Read njo OBENDANGERTEM 7 Bible Online

OBENDANGERTEM 7 - njo bible

OBENDANGERTEM 7

¹Idangji Yerub-baal, aji Gideon aser pa den alir nisung ajak anepdang yakta sak aser Harod tzübu anasa tanendak yanglu. Midian nunger tanendakji parnok tsütsü anüdoklentip lenten Moreh tenem anasa liasü.

²KIBUBAi Gideon dang ashi, “Ni Midian nunger parnok nem agütsütsü asoshi ne den aliba nisungtemji onsara, ashiko Israeli parnok sasa asüküma, kü ket agi ni kümzük ta ashitsü.

³Anungji tang nüburtem dang shiang, shibasa tsübuseta aser atentena ali, pa Gilead tenem nungi meyipa odakjang.” Aser meyi metsür ana meyipa ao, saka meyi ter anüng.

⁴Saka KIBUBAi Gideon dang ashi, “Nüburji ano onsara; parnok tzü jagi anir alung, aser ni na asoshi parnok tendangtsü: shiba indang ni ne dang, iba nisung ne den aotsü ta shidir, ne den aotsü; aser ni shir indang, iba nisung ne den maotsü ta shidir paji maotsü.”

⁵Anungji pai parnok tzü jagi anir alu: aser KIBUBAi Gideon dang ashi, “Nisung shia shibai azüi menakba ama, temeli agi tzü menakdir, nai pa pila-a yuang; shibai tzü ajemtsü temokok agi apudaker, yamajisa pila-a yuang.”

⁶Aser teka agi tzü metema arua menakertemji, nisung noklang asem liasü; saka tanüngba nisung ajakji tzü ajemtsü parnok temokok agi apudak.

⁷Aser KIBUBAi Gideon dang ashi, “Temenaker noklang asem jagi ni nenok kümzüktsü, aser Midian nunger ne ket nung bendanga agütsütsü: aser tanüngba nisung ajak pei talidaki shia odakjang.”

⁸Anungji Gideoni nisung noklang asemji jangzü aser nok o nüji bendaktsü, aser tanüngba Israel nisungtemji pei süki-i yok. Midian nunger tanendakji tetsünglanglen lenten nungji liasü.

⁹Paonungjisa KIBUBAi pa dang ashi, “Aramesoang, tanendaki parnok anema luang; kechiyong ni aji ne ket nung agütsüogo.

¹⁰Saka nai alutsü tsüburabang, ne kilir Pura den tanendaki luang;

¹¹aser parnoki kechi ashishir nai angashitsü; aser tesülen tanendaki aotsü asoshi ne teka tashi itshidaktsütsü.” Idangji pai pa kilir Pura den nok o nü abener tanendak tematiba jagi alu.

¹²Aser süngku telokti ama, lenten nungji Midian, Amalek nunger, aser anüdoklen alir nisung ajak zükrepa liasü; aser tzüyim nung lisem ama telok telok parnok ut mezüngdangteti liasü.

¹³Kodang Gideon aru, nisung kati pa pungmang pa medemer dang shiya angashi. Pai ashi, “Ni pungmang ka pungmangogo, barley amtsük ka Midian nunger tanendaki mezüa alu aser süki dakji tashi agi tsükshi aser aji pulashi agi ali nung remtaka laodaktsü.”

¹⁴Pa medemer jagi langzüa ashi, “Ibaji tanga kecha masü, saka Israel nunger Yoas jabaso Gideon nok indang ashir. Tsüngremi Midian nunger aser iba telok ajak pa ket nung agütsüogo.”

¹⁵Kodang Gideoni pungmang ashiba aser tetezü angashi, pai Tsüngrem külem; aser pai Israel tanendaki meyip, aser ashi, “Aramesoang, kechiyong KIBUBAi Midian telok nenok ket nung bendanga agütsüogo.”

¹⁶Aser pai nisung noklang asemji telok asem küma lemsa, parnok ajak ket nung jangzü aser mori tazüng, mori telunglen milenpung enoker pai amoktsü.

¹⁷Pai parnok dang ashi, “Kü dak reprangang, aser yamai inyakang: aser ajiang, kodang ni tanendak tematiba jagi tudir, ni koma inyakdir, yamaji nenoki inyaktsü.

¹⁸Kodang ni aser kü den alir ajaki jangzü apudir, idangji tanendak ajak nungi jangzü apuang aser ayimtenang, ‘KIBUBA asoshi aser Gideon asoshi!’ ”

¹⁹Gideon aser pa den aliba nisung noklang kaji ayatrem matongdang, parnok mitkar melentepli tanendak tematiba jagi aru. Parnoki jangzüji apu aser parnok ket nung aliba moritemji jakrep.

²⁰Telok asem jagi jangzü apu, aser moritem jakrep, aser milenpungji parnok teka tabelen nung aser parnok teka tajichi nung jangzü aputsü am, aser parnoki ayimten, “KIBUBA aser Gideon nok.”

²¹Aser parnok nisung shia parnok alidak tanendak meketa noktak: aser telok ajak asem; aser parnoki ayimten aser parnok jenshidaktsü.

²²Parnoki jangzü noklang asemji apu, aser KIBUBAi nisung shia pei medemer dak, aser telok ajak anema nok yokdaktsü; aser telokji Zerera tsütsü Beth-shitta tonga, Tabbat anasa, Abelmehola litsü tonga jena ao.

²³Israel nungerji Naftali nungi, Asher nungi, aser Manase ajak nungi jaten, aser Midian nunger aria ao.

²⁴Gideoni Efraim tenem linük ajakleni osang yoka ashi, “Midian nungertem anema alung aser Yordan ayongji agiang, aser parnok jakdang Beth-Bara tashi oa agiang.” Efraim nisung ajak aja aser parnoki Yordan tzüji Beth Bara tashi oa agi.

²⁵Parnoki Midian nunger tongtipur ana Oreb aser Zeeb na apu; aser parnoki Orebji Oreb lung nung tepset, aser Zeebji Zeeb totzü menüngdak tepset, aser Midian nunger aria ao, Oreb o Zeeb na kolakji Yordan ajanger Gideon dangi bener aru.