Read njo OBENDANGERTEM 3 Bible Online

OBENDANGERTEM 3 - njo bible

OBENDANGERTEM 3

¹Tang kwikati Kanan rara indang kecha memetet, oda parnok ajanga Israel tendangtsü asoshi KIBUBAi toktsüba kin itemi lir;

²Israel pur pututemi raraji metettsü, oda akhidang memetetdangba pur dang pai sayutsü asoshi dang ibai liasü.

³Filistia nunger kibur pungu, aser Kanan nunger ajak, Sidon nunger, aser Lebanon tenem nung alirtem Hiv nunger, Baalhermon tenem nungi Hamat lenmangi aolen tonga oagi alir tashi.

⁴KIBUBAi Mosa ajanga parnok tsürabur dang melaba tashi angadisü mangalir ta metettsü parnokji Israel tendangtsü asoshi liasü.

⁵Anungji Kanan nunger, Het nunger, Amor nunger, Periz nunger, Hiv nunger aser Yebus nunger den Israel chirtem ali;

⁶parnoki par jalatem kibutsü asütsü agi, aser par jabaso nem parnoki pei jalatem agütsü; aser parnoki par tsüngremtem tenzük.

⁷Israel chirtemi KIBUBA nükdang kechi majung aji inyak, aser KIBUBA parnok Tsüngrem amadok, Baal aser asherot tenzük.

⁸Anungji Israel anema KIBUBA ain adok aser pai parnok Mesopotamia chuba Kushan Rishathaim dang ayok; aser Israel nüburi Kushanrishathaim küm ti tenzük.

⁹Saka kodang Israel purtemi KIBUBA dang ayimten, KIBUBAi Israel pur asoshi tekümzüker ka adokdaktsü. Kaleb tenu, Kenaz chir Othniel, shibai parnok kümzük;

¹⁰KIBUBA tanela pa madaki aru, aser pai Israel o bendang; pai rarai ao, aser KIBUBAi pa ket nung Mesopotamia chuba Kushanrishathaim agütsü; aser Kushan Rishathaim madak pai takok angu.

¹¹Anungji küm lir linük anisüngzük liasü. Idangji Kenaz chir Othniel asü.

¹²Tanaben Israel chirtemi KIBUBA nükdang kechi majung aji inyak, aser Israel anema KIBUBAi Moab chuba Eglon tashi itdaktsü, kechiaser parnoki KIBUBA nükdang kechi majung aji inyak.

¹³Aser pai pa dangi Ammon aser Amalek chirtem aniten; aser pa ao aser Israel akok, aser parnoki asangdong yimti agi.

¹⁴Aser Israel chirtemi Moab chuba Eglon küm terti tenzük

¹⁵Saka kodang Israel nüburtemi KIBUBA dang ayimten, KIBUBAi parnok asoshi abelen kayim tekümzüker ka Benjamin nunger Gera chir, Ehud agütsü, aser Israel purtemi pa ajanga Moab chuba Eglon dangi putisü yok.

¹⁶Ehudi pei asoshi anatsü nok ka metong nung süklep ka yanglu; aser pai aji tepi tajichilen sü telunglen alenloka asem.

¹⁷Aser pai Moab chuba Eglon nem putisüji agütsü. Tang Eglon kanga teyira nisung liasü.

¹⁸Aser kodang Ehudi putisüji agütsüma, putisü abenertemji pai yokadok.

¹⁹Saka pabo Gilgal anasa süngyanglu chitetba lung alidak nungi meyipa aru, aser ashi, “Oh chuba, na asoshi ni miim o ka lir.” Aser chubai ashi, “Ola tatok.” Aser pa anasa noktaka alir ajak pa nungi tuguadok.

²⁰Ehud pa dangi aru, aser pa kija taktang temokongdak mena liasü. Aser Ehudi ashi, “Ni na asoshi Tsüngrem nungi osang ka bena lir.” Aser pai pei menden nungi arameso.

²¹Aser Ehudi pa teka tabelenji adok, aser pa tajichi tepi nungi nokji atsütet, aser pa tepok nung setoktsü:

²²aser nok den nokbanga dena ai, aser temo jagi nokji nungbangadok, kechiyong pai tepok nungi nokji matsütet; aser jana nungteta adok.

²³Idangji Ehud kilempoki tugu, aser taktang kishitemji pai shibanga yutsü, aser tertangtsü agi shibang.

²⁴Tang pa or külen kilirtem arua temaba taktang kishiji tertangtsü agi shibanger angu. Anungji parnoki ashi, “Pa taktang telungba nung anisüngzüker südi.”

²⁵Aser parnok ratamata-a maküm tashi parnoki atasa-a liasü; aser ajiang, pai taktang kishitemji melapok, anungji parnoki tertangtsü bena arua itemji lapok; aser ajiang, par kiburji atem nung laoa tasü liasü.

²⁶Parnok atasa-a alidang Ehud jena ao, aser süngyanglu chitetba lung alidak atena ao, aser Seirai jentet.

²⁷Kodang pa aru, pai Efraim tenem linük nung jangzü apu, aser Israel chirtem tenem lima nungi pa tama sür alu.

²⁸Pai parnok danga ashi, “Kü sülen anitakang; kechiyong KIBUBAi nenok tsükchir Moab nunger nenok ket nung agütsüogo;” aser parnok pa sülen alu, aser Moab tsütsülen Yordan tzütendak agi, aser nisung kata süia modaktsü.

²⁹Iba mapang nungji parnok Moab nunger tashi tait nübujung tesa nisung meyi ter tepset; oda nisung kata mejenbu.

³⁰Panüji Moab limaji Israel küboki aru, aser küm lir-anasü tashi linük nung yimjung liasü.

³¹Ehud sülen Anat chir Shamgari chuba, shibai Filistia nunger noklang trok nashi meinba ajok agi tepset; aser paia Israel kümzük.