Read njo JUNGKAI ADOKBA 10 Bible Online

JUNGKAI ADOKBA 10 - njo bible

JUNGKAI ADOKBA 10

¹Idangji mepet agi sobur tashi tait tenyar ka kotak nungi aluya ni angu. Pa kolak manung tongnüsen ka liasü; aser pa tejak anü ama; aser pa tetsüng mi tongshi ama liasü

²Aser pai pei teka nung kaketlong tila ka lapoka liasü. Pai pa tetsüng tajichi tzüyim manung aser tabelen ali nung ajemdak.

³Aser molusongzüi arrürba ama pai ola tulu agi ayimten. Pai kodang ayimten, tsüngmok teneti ola tulu adoka jembi.

⁴Kodang tsüngmok teneti ola adok, ni zülutsü renema liasü; saka ni kotak nungi ola kati ya shia angashi. “Tsüngmok teneti jembibaji temaitsü ajena shibanga yuang, aser otemji zülua teyu.”

⁵ Tzüyim manung aser ali nung noktakba tenyar shiba ni angu, pai pei teka tajichi kotaklen mekanga,

⁶anüng aser idakji kechisa lir, alima aser idakji kechisa lir, tzüyim aser idakji kechisa lir, item ajak yangluba shiba teti tatem makai taküm alir, pa agi joko menua malitsü ta azüngashi.

⁷Saka tenyar tenetbubai koba mapang nung jangzü aputsü renemtsü, iba ola anogotem nung Tsüngrem indang miima akabatem tatembang akümtsü, koba pa tenzüker ainkartem nem agütsü, iba miim oji abensa-a ataloktsü.

⁸ Kotak nungi koba ola ni angashi iba jagi tanaben kü den jembiba ni angashi, pai ashi, “Oang, tzüyim aser ali nung noktaka aliba tenyari koba kaketlong lapoker ama lir, nai aji bener arung.”

⁹Anungji ni tenyar dang jagi ao aser kaketlong tilaji kü nem kua ta pa dang asüngdang. Pai kü dang ashi. “Agiang aser ya chiang, iba yagi ne tepok taku kümdaktsütsü, saka ne bang nung ninang mojitzü ama tanang alitsü.”

¹⁰Ni tenyar ket nungi kaketlongji agizüka achi, aser kü bang nung ninang mojitzü ama tanang liasü, saka kodang ni ya achi kü tepok taku aküm.

¹¹Idangji kü dang ya ashi, “Nüburtem, kintem, oshitem aser chubatem jenti indang nai tanaben ainkar o jembitsüla.”