Read njo OBENDANGERTEM 20 Bible Online

OBENDANGERTEM 20 - njo bible

OBENDANGERTEM 20

¹Idangji Israel chir ajak adok, aser Dan nungi Beersheba tashi, Gilead lima dena, Mizpa nung KIBUBA dangi nisung ka amadang telok atenshi.

²Aser Israel kin nübur ajak madak tongtipurtem Tsüngrem nübur atenshidak parnok sasa aden, nok amer meyirijang noklang pezü.

³Tang Benjamin nungeri Israel nübur Mizpa tongogo ta angashi. Aser Israel nungeri ashi, “Iba tamajung mapa ya koma atalok onok dang shiangjong?”

⁴Aser Levi nungba, tetsürla tepsetsang kinungpui ashi, “Benjamin meyong Gibeai ni aru, aser ni aser kü züngatsü anentsü aru.

⁵Aser Gibea nungeri ni anema apuso, aser aonung ni meketa kiji lungbang; parnoki ni tepsettsü aru, aser parnoki kü züngatsü dak tamajung inyak, aser la süogo.

⁶Aser ni kü züngatsü bena aru aser anüka alangsa, aser Israel senmang linük ajaki la yok; kechiyong parnoki Israel nung tesempatsü aser jabujari benshiogo.

⁷Nenok Israel ajak yangi adenshia lir, anungji nenok rongnung oji lemtepang aser tang telemtetba ka shiang.”

⁸Aser nisung ajaki nisung ka amai aramesoa ashi, “Asenok kata pei süki bushia maotsü, mesüra asenok kata pei kidangi meyipa maotsü.

⁹Saka tang Gibea dang asenoki ya inyaktsü. An toktangba ajanga koma sayudir, asenoki yamaji atutsü.

¹⁰Israel kin ajak nungi noklang nungi ter, meyirijang nungi noklang ka, aser meyirijang ter shia nungi meyirijang ka temerangertem asoshi chiyungtsü abentsü asenoki shimtetdi. Kodang temerangertem Benjamin nunger Gibea tongdir, parnoki Israel dak jabujari inyakba yari parnok dak inyaktsü.”

¹¹Anungji Israel tebur ajak nisung ka ama kümer, yimti anema sentep.

¹²Israel kidongi Benjamin dangi osang bener yoka ashi, “Nenoki inyakba tetsübutsü temenen ya kechi?

¹³Tang Gibea nunger samesa nisungtemji onok nem agüjang, aser onoki parnokji tepsettsü, aser Israel nungi temenen agientsü.” Saka Benjamin nungeri parnok adianu Israel olaji manga.

¹⁴Aser Benjamin nunger Gibea yimtitem nungi, Israel anema tongbangi aotsü külemi aru.

¹⁵Aser iba anogo nung yimtitem nungi Benjamin chirtem nok amer meyirijang metsürtrok liasü, aji Gibea alir teshimtet noklang tenetbo maden.

¹⁶Item ajak rongnung tabelen amer teshimtet nisung noklang tenet liasü; nisung shiai kujang kata mezüi lung yoktsü koka liasü.

¹⁷Israel nisungtem Benjamin medeni, nok amer meyirijang noklang pezü liasü; item ajak raraba nisung liasü.

¹⁸Israel nisungtem arameso aser Betheli atu, aser Tsüngrem dang asüngdang, “Benjamin nunger den raratsü onok koba tama atutsü?” Aser KIBUBAi ashi, “Yihuda tama atutsü.”

¹⁹Tasüngnepji Israel nüburtem anepdang yakta aramesoa Gibea anasa parnok tanendak yanglu.

²⁰Parnoki Benjamin anema raratsü asoshi Gibea nung tongbang sendanga noktak.

²¹Saka Benjamin nungertem Gibea nungi adoka panüji tongbang nung Israel temerangertem meyi metsür-ana tepset.

²²Idangji Israel nisungtemi tashi itshia aser ajungshitepa mezüngnü noktakdak tesem nung tongbang noktak.

²³Israel nüburtemi KIBUBA madangi atu, aser nikongdang tashi ajeb, aser parnoki KIBUBA dang asüngdang, “Onoki ano ozü adianu Benjamin nunger anema tongbang raratsü atutsü asü?” KIBUBAi langzü, “Parnok anema tuang.”

²⁴Anungji Israel nüburtem Benjamin nunger anema tananübuba-a aru.

²⁵Aser panüji Benjamin parnok anema Gibea nungi adoka nok amer Israel nisung meyi ter-ti tepset.

²⁶Idangji Israel nübur ajonga KIBUBA dangi Betheli atu aser parnoki amen aser ajeb. Parnoki panüji nikongdang tashi lumi, aser KIBUBA dang tarongba tenla aser yimjung tenla agütsü.

²⁷Aser Israel nüburtemi KIBUBA dang asüngdang, kechiaser item anogo nungji tezüngzüktepba Tsüngremer ozüng süngdenji idakji liasü.

²⁸Aser Aron chir Eleazar jabaso Finehasi putir mapa inyaka liasü. Anungji parnoki asüngdang, “Ano onoki ozü adianu Benjamin anema raratsü asü masü?” KIBUBAi langzü, “Tuang, kechiaser asüngbo ni parnokji nenok ket nung agütsütsü.”

²⁹Anungji Israeli Gibea meketa arü mendanga ata.

³⁰Aser Israel nungeri tasemnübuba Benjamin nunger anema atu, aser tanga mapang amasa Gibea anema tongbang sendanga noktak.

³¹Aser Benjamin nungeri parnok anema ao, aser yimti nungi pakteta adoka liasü, aser tanga mapang ama parnoki lentongbang nung, kabo Betheli atulen, aser ka Gibea aolen moapu nung, Israel nisung semer shi dak aleptsü aser tepsettsü tenzük.

³²Benjamin nungeri ashi, “Mezüng amatosa, parnok asenok madang laodar.” Saka Israel chirtemi ashi, “Asenok jena odi aser yimti nungi parnok pakteta lentongbangi arudaktsüdi.”

³³Aser Israel nunger ajak parnok alidak nungi arameso aser parnok sasa Baal-tamar nung sendanga noktak aser Israel nunger arü mena alirtem parnok talidak nungi, oda Gibea nungi adok.

³⁴Aser Gibea anema Israel ajak nungi teshimtet meyirijang ter aru, aser tongbangji kanga sashia aküm; saka Benjamin nungeri kopi meli-i parnok anema lendong adoktsü memeteti liasü.

³⁵KIBUBAi Israel nem Benjamin kokdaktsü, aser Israel nungeri panüji Benjamin nunger meyirijang metsürpungu ser noklang ka samatsü; item ajaki nok amer dang liasü.

³⁶Anungji parnoki makok ta Benjamin nungeri metet; Israel nungeri Benjamin nem jenjang agütsü, kechiyong Gibea anema arü mena toktsür dak parnoki tamang aka.

³⁷Aser atsüka alirtemi yakta Gibea senbang; aser arü mena alirtem adoka, yimti ajakji nok agi lepreptsü.

³⁸Aser Israel nunger o atsüka alir tsüngda nung temaitsü jembitepbaji, parnoki yimti nungi mokozü tulu lunga yoktsüba liasü.

³⁹Israel nungeri tongbangi ia noktak, aser Benjamini Israel nunger koka nisung semer shi tepsettsü tenzük; kechiyong parnoki ashi, “Atangji mezüng tongbang amato parnok asenok madang laodar.”

⁴⁰Saka kodang yimti nungi mokozü mepet ama atu, Benjamin nungeri meyipa reprang aser yimti ajak nungi mokozü anüngi atubaji parnoki angu.

⁴¹Idangji Israel nungeri meyip, aser Benjamin nunger aoksa-a adok; kechiyong parnok madak lendong agi atonger ta ajitet.

⁴²Idangji Israel nunger madang terongdong shir lisem lima tsütsüleni ao: saka tongbangi parnok menepadok, aser shirnok yimti nungi adok parnoki tetsüngda nung parnok samatsü.

⁴³Parnoki Benjamin nungerji lungbang, aser mela mela-a parnok aria oa Gibea anüdoklen tashi aria ao.

⁴⁴Aser Benjamin nunger tasü tait nisung meyi ter-ti lao.

⁴⁵Parnoki meyiper lisem lima tsütsüi Rimmon lung bushia ajen, saka Israeli parnok meyi pungubo lenmang nung tepset.

⁴⁶Iba anogo nungji Benjamin nunger nok amer tasü tait temeranger ajak agi meyi metsür-pungu tepset.

⁴⁷Saka nisung noklang trok lisem lima tsütsü Rimmon lung bushia ajen, aser parnok idakji ita pezü ali.

⁴⁸Israel nüburtemi Benjamin nunger anema meyip, aser parnoki ajuruba ajak, oda nisung aser shiruru ajak nok agi tepset; aser parnoki ajuruba yimti ajak mi agi rongtoktsü.