Read njo OBENDANGERTEM 4 Bible Online

OBENDANGERTEM 4 - njo bible

OBENDANGERTEM 4

¹Ehud sür külen Israel purtemi tanaben KIBUBA nükdang kechi majung aji inyak.

²KIBUBAi parnok Hazor nung yimsüsüa aliba, Kanan chuba Yabin ket nung ayok; aser par temeranger arkotongji Sisera, shiba Harosheth-ha-goiim bendanger lima nung liasü.

³Idangji Israel purtemi teyari asoshi KIBUBA dang ayimten; kechiaser pa merang talungtsü noklang tuku liasü, aser Israel nübur küm metsü taochi makai kangshi.

⁴Iba mapang nungji Lappidot kinungtsü ainkarla Debora, lai Israel nung obendanger mapa inyakya liasü.

⁵Efraim tenem lima Rama aser Bethel tsüngda nung Debora asangdong kübok lai menli asü; aser Israel nungertemi o bendangi la dangi atu.

⁶Lai Kedesh-Naftali nungi Abinoam chir Barak tajai yoka pa dang ashi, “Israel Tsüngrem KIBUBAi ne dang yamai memela no? Oang, Tabor tenem nung, Naftali kin aser Zebulun kin nungi ne nübur meyi ter anitenang.

⁷Aser ni Yabin temeranger telok arkotong Sisera-i anir, nenok den Kishon ayong anasa ajuruteptsü asoshi pa talungtsü aser telok anir adokdaktsütsü; aser ni nenok ket nung pa agütsütsü.”

⁸Baraki la dang ashi, “Na kü den ora ni aotsü; saka na kü den moli süra ni maotsü.”

⁹Lai langzü, “Atangji ni ne den aotsü; aji saka na koba lenmang nung aor aji agi ne nem khonang magütsütsü, kechiyong KIBUBAi tetsür ka ket nung Sisera ayoktsü.” Idangji Debora arameso aser Barak den Kedeshi ao.

¹⁰Baraki Zebulun aser Naftali Kedeshi aja; aser nisung meyi ter pa sülen ao; aser Debora pa den aru.

¹¹Tang Mosa toko Hobab nungi jakzükba, Ken nungba Heberji Ken nunger nungi pila-a liasü, aser Kedesh anasa Zaanannim nung, sülemdong tonga oagi pa süki süa liasü.

¹²Kodang Sisera dang Abinoam chir Barak Tabor tenemi tuogo ta metetdaktsü,

¹³Siserai merang talungtsü noklang tuku, Bendanger Haroshet nungi Kishon ayongi pa den or nisung ajak aniten.

¹⁴Idangji Deborai Barak dang ashi, “Apusoang! Kechiyong KIBUBAi Sisera ne ket nung agütsüba anogoji tanü lir. Ne madang KIBUBA maor ama?” Anungji Baraki Tabor tenem nungi alu aser pa sülen nisung meyi ter alu.

¹⁵KIBUBAi Sisera aser pa talungtsü ajak aser temeranger telok ajak Barak nokbang nung jenshia odaktsü; aser Sisera pa talungtsü nungi alu aser tetsüng agi ajen.

¹⁶Saka Baraki talungtsü aser temerangertemji Bendanger Haroshet-ha-goiim tashi aria ao aser Siserai aniba telok ajak ka danga manüngi nok agi tepset.

¹⁷Saka Sisera tetsüng agi, Ken nungba Heber kinungtsü Yael, lar süki bushia jena ao; kechiaser Hazor chuba Yabin aser Ken nungba Haber kidong tsüngda nung yimjung liasü.

¹⁸Aser Sisera den ajuruteptsü Yael kimai adok aser pa dang ashi, “Aitadokang, kü kibur, kü dangi aitang, tetsübu, aser pai süki jagi ai aser lai sü agi pa nembang.”

¹⁹Aser pai la dang ashi, “Yimlibilema kü nem tajemtsü tzü tera kua; kechiyong ni tzürar.” Anungji lai mamatzü bongdang ka lapok aser pa nem tajemtsü agütsü aser pa nembanga toktsü.

²⁰Aser pai la dang ashi, “Süki kikümbang nung noktakang, aser kar arua ne dang yangi nisung ka ali asü ta asüngdangra, mali ta shiang.”

²¹Idangji Heber kinungtsü Yaeli süki asongba süng ka bena aru, aser la ket nung kotep ka am aser pa dangi tanemi alu aser ali nung mejangok tashi aji tenapa nung angenloktsü, kechiyong Sisera belemer jungjunga amua oa liasü. Yamaji pa asü.

²²Aser ajiang, Baraki Sisera aria arudang, Yaeli pa den ajuruteptsü tugu aser pa dang ashi, “Arung nai bushiba nisungji ni ne dang sayudi.” Anungji pai lar sük-i ai; aser ajiang yangji Sisera pa tenapa nung süki asongba süng jangoker, tasü ontaka liasü.

²³Anungji iba anogo nung Tsüngremi Israel nübur nem Kanan chuba Yabin agütsü.

²⁴Israel nüburtemi Kanan chuba Yabin anema Tsüngremi Israel tashi itdaktsü aser parnoki pa samatsü.