Read njo JUNGKAI ADOKBA 11 Bible Online

JUNGKAI ADOKBA 11 - njo bible

JUNGKAI ADOKBA 11

¹Idangji ajok mesüker tasadangba rangdong ka kü nem agütsü, aser kü dang ashi, “Aramesoang aser nai Tsüngrem tenla ki aser tenla sabangji asadangang, aser idakji tekülemertem züngdangang.

²Tenla ki kima tezülen kilempokjibo tokjang, ajibo tasadang kechiaser ajibo kintem nem agütsüogo, aser parnoki ita lir-ana temeshi yimtiji tetsüng agi ajemshitsü.

³Ni kü kulisür ana yoktsü. Parnoki anem sü abener, anogo meyi ka noklang ana aser roker shin o jembitsü.”

⁴ Item ya alima Kibuba madang noktaka aliba oliv totzü süngdong ana aser milendong anaji lir.

⁵Kari parnok yirutsünüra, parnok tebang nungi mi adoka parnok anemertemji meyoker; aser kari parnok yirutsünüra pa yamaji tepsettsüla.

⁶ Parnoki shina jembiba anogo nung tzünglu marudaktsütsü asoshi anüng shibangtsü parnok dak ain lir; aser kwiben parnoki tzü agi azü kümdaktsünüdir temerenshi wara ajak agi alima dak züknüdir, paibenji inyaktsü parnok dak ain lir.

⁷ Parnoki kodang pei kuli renemdir, idangji iba bonglang makaba ongken nungi kechi shiruru adokdir pai parnok den tongbang raratsü aser parnok koktettsü aser parnokji tepsettsü.

⁸ Tanela tsütsü amshiba Sodom mesüra Ijip ta ajaba yimti tulu, kong parnoki Kibuba-a kangki nung angenlok; iba yimti tulu yimdong nung parnok tasümangtem ontaka alitsü.

⁹Aser nüburtem, kidongtem, oshitem aser kintem rongnungi anogo asem ser tesadang parnok tasümangtem ajia alitsü; parnok tasümangtem leper nung ayutsü parnoki memelatsü.

¹⁰Aser alima nung alirtemi parnok indang pelateptsü, aser pelatepa kati ka nem sempet agütsüteptsü, kechiaser item ainkar ana jagi alima nung alirtem timtemdaktsütsü.

¹¹ Idangji anogo asem ser tesadang süir külen Tsüngrem nungi taküm agütsüba tangula parnok daki ait aser parnoki tetsüng agi noktak aser parnoki repranga alirtem madak tetsübu tulu adok.

¹² Idangji kotak nungi ola tulu kati parnok dang shia angashi, “Yagi atung!” Aser parnok anemertem madang parnok repranga lia mepet nung parnok kotaki atu.

¹³ Aser iba mapang nungi menoknok tulu anok aser yimti ter-sü nung ka chirep, aser menoknok jagi nisung meyi tenet tepset; aser tanüngbatemi tsübuseta kotaker Tsüngrem nem sentsüwangshi agütsü.

¹⁴Tanabuba aiataiji süiogo, ajiang, tasembuba aiataiji yakta arudagi.

¹⁵ Idangji tenyar tenetbubai pei jangzüji apu, aser kotak nung ola tulu adoka ashi, “Alima yimli asen Kibubar aser Khristar meyong yimli akümer, aser pai teti tatem makai yimsü asütsü.”

¹⁶Aser tamburtem metsür pezü shirnok Tsüngrem madang pei chuba menden nung mena liasü, parnoki pei sasa apudak aser Tsüngrem külem,

¹⁷aser parnoki ashi; “Oh tesüiba mapang nung aser tang aliba ajak Takoksang Kibuba Tsüngrem, onoki ne tenüng asanger, kechiaser nai pei ain tulu agi nai yimsü asütsü tenzükogo.

¹⁸ Kintemi ain adok, saka ne ain adokba anogo tongogo; aser tasürtem o bendangtsü mapang tongogo. Ne tenzükertem aser ne ainkartem aser temeshipurtem aser ne tenüng akhüm tsüburtem tulu-tila na ajak nem sempet agütsütsü, saka alima raksatsürtem samatsütsü asoshi mapangji tongogo!”

¹⁹ Idangji kotak nung aliba Tsüngrem tenla ki lapok, aser pa tenla ki nungji tezüngzüktepba Ozüng Süngden angu, aser tsüngpret pretba, tsüngmok olatem aser menoknok, rür tsükba yipru tulu adok.