraktemdaktsü, aser pai parnok tsükchir meketa alirtem ket nung parnok ayok, anungji joko parnoki tsükchir madang menoktaktet.

¹⁵KIBUBAi parnok dang tekümdangtsü agütsüba amato, aser KIBUBAi parnok dang azüngashiba amato, kolenisa parnok ao, KIBUBA teka parnok anema tamajung asoshi liasü, kechiaser parnoki kechianga mesayangi liasü.

¹⁶Idangji KIBUBAi obendangertem adokdaktsü, shirnoki parnok rakzükraktemer ket nungi parnok kümzük.

¹⁷Aji oda saka, parnoki obendangertem danga manga, kechiaser tangar tsüngremtem sülen parnoki jabujaria ao, aser parnok sasa parnok dang apudak; parnok tsüraburtem, shirnoki KIBUBAi melaba tashi anga liasü, parnok jajaba lenmang nungi yakta parnoki meyipa oadok, aser parnoki yamaji meinyak.

¹⁸Aser kodangsa KIBUBAi parnok asoshi obendanger adokdaktsü, idangji obendanger den KIBUBA liasü, aser parnok tsükchir ket nungi obendanger arishi tepiyong parnok kümzük; kechiyong shirnoki parnok timtemdaktsü aser kangshi, iba atema anüngba ola agi kongshia KIBUBAi aochia aküm.

¹⁹Saka kodangsa obendanger asü, parnoki meyipa ao, aser parnok tsürabur dang nungi tamajungba inyaka, tangar tsüngremtem sülen oa, parnok tenzüka parnok dang apudak; parnoki inyakbatem nungi mesüra parnok temulung merangba lenmang nungi parnoki manen.

²⁰Aser Israel anema KIBUBA ain adok; aser pai ashi, “Iba kini ni parnok tsürabur dang melaba kü tezüngzüktepba raksaogo, aser kü ola manga nungji,

²¹nia tang nungibo Yihusuai pa asüdang toktsüba kin kata parnok jakdang maridoktsütsü.

²²“Iba jagi oda parnok tsüraburtemi inyakba ama KIBUBA lenmang nung kümdanga jajadisü, mesüra mejajalir, ni Israel tendangtsü.”

²³Anungji item kin khenyongibo maridoki KIBUBAi toktsü, aser pai parnok Yihusua ket nunga bendanga magütsü.