Read njo OBENDANGERTEM 6 Bible Online

OBENDANGERTEM 6 - njo bible

OBENDANGERTEM 6

¹Israeli ano KIBUBA nükdang kechi majung aji inyak, anungji KIBUBAi Midian nunger ket nung parnok küm tenet agütsü.

²Midian nungerji Israel den tashi taitba liasü, anungji Israel nüburtemi parnok sasa tenem nung leprungki, lungpok aser mitsatem yanglu.

³Aser kodangsa Israeli metsü prok, Midian nunger Amalek nunger, aser anüdoklen nisungtem atuli parnok makli ta asü;

⁴aser parnok anema arü menli aser Gaza tonga oagi ali nungi tzünütetba raksatsüli ta asü, aser Israel asoshi kecha oset metoktsü, san mesüra nashi mesüra gado kecha metoktsü.

⁵Kechiyong parnok pei kiset shiruru den süki bener atu, süngku lokti ama parnok telok telok ait, parnok aser par ut mezüngdangteti liasü; aser linükji raksatsütsü parnok ajagi ait.

⁶Midian nungeri Israel kanga dang ludaktsü; aser Israel chirtemi KIBUBA dang ayimten.

⁷Kodang Israel nüburtemi Midian nunger atema KIBUBA dang ayimten,

⁸KIBUBAi Israel nübur dangi ainkar ka yok; aser pai parnok dang ashi, “Yamai Israel Tsüngrem KIBUBAi ashir: ni nenok Ijip nungi anir adok, aser alar ki nungi anitet;

⁹Ni nenok Ijip nunger ket nungi kümzük, aser nenok madang nungi parnok aridok, aser parnok lima nenok nem agütsü;

¹⁰aser ni nenok dang ashi, Ni nenok Tsüngrem KIBUBA lir, aser nenoki Amor nunger, shir lima nung nenok lir, par tsüngremtem dang akhümtsübu tesayu, saka nenoki kü ola manga.”

¹¹KIBUBA tenyar aru aser Ofra nung sülem dong kübok amen, aji Abiezer nunger Yoash meyong liasü; par chir Gideoni, Midian nunger nungi aji miima ayutsü asoshi totzü menüngdak wheat tsük netya liasü.

¹²Aser KIBUBA tenyar pa dangi adok aser pa dang ashi, “KIBUBA ne den lir, na tashi tulu nisung.”

¹³Idangji Gideoni pa dang ashi, “Oh kü KIBUBA, KIBUBA onok den lir süra, ajangla kechiba item ajak onok dak ataloker? Onok tsüraburtemi, KIBUBAi asenok Ijip nungi anir madok ama! ta shira pa tesüngmangtsü mapa indang onok dang ashibaji kong ali? Saka tangbo KIBUBAi onok jentokogo, aser Midian nunger ket nung onok bendanga agütsüogo.”

¹⁴Idangji KIBUBAi pa dangi meyip aser ashi, “Ne tashi nung iba nungi oang, aser Midian nunger ket nungi Israel kümzükang. Ni na meyoker no?”

¹⁵Gideoni langzü, “Oh KIBUBA, ni kodaser Israel kümzüktsü? Ajiang, Manase nung kidong tashi maitiba, aser ozü kinunger rongnung ni tilatiba lir.”

¹⁶Saka KIBUBAi pa dang ashi, “Atangji ni ne den alitsü, aser nai Midian nungerji nisung ka amai dang akoktsü.”

¹⁷Anungji Gideoni pa dang ashi, “Tang ni ne madang taochi ngua lira, kü den jembiba ya na-a ta metettsüsa kü dang temaitsü ka sayuangma.

¹⁸Ni ne dangi kü sempet bener arua ne madang meyutsü tashi na yimlibilema yang nungi tuoma.” Aser pai ashi, “Na tanaben maru tashi ni ata-a alitsü.”

¹⁹“Gideon ai aser nabong chanu ka, aser chiyungtsü efa ka, piyazü meinokba amtsük renemtsü: shiji pai molok ka nung enok, aser pai antzüji po ka nung enok, aser sülemdong küboki aji bener adok, aser tenla.

²⁰Aser Tsüngrem tenyari pa dang ashi, “Shi agiang, aser iba lungma nung piyazü meinokba amtsükji ataloka yuang, aser antzüji shilokang.” Aser yamaji pai inyak.

²¹Idangji KIBUBA tenyari pa ket nung aliba ajok tatembanglak jagi shi aser piyazü meinokba amtsük dakji kongshi; aser lung nung jagi mi adok, aser shi aser piyazü meinokba amtsükji rongrep; aser KIBUBA tenyarji pa nükdang nungi pila.”

²²Kodang Gideoni ibaji KIBUBA tenyar ta metet, pai ashi, “Aiatai, Oh KIBUBA! Kechiaser tang ni KIBUBA tenyar tejak o tejak jitepa nguogo.”

²³Saka KIBUBAi pa dang ashi, “Ne den tesünep liang, tetsübuma, na masütsü.”

²⁴Anungji Gideoni idakji KIBUBA dang tenladak ka yanglu aser iba tenüng “Yihova Shalom”[2] ta aja. Tanü tashi ibaji Abiezra nunger Ofra nung lir.

²⁵Paonungjisa KIBUBAi Gideon dang ashi, “Nebuer nashi pungchiji agiang, oda tanabuba nashi pungchi küm tenet alibaji. Aser nebuer meyong Baal tenladakji raksajang, aser iba anasa aliba Ashera süngraji lepzüka yokang.

²⁶Aser iba tenem kolak nungji KIBUBA ne Tsüngrem atema tenladak ka yangluang, aser tanabuba nashi pungchiji agia, Ashera lepzüka yokba süngra den aji tarongba tenla agüjang.”

²⁷Idangji Gideoni par kilir nisung ter ani aser KIBUBAi pa dang ashiba ama inyak. Saka pai aji anüngdang inyaktsü yimti nübur aser kinunger dang tsübu nung aonung inyak.

²⁸Kodang yimti nung alir nisungtem anepdang shishi, Baal tenladak raksar, aser iba anasa Ashera lensüker, tenladak tasen yangluba manung nashi pungchi tanabubaji tenlar liasü.

²⁹Anungji parnok kati ka dang asüngdang “Ya shibai inyak?” Kodang parnoki aji kanga junga bushi, ya Yoas chir Gideoni inyak ta bushitet.

³⁰Idangji yimtisangeri Yoas dang ashi “Ner chir anir adokang, pa südaktsütsüla, kechiaser pai Baal tenladak raksaja iba anasa aliba Ashera lepzüka yokogo.”

³¹Saka Yoasi pa anema noktakba telok dang ashi, “Nenoki Baal asoshi noktaker asü? Nenoki Baalji kümzüknür asü? Shibaisa pa asoshi noktakdir anepdang paji südaktsütsü. Baalji shitakba tsüngrem ka sürabang pai pei sasa noktakdakjang, kechiaser nisung kari pa tenladak raksatsüogo.”

³²Anungji panüji Gideon dang Yerub-baal ta aja, koba tetezü, pa anema Baali toktepdakjang, kechiaser pai Baal tenladak raksatsü.

³³Tang Midian nunger, Amalek nunger o anüdoklen alir ajak külemi sentep, aser Yordan atener Yezreel lenten nung amen.

³⁴Idangji KIBUBA tanela Gideon madak aru; aser pai jangzü ka apu, aser Abiezra nunger pa sülen aotsü külemi sentep.

³⁵Pai Manase ajakleni osang abener yok; aser parnoka pa sülen anitaktsü külemi sentep, aser pai osang abener Asheri, Zebuluni aser Naftali-i yok; aser parnok den ajuruteptsü lenji atu.

³⁶Gideoni Tsüngrem dang ashi, “Nai ashiba ama, nai Israel kü ket nung kümzüktsü süra,

³⁷ajiang, ni motsüngnem nung san tezüng ataloka yutsüdi; tezüng nungji dang azüngtsü la-a lira, aser ali ajak takong lira, idangji nai ashiba ama, nai Israel kü ket agi kümzüktsü ta ni metettsü.”

³⁸Aser aji yamaji liasü; kechiyong pa tasüngnepji yakta shishi, aser tezüngji külemi ajet nung, tezüng nungi tzü susa ka ajetzük.

³⁹Idangji Gideoni Tsüngrem dang ashi, “Ni ne den tanaben jembiba atema ni anema na ain tadokma ta ni ne dang mepishir, oda tezüng yagi ano na khen tendangtsü mela-angma. Tanbo tezüng ya takong aser ali nungji azüngtzü lidakjangma.”

⁴⁰Paonungji Tsüngremi yamaji inyak. Tezüngji dang takong aser ali ajakji azüngtsü agi sünga liasü.