Read njo OBENDANGERTEM 21 Bible Online

OBENDANGERTEM 21 - njo bible

OBENDANGERTEM 21

¹Tang Israel nungeri Mizpa nung, asenok shinga pei jala Benjamin nem kinungtsü asütsü magütsütsüla ta azüngashia liasü.

²Aser nüburji Betheli aru aser yangji Tsüngrem madang nikongdang tashi amen, aser parnok ola adoka kanga ajeb.

³Parnoki ashi, “Oh KIBUBA Israel Tsüngrem, Israel nung tanü kidong ka agi mabensai ya kechiba Israel dak ataloker?”

⁴Tasüngji nüburtem yakta arameso, aser yangji tenladak yanglua, tarongba tenla aser yimjung tenla agütsü.

⁵Aser Israel nüburtemi ashi, “Israel kin telok KIBUBA sentepdagi matuba shiba lir?” Kechiaser KIBUBA dangi Mizpa nung sentepdaki shiba matulir ibajibo atangji südaktsütsü ta parnoki azüngashir liasü.

⁶Aser Israel chirtemi parnok adianu Benjamin asoshi kanga sasa-a bilem aser ashi, “Tanü Israel nungi kidong ka leptokogo.”

⁷Parnok anünga alir atema kinungtsü asoshi asenoki kechi inyaktsü, kechiaser asen jalatem kinungtsü atema magütsütsü ta KIBUBA tenüng atemer asenoki azüngashiogo.

⁸Aser parnoki ashi, “Israel kin rongnung KIBUBA dangi Mizpai matuba ka ali asü?” Aser ajiang, Yabesh-gilead nungi tanendak telok sentepdaki shinga maru.

⁹Kechiaser kodang parnoki nisungtemji züngdang, Yeshesh-gilead nungi shinga maru ta parnoki angu.

¹⁰Anungji teloki ajagi tasü taittiba nisung meyirijang terana yok, aser parnok dang mela-a ashi, “Oang aser Yebesh-gilead alirtem nok agi tetsür aser tilatem dena lepsetang.

¹¹Aser nenoki ya inyaktsüla; nenoki tebur shia aser tebur den medemdangba tetsür shia meshimeshia samajang.”

¹²Aser parnoki Yabeshi-gilead alir rongnung tebur den memedemdangba tasüngtet aiür noklang pezü angu: aser Kanan nung aliba Shilo tanendaki parnoki itemji anir aru.

¹³Aser Rimmon lung nung aliba Benjamin chirtem dangi mungdang ajongai osang yok, aser parnok dang yimjung sangoktsü.

¹⁴Iba mapang nung Benjamin meyipa aru; aser parnoki Yabesh-gilead tsürtem shir taküm kümzük, parnok nem agütsü; aji saka parnok asoshi parnok meperi.

¹⁵Aser nisungtemi Benjamin asoshi sasa-a bilem, kechiaser Israel kin rongnung KIBUBAi tapok ka padaktsü.

¹⁶Tezüngzüktepba telok tamburtemi ashi, “Benjamin nungi tetsür samatsü nungji, anünga alirtem asoshi kibutsü atema koma asütsü?”

¹⁷Parnoki ashi, “Israel nungi kidong ka maidoktsü asoshi parnok asoshi, Benjamin nungi jentetba senmang kabo alitsüla.

¹⁸Aji saka asenoki asen jalatem nungi kibutsü parnok nem magütsütsü; kechiyong Israel chirtemi azüngashia ashi, Benjamin nem shibai kibutsü agütsüdir, pa atakatem sang.”

¹⁹Saka parnoki ashi, “Shilo nung küm shia KIBUBAr benjong akar,” Shiloji Bethel anüdoklentip aser Bethel nungi Shekemi atulen anüdoklen tsütsü aser Lebona anüolentip tsütsü lir.

²⁰Parnoki Benjamin chirtem dang mela-a ashi, “Oang aser tsükmenatzü lu nung mita liang;

²¹aser, ajiang, Shilo jalatem tsüngsangdaki tsüngsanga adokra, idangji nenok tsükmenatzü lu nungi adokang, aser nenok nisung shiai Shilo jalatem pei kinungtsü asütsü puang, aser Benjamin limai oang.

²²Kodang parnok tsürabur aser adianutemi onok dangi arua o adokdir, onoki parnok dang ashitsü, Parnok dang tai tokangma, kechiaser rara nung nisungtemi pei kibutsü asütsü agiba ama parnoki aji inyakogo. Nenoki parnok nem kibutsü asütsü parnok agütsü asübo, nenoki azüngashibaji raksa-a nenoki temenen menala.”

²³Benjamin chirtemi yamaji inyak, aser parnok yongsük yari, shirnoki tsüngsang aser shirnok parnoki bener oa kibutsü asütsü parnok agi: aser parnok ao aser parnok senmang bushia shilang, aser yimtitem yanglu, aser yangji ali.

²⁴Aser Israel chirtemi iba mapang idak nungjagi pila-a ao, nisung shia pei kidong aser pei kinunger dangi, aser parnok nisung shia pei senmang bushia ao.

²⁵Item anogo nung Israel nung chuba mali asü: nisung shiai pei sünütsü dang asü.