Read njo OBENDANGERTEM 9 Bible Online

OBENDANGERTEM 9 - njo bible

OBENDANGERTEM 9

¹Tang Yerub-baal chir Abimelek tetsür kinungertem dangi Shekemi oa tetsü kinunger ajonga dang ashi,

²“Shekem senso ajak dang asüngdangang, Yerub-baal chir neter jagi nenok madak yimsü asütsü asü, mesüra nisung kati yimsü asütsü. Nenok asoshi koba tajungba asütsü? Ano ya bilemtetang ni nenok shi aser azü lir.”

³Kodang par kinungertemi item o ajak pa atema Shekem nunger ajak dang jembia, parnok mulung Abimelek tsütsü meyip, kechiaser parnoki ashi, “Pa asenok adianu lir.”

⁴Anungji parnoki pa nem Baal-berith tekülemdak nungi taribi Shekel neter agütsü, aser Abimeleki iba jagi tagidak makaba samesa nisungtem pa sülen anitaktsü taa agütsü.

⁵Idangji pai Ofra nung tebuer kidangi ao aser pa adianutem Yerub-Baal chirtem nisung neter lung ka manung tepset, saka Yerub-baal chir tanubusang Yotham anüng kechiaser pai atsükadok.

⁶Aser Shekem aser Beth-millo senso ajak Shekem nung sülemdong tongshi anasa Abimelek chuba kümdaktsütsü asoshi atenshi.

⁷Kodang aji Yotham dang ashi, Pai Gerizim tenem kolak nung noktak aser parnok dang ayimtena ashi, “Shekem sensopurtem kü dang angang, anungji Tsüngremi nenok dang angatsü!

⁸“Kenü anogo süngdongtemi parnok madak yimsü südaktsütsü asoshi chuba ka mezüja shimtettsü ao. Parnoki oliv süngdong dang ashi, ‘Na onok chuba sangma.’

⁹Saka oliv süngdongi parnok dang langzü, ‘Kü totzü koba agi Tsüngrem aser nisung tetushi angur, aji toktsür süngdongtem manung ayipshitsü ni odi ma?’

¹⁰Idangji süngdongtemi mungu zünudong dang ashi, ‘Na arung aser onok chuba sangma.’

¹¹Saka munguzünudongi parnok dang langzü, ‘Kü süngjang tajung aser tanang ya toktsür, süngdongtem manung ayipshitsü ni odi ma?’

¹²Aser süngdongtemi tsükmenatzü dong dang ashi, ‘Na arung aser onok chuba sangma.’

¹³Saka tsükmenatzü dongi parnok dang langzü, ‘Kü tsükmenatzü yi koba agi Tsüngrem aser nisung, peladaktsür aji toktsür süngdong manung ayipshitsü ni odi ma?’

¹⁴Tatemsa süngdongtemi jemben ayi dang ashi, ‘Na arung aser onok chuba sangma.’

¹⁵Aser jemben ayi jagi parnok dang langzü, Atangji agi nenoki ni nenok madak chuba shimer süra, ajangla arung kü akhüm nung nenoki temulung lemang; aji mesüra jemben-nü nungi mi adokdakjang, aser Lebanon cedar süngdongtem meyoktsü.”

¹⁶“Aji asünung, tang nenoki Abimelek chuba kümdaktsübaji asangsang aser shitakba agi süra, aser nenoki Yerub-baal aser par kinunger dang junga benshi süra, aser pa mapa alang inyak süra;

¹⁷kechiyong nenok asoshi kübui rara, aser pa taküm agi tenla-a inyak, aser Midian nunger ket nungi nenok kümzük;

¹⁸aser tanü nenoki kübu kinunger anema adoker, aser pa jabasotem lung ka manung dang nisung tenem ser metsü tepset, aser par kilitsür chir Abimelek ang Shekem senso madak chuba kümdaktsü. Kechiaser paji nenok sosem lir;

¹⁹tanü ajangla nenoki asangsang aser shitakba agi Yerub-baal aser par kinunger dang inyak süra, ajangla Abimelek dak pelashishia liang;

²⁰saka aji oda mesüra, Abimelek nungi mi adokdakjang, aser Shekem senso aser Beth-millo kidong meyokdakjang; aser Shekem senso aser Beth Millo kidong nungi mi adokdakjang aser Abimelek meyokdakjang.”

²¹Idangji Yotham tedi Abimelek tsübuba agi Beeri jena oa yangji ali.

²²Aser Abimeleki Israel madak küm asem chuba.

²³Tsüngremi Abimelek aser Shekem senso tsüngda nung temenen tanela ka yok; aser Shekem nungeri Abimelek dak ashikülak agi inyak.

²⁴Ya Yerub-baal chir neter dak teka aiba taa arutsü aser parnok zü par adianutem Abimelek dak atongtsü, shibai parnok tepset, aser Shekem nunger shirnoki pa adianutem tepsettsü ta tashi itdaktsü, iba asoshi lir.

²⁵Shekem nisungtemi pa anema tenem manung arü mendaktsü, aser ilenji aor ajak parnoki rakzükraktem; aser aji Abimelek dang ashi.

²⁶Aser Ebed chir Gaal par sosem den Shekemi ai; aser Shekem nisungtemi pa dak temulung alem.

²⁷Parnok alui ao, aser parnok tsükmenatzü lu nungi tsükmenatzü benden aser itemji menüngzük aser benjong yanglu, aser parnok tsüngrem kidangi ai, aser chia jema Abimelek atakatem.

²⁸Ebed chir Gaali ashi, “Abimelek shiba, aser asenoki pa tenzüktsüsa asenok Shekem nunger shiba ali? Pa Yerub-baal jabaso aser pa tongtipur Zebul masü no? Shekem tebu Hamor nenoki tenzükang; saka kechiba asenoki pa tenzüktsü?

²⁹Iba nisungtem kü ket nung lilasang! Idangjibo ni Abimelek agientsü. Aser pai Abimelek dang ashi, Ne temeranger telok tali kümdakjang aser adokang.”

³⁰Kodang yimti yimsüsür Zebuli Ebed chir Gaal o angashi, pa ain adokdaktsü.

³¹Aser pai Aruma nung Abimelek dangi osang abener yoka ashi, “Ajiang, Ebed chir Gaal aser par sosem Shekemi arua lir; aser ajiang, parnoki na anema yimti ajongmesodagi.

³²Anungji tang aonung oang, na aser ne den alir nisungtem, aser alu nung mita ata-a liang.

³³Aser anü adokli, yakta aramesoang aser yimti jagi nungoka iang; aser ajiang, kodang pa aser pa den alir nisungtem na anema adokdir, nai parnok dak na ajungba ka sang.”

³⁴Abimelek aser pa den aliba nisung ajak aonung aramesoa, Shekem anema telok pezüsü nung mita ata.

³⁵Aser Ebed chir Gaal adok aser yimti-i ailen süngkhüm nung noktak; aser Abimelek aser pa den alir nisungtem mita alidak nungi arameso.

³⁶Kodang Gaali nisungtemji angu, pai Zebul dang ashi, “Ajiang tenem kolaktem nungi nisungtem aludagi!” Aser Zebuli pa dang ashi, “Nai tenemtem akhümji nisung ama angur dang ar.”

³⁷Gaali tanaben jembi aser ashi, “Ajiang, linük tiyong nungi nisungtem arudar, aser telok kabo temezünger sülemdong tsütsülen nungi arudar.”

³⁸Idangji Zebuli pa dang ashi, “Asenoki tenzüktsüsa Abimelekji shiba ta nai ashiba to tangbo ne bang kong ali? Nai sensatsüba nisung itemi masü no? Tang oagi parnok den rara-ang.”

³⁹Anungji Gaali Shekem sensopurtem anir Abimelek den raratsü ao.

⁴⁰Abimeleki pa aria ao, aser süngkhüm ailen tashi tonga rara nungji nisung aika yirua lao.

⁴¹Aser Abimelek Aruma nung ali; aser Zebuli Gaal aser par sosem Shekem nungbo melitettsüsa aridok.

⁴²Tananü Shekem nungertem alui ao nungji ibaji Abimelek dang metetdaktsü.

⁴³Anungji pai pa nisungtemji anir telok asem küma lemsar alu nungji mita ata. Kodang pai nisungtemji yimti nungi adokya angu, pai parnok anema arameso aser parnok tepset.

⁴⁴Abimelek aser pa den aliba telokji tejakleni asüm aser yimti süngkhüm lenmang nungji noktaka alidang, telok anati alu nung alir ajak tepset.

⁴⁵Iba anogo tepiyong Abimeleki yimti anema rara; aser pai yimtiji agi, aser yangji aliba nisungtem tepset; aser pai yimtiji meshimeshia samatsü aser metsü proka toktsü.

⁴⁶Kodang Shekem sensopur lungki nung alirtemi aji angashi, parnoki El-berith tenla ki mitsai ai.

⁴⁷Aser Abimelek dang parnok ajak sentepa lir ta metetdaktsü.

⁴⁸Anungji pai pa den alir ajak anir Zalmon tenemi atu. Pai po ka bena aru aser süngdong nungi süngsang kar lepzüka yok, koba pai pa tapubang nung apulok, aser pa den alir nisungtem dang ashi, “Nenoki ni kechi inyakya angu, yamaji nenokia ilunga inyakang!”

⁴⁹Anungji nisung ajaki süngsangtem lepzük aser Abimelek sülen anitak. Parnoki itemji mitsa nungji nangoktsü aser idakji mi senoktsü. Anungji Shekem lungki mitsa nung aliba nisung ajak tetsür aser tebur meyi ka shi asü.

⁵⁰Idangji Abimelek Thebezi ao aser aji agi.

⁵¹Saka yimti telung nungji tashi tait mitsa ka liasü, koba nung yimti alir tetsür-tebur ajak jenok. Parnoki aji telunglen nungi shibang aser mitsa kilemi tuadok.

⁵²Abimeleki lungki jagi oa ibaji anema rara. Aser kodang lungki nungji mi senoktsütsü asoshi pa kishiji tonga ao,

⁵³ tetsür kati pa tekolak nung temenüngba lung ka ajonglokja pa tekolak jakreptsü.

⁵⁴Idangji pai yakta pa nok o nü abensang jar ashi, “Ne nok atsütetang aser ni tepsetang. Anungji parnoki kü indang tetsür kati pa tepset ta mashitsü.” Aser pa nok o nü abensangi pa nok atsüteta tsüngoktsü aser pa asü.

⁵⁵Kodang Israel nüburtemi Abimelek süogo ta angu, parnok pei kidangi oadok.

⁵⁶Yamaji pai tebuer chir neter tepseta tebu dang inyakba mapa tamajung asoshi Tsüngremi Abimelek temenen mang ayang, aser ano Shekem nunger mapa tamajung ajak parnok kolak nung Tsüngremi tsükdaktsü,

⁵⁷aser parnok madak Yerub-baal chir Yotham atakatem aru.