Read njo OBENDANGERTEM 5 Bible Online

OBENDANGERTEM 5 - njo bible

OBENDANGERTEM 5

¹Iba anogo nungji Debora aser Abinoam chir Baraki iba ken tena ashi:

²Israel nung tanishirtemi len anir, nüburtemi mulungbena pei sasa tenlar, KIBUBAji sangang!

³Angang, Oh chubatem, tenarong tenang, Oh tongtipurtem; KIBUBA dang ni ken atentsü; Israel Tsüngrem, KIBUBA dang ni tenüngsang atentsü.

⁴KIBUBA, na koda Seir nungi adok, kodang nai Edom moapu nungi adok, alimai atenten, ano anüngtemi jetzüka tsük, hau, mepettemi tzü jenzükdaktsü.

⁵ KIBUBA tsüngdang tenemtemi anokshir, oda oagi Sinai, Israel Tsüngrem KIBUBA tsüngdang.

⁶Anat chir Shamgar anogo nung, Yael anogo nung, lentongbang nung nisung meli-i liasü, aser aenlen jajartemi lenrü nung jaja.

⁷Israel nung yimtsüng azünga adok, na Debora Israel nung tetsü ka ama, madok tashi parnok anenadok.

⁸Kodang parnoki tsüngremtem tasen shimtet, idangji süngkhüm nung rara liasü, aser Israel meyirijang lir rongnungi jong mesüra nü ka danga angu asü?

⁹Kü mulungjang Israel walunirtem den lir, mulungbensa tenlaba nüburtem den, KIBUBAji sangang!

¹⁰Nenok gado temesüng nung amenertem, nenok shir atem sü tajung nung amener, aser nenok lenmang nung jajartemi iba indang shiang.

¹¹Tzü atadak kentener ola ama parnoki KIBUBA takokba indang lepshir, Israel nung, idangji KIBUBA nüburtemji süngkhümi alu.

¹²Sakang, sakang, Debora; sakang, sakang, ken ka tenyuang. Aramesoang, Barak, tepuokertem anir oang, Oh Abinoam jabaso.

¹³Idangji tamarenertem tanüngba jaja-a alu; KIBUBA nüburtem pa asoshi tashi tulu anema alu.

¹⁴Efraim nungi ajagi parnoki apusoa Amalek lenteni ao; Benjamin, ne sosem den, ne sülen anitak. Makir nungi temeranger tanishirtem alu; aser Zebulun nungi temeranger tanishir mechi abenertem alu;

¹⁵Debora den Issakar tongtipurtem liasü; Issakar koma liasü, yamaji Barak liasü; lenten jagi parnok pa sülen anasa dang nungoka ai. Reuben kin rongnung temulung bushitepba tulu liasü.

¹⁶San telok ajatsü apuba angashitsü, Kechiba nai san kidang ata-a alir? Reuben kin rongnung temulung bushitepba tulu liasü.

¹⁷Yordan atener Gilead ata-a liasü, aser kechiba Dan rongtem den liasü? Asher tzüküm nung ata-a lir, aser pa tanendak mena lir.

¹⁸Saka Zebulun aser Naftali nisungtem, parnok taküm agi tenla-a tongbang nung lir.

¹⁹Taanak nung Megiddo tzü anasa chubatem aru aser rara; Kanan chubatemi rara, saka parnoki tajangzük taribi sen kecha mangu.

²⁰Kotak nungi parnoki rara, petinutemi pei lenmang nung Sisera anema rara.

²¹Kishon ayongi parnok oker oadok, alemli aliba ayong, Kishon ayong, Oh kü nela tashi tulu agi jaja-a oang.

²²Idangji pa kortem asemtepa jajaba, kor temupu agi jajaba ola tulu adok.

²³Meroz atakatemang ta KIBUBA tenyari ashi. Idakji alir ajak kanga atakatemang, kechiaser parnoki KIBUBA yaritsü maru, tashi tulu anema KIBUBA yaritsü maru.

²⁴Tetsür ajak dang tepelatilaji, Ken nunger Heber tebutsü Yael, süki alir tetsür ajak dang temoatsüla.

²⁵Siserai tzü meshi, aser lai pa nem mamatzü agütsü; lai mamatzü telong tulu ka su ka nung pa nem bener arutsü.

²⁶Lai la ket agi süki asongba süng, aser la teka tajichi agi mapa inyaker koteptsü nung amet; lai Sisera dak angenoktsü, lai pa tekolak jakreptsü, lai pa tenapa ajasatsü aser tupoktsü.

²⁷La tsüngdang pa apudak, pa lao, pa longdak; la tsüngdang pai apudak, pa lao; kong pa apudak yangji pa tasü longdak.

²⁸Kichiba nungi lai repranga yok, aser ayimten, Sisera tetsüi waya-kichiba ajanga ayimten; kechiba pa talungtsü papigati menur? Kechiba pa talungtsü tetsüng papigati süzüker?

²⁹Lar shisa taka tamarentsüri langzüa la dang ashi, hau, la sasa la dang langzür,

³⁰Parnoki temakzükba osettem bushitepa, aser lemsateper masü no? Temeranger nisung shia aiür chanu kaka mesüra anana, Sisera nem temakzükba süoshi tajung, mechitepa yangluba süoshi tajung, kü tekong asoshi anatsülen mechitepa yangluba sü tajung ana.

³¹Yamaji ne tsükchirtem ajonga samajang Oh KIBUBA! Saka na meimertemji anü ama lidakjang. Kodang parnok iba tashi nung noktakdir, Idangji linük nung küm lir tesünep liasü.