Read njo OBENDANGERTEM 8 Bible Online

OBENDANGERTEM 8 - njo bible

OBENDANGERTEM 8

¹Idangji Efraim nisungtemi Gideon dang ashi, “Kechiba nai onok dang yamai benshir? Midian nunger den raratsü na aodang nai kechiba onok maja?” Aser parnoki pa den o kanga sashia jembi.

²Saka pai parnok dang langzü, “Nenoki inyakba den medemdangtsüsa ni kechi inyaka ali? Efraim nisungtemi tila ka inyakbaji kü kidong ajongai inyakba dang tali masü no?

³ Tsüngremi Midian tongtipurtem Oreb aser Zeeb nenok ket nung agütsü. Süra nenoki inyakba den medemdangtsüsa ni kechi inyaka ali?” Aser idangji parnoki pa anema ain adokbaji süngjema aküm.

⁴Gideon aser pa den nisung noklang asemji kanga lular, saka tsükchir aria Yordan tonga aru aser aji ajang.

⁵Aser pai Sukkot nunger dang ashi, “Yimlibilema kü den alir nisungtem nem chiyungtsü kar agüjang, kechiaser parnok kanga lula-a lir, aser ni Midian chubatem Zeba aser Zalmunna aria aor.”

⁶Saka Sukkot tongtipurtemi ashi, “Onoki ne nisungtem nem chiyungtsü agütsütsüsa Zeba aser Zalmunna tang ne ket nung lir ma?”

⁷Idangji Gideoni ashi, “Ajangla kodang KIBUBAi Zeba aser Zalmunna kü ket nung agütsüdir, ni nenok temangji lisem lima ayi aser jemben yi agi yisatsütsü.”

⁸Yang nungjagi pai Penueli atu, aser parnok danga kasa ojisa ashi, saka Sukkot nungeri langzüba ama dang Panuel nungeria langzü.

⁹Anungji pai Penuel nunger dang ashi, “Kodang ni yimjung nung meyipa arudir, ni iba mitsa raksatsütsü.”

¹⁰Tang Zeba aser Zalmunna Karkor nung liasü, aser par telok parnok den meyi terpungu shi liasü, anüdoklen alir telok ajak nungi anünga aliba ajak, kechiyong nok amer meyi noklang ka ser metsü laoadok.

¹¹Noba aser Jogbeha anüdoklen süki nung alir lenmang jagi Gideon atu, aser temeranger telok denji rara; kechiyong temeranger telok merenemi liasü.

¹²Midian chubatem ana Zeba aser Zalmunna jena ao, saka pai parnok aria oa apu aser parnok temeranger telok ajak samatsü.

¹³Yoas chir Gideon tongbang nungi Heres leni atulen nungi meyipa aru.

¹⁴Pai Sukkot nunger asangur ka pua arua pa dang asüngdangya, aser asanguba jagi pa nem Sukkot nung tanishir aser tamburtem nisung neter tenet zülutsü.

¹⁵Idangji Gideon Sukkot nunger dangi arua ashi, “Zeba aser Zalmunna ajiang, shirnok indang nenoki kü dang metenokja ashi, Ne nübur lumia alir nem onoki amtsük agütsütsüsa Zeba aser Zalmunna ne keti arur asü?”

¹⁶Pai yimti tamburtemji apu aser Sukkot nunger jakdang lisem lima ayi aser jemben yi agi parnokji merenshia sayu.

¹⁷Pai ano Penuel lungki raksatsü aser yimti nung alirtemji tepset.

¹⁸Idangji pai Zeba aser Zalmunna dang asüngdang, “Nenoki Tabor nung tepsetba nisungtemji kobala?” Parnoki langzü, “Na ama parnoka liasü, nisung shia chuba chir mesüka liasü.”

¹⁹Gideoni parnok dang ashi, “Parnokji kü adianutem, kütsü chirtem lir, KIBUBA taküm ali nungji, nenoki parnok taküm kümzük asübo nia nenok metepsetla.”

²⁰Idangji pai par chir tambusang Yether dang ashi, “Aramesoang aser parnok tepsetang.” Saka tanur jagi nok mesangtet, kechiaser pa ano asangur dang liasü aser pai tsübu.

²¹Idangji Zeba aser Zalmunnai ashi, “Ne sasa aramesoang, aser onok tepsetang, kechiaser nisungbaji koma-ar pa tashia yamaji lir.” Anungji Gideoni aramesoa Zeba aser Zalmunna lepset, aser parnok ut tekong nung aliba azüktemji pai agi.

²²Idangji Israel nüburtemi Gideon dang ashi, “Onok madak na, ner chir aser ner semchirtemi yimsü sang, kechiaser Midian nunger ket nungi nai onok kümzük.”

²³Saka Gideoni parnok dang langzü, “Ni nenok madak yimsü masütsü, mesüra kü chiria nenok madak yimsü masütsü. KIBUBAi nenok madak yimsü asütsü.”

²⁴Ano pai parnok dang ashi, “Ni nenok dang langka mepishinür, nenok nisung shia temakzükba oset nungi tenarong küri kü nem agüjang.” Kechiaser parnok Ishmael nunger liasü.

²⁵Parnoki langzü, “Onoki itemji agütsütsü mulunga lir.” Anungji parnoki sü ka alem aser nisung shiai pei-i rakzükba nungi hon küri ka ka yangji enoktsü.

²⁶Pai mepishiba hon agi yangluba tenarong küritem seret odangbaji hon shekel meyi ka ser noklang tenet liasü; itemji Midian chubatemi agiba temaitsü tulokba senti oset, keptang aser nakrema meremba sobutsü medeni, aser parnok ut tekong nung azükba oset medeni liasü.

²⁷Gideoni iba jagi putir temeshi sobutsü ka yanglu aser aji par yimti Ofra nung ayu; aser Israel ajaki iba sülen jabujaria oadok, aser ibajiang Gideon aser par kinunger asoshi sang ka kümadok.

²⁸Yamaji Israel nunger madang Midian ludaktsü aser parnoki joko tekolak angaka matu. Aser Gideon tendak küm lir linük nung anisüngzük liasü.

²⁹Yoas chir Yerub-baal pei kidangi meyipa oa ali.

³⁰Tang Gideon jabaso neter liasü, kechiaser pa kinungtsü aika liasü.

³¹Shekem nung aliba tezüngatsüi pa nem jabaso ka sotsü, aser pai pa tenüng Abimelek aja.

³²Aser Yoas chir Gideon tambur kümer asü, aser tebu Yoas leper nung, Abiezra nunger lima Ofra nung arem.

³³Gideon süli-i Israel nungeri tanaben meyipadok aser Baal sülen jabujaria benshi aser Baal-berith par tsüngrem aküm.

³⁴Aser Israel nungeri KIBUBA parnok Tsüngrem, shibai parnok tsükchir ajak nungi ajaklen kümzük, pa mebilemtet;

³⁵aser parnoki Yerub-baal, aji Gideon, pai Israel dang tajung ajak inyakaka par kibong dang temeim mesayu.