Read njo JUNGKAI ADOKBA 12 Bible Online

JUNGKAI ADOKBA 12 - njo bible

JUNGKAI ADOKBA 12

¹Idangji kotak nung temaitsü tulu ka adok; tetsür ka anü sobur aser la tetsüng kübok ita lir, aser la kolak nung petinu terana aketba korang ka semer liasü.

²La mashisa liasü aser nu amungtsü asoshi nuso ashitsü atua ayimten.

³ Ano kotak nung temaitsü tanga ka adok, ajiang, tekolak tenet aser tezü ter tener ngüm molutzürang temerem tulu ka liasü; aser pa kotak nung chuba korang tenet sema liasü.

⁴ Pa tepen agi anüng petinutem asemsü nung ka atsüa arur alima nung tsükdaktsü. Aser tanur tasor aliba tetsürlai tanurji soli-i, lar chir meyoktsü asoshi iba ngüm molutzürang la jakdang noktak.

⁵ Iba tetsüri tebur chanu ka shibai merang ajok agi kintem ajak madak yimsü asütsüba lir pa aso; iba techirji Tsüngrem aser pa chuba menden dangi aniket.

⁶Iba tetsürji anogo meyi ka noklang ana ser roker tashi parnoki la mesütsü asoshi, koba arem nung Tsüngremi renema ayuba tesem ka lir, iba arem jagi jena ao.

⁷ Aser kotak nung tongbang rara liasü; Mikael aser pa kotak tenyartemi ngüm molutzürang den raratsü ao. Aser iba ngüm molutzürang aser pa tenyartemi rara;

⁸Saka parnoki makok nung parnok talidak kotak nung joko mangu.

⁹ Aser iba ngüm molutzürang tuluji tsükdaktsü; oda Mojing aser Satan ta ajaba koba tejen peri alima ajonga külakoktsü, paji aser pa den pa tenyartem alima nung tsükdaktsü.

¹⁰ Aser ni kotak nung ola tulu kati shia angashi, “Tang tekümtet aser ain, asen Tsüngrem yimli aser Khrista bangdak aruogo; kechiaser asen adianutem nem tai agütsüba kobai mangali sangwali asen Tsüngrem madang parnok anema tai agütsür, pa tsükdaktsüogo,

¹¹Kechiyong parnoki San chanu zü, aser parnok pei kuli o agi paji kokogo; kechiaser parnoki tasüba tonga pei taküm mapayu.

¹²Anungji Oh kotak, aser nenok idakji alirtem, nenoki pelatepang. Saka alima aser tzüyim asoshi aiatai tejashitsü lir, kechiaser Mojing, nenok dangi aluogo; pa mapang tatsüka dang ta meteta, pai kanga ain aiter.”

¹³Aser ngüm molutzürangi pa alima nung tsükdaktsüba ngua, tebur chanu ka asoba tetsürlaji arishi.

¹⁴ Saka iba tetsürla per nungi pila-a aremleni pei talidaki yima aotsü asoshi la nem mongzü tulu tashikang ana agütsü; idakji la oa iba per tejak nungi miima küm asem ser tesadang tashi mesü.

¹⁵Aser iba tetsürji tzülok agi punga odaktsütsü asoshi, la sülen peri pei tebang nungi ayong ama tzü adokdaktsü.

¹⁶Saka ali-i tetsürla yaria pei tebang lapoka, ngüm molutzürangi tebang nungi yokba ayongji meyoka adok.

¹⁷Idangji ngüm molutzürangi tetsürla dang ain kanga adok, aser pai tetsürla tanüngba chirtem, oda Tsüngremer temelaba ozüng benshirtem aser Yisu kuli ametertem den raratsü ao.

¹⁸Aser pai tzüyim lisem manung noktak.