Read njo JUNGKAI ADOKBA 1 Bible Online

JUNGKAI ADOKBA 1 - njo bible

JUNGKAI ADOKBA 1

¹Yakta kechisa tataloktsü lir, aji Yisu Khristai pei tenzükertem dang sayutsü asoshi, Tsüngremi pa nem agütsüba jungkai adokba ya. Aser ya pai pei kotak tenyar agi yoka, pei tenzüker Yohan dang metetdaktsü.

²Pai Tsüngrem O aser Yisu Khrista kuli indang, aser pai kechi angu item ajak indang kuli agütsü.

³Shibai iba shin o zülua alibatem züngdir, aser zülua alibatem angashir aser benshidir, parnok tepelatsü kechiyong mapangji anasa lir.

⁴ Yohan nungi Asia nung aliba arogo tenet dangi: shiba tang lir, aser liasü, aser tarutsü lir, pa nungi aser chuba menden madang aliba tanela tenet nungi,

⁵ aser temulung lemtetba kuli tasürtem nungi tamasa asoba, aser alima chubatem madak yimsüsüba Yisu Khrista nungi, nenok dangi taochi aser tesünep sang. Shibai asenok meimer aser pei zü agi asen menen nungi asenok sala,

⁶ aser pai asenok chuba yimli ka kümdaktsü aser pei Tebu Tsüngrem atema putirtem kümdaktsü, pa dang sentsüwangshi aser yimsüsüba teti tatem maka sang. Amen.

⁷ Ajiang, pa mepet nung arur, aser tenük shiai aser shirnoki pa dak atsüng parnoki pa angutsü, aser alima kin ajaki pa asoshi mang ayimtsü. Hau, Amen.

⁸ “Ni Alfa aser Omega,” ta Kibuba Tsüngremi ashir. Shiba tang lir, aser liasü, aser tarutsü lir, aser ajak Takoksang, iba Kibuba Tsüngremi ashir,

⁹Ni Yohan, nenok adianu, aser Yisu timtem-tekangshi, yimli, aser taremzük nung nenok den lemsateper, Tsüngrem O aser Yisu kuli atema ni Patma asetkong nung liasü.

¹⁰Ni Kibuba anogo nung Tanela nung liasü aser jangzü ola ama, tulu ka ni kü sülen angashi.

¹¹Kobai ashir, “Nai kechi angur aji kaket ka nung züluang, aser arogo tenet: Efesa, Smerna, Pergama, Tiatria, Sardia, Filadelfia, aser Laodikia dangi züluang.”

¹²Aser kü den jembiba olaji reprangtsü ni meyip, ni kodang meyip hon agi yangluba milen atalokdak tenet ni angu.

¹³ Aser milen atalokdaktem tiyong nung nisung chir ka mesüka tetsüng tashi süpoksü semer, aser teku nung hon peremlen agi nair angu.

¹⁴ Pa kolak aser kuji san-züng aser rüjep ama temesüng liasü.

¹⁵ Pa tetsüng misem nung ronga aliba senti merang ama liasü; aser pa olaji tzü jenti arrürba ola ama liasü.

¹⁶Aser pa teka tajichi nung petinu tenet liasü, pa tebang nungi anatsü nok techira ka adok, aser pa tejakji anüngdang anü ama sentsüpranga sashi-sashia liasü.

¹⁷ Kodang ni pa angu, ni tasü ama pa tsüngdang lao; aser pai pei teka tajichi kü dak nemeta ashi, “Tetsübuma, ni tetenzük aser tatembang.

¹⁸Aser ni taküm alisang, ni tasü liasü, saka ajiang putusa putu ni taküm alir, aser tasüba o tasü yim na süngkhümrütsü kü ket nung lir.

¹⁹Anungji nai angubatem, tang alibatem aser tesülen kechi ataloktsüba lir itemji nai züluang.

²⁰Kü teka tajichi nung memetetba petinu tenet kechi nai angur, aser hon agi yangluba milen atalokdak tenet tetezüji ya alitsü; Petinu tenetji arogo tenet tenyartem lir, aser milen tenetji arogo tenet lir.”