Read njo JUNGKAI ADOKBA 13 Bible Online

JUNGKAI ADOKBA 13 - njo bible

JUNGKAI ADOKBA 13

¹ Idangji tzüyim nungi shiruru ka dak tezü ter aser tekolak tenet tener adokya ni angu. Iba tezü nung korang ter aser iba kolaktem nung tatalaba tenüngtem zülua liasü.

² Shiruru koba ni angu aji morok keyi mesüker, iba tetsüng shirem tetsüng mesüker, aser iba tebang molusongzü bang mesüka liasü. Aser ngüm molutzürangi pei tashi pei chuba menden aser pa bangdak tulu pa nem agütsü.

³Aser pa tekolaktem rongnung ka, tasü küma azükba ama ni angu, aser pa tasütsü zübu aneb nung, alima ajongai iba shiruru indang süngmanga iba shiruru sülenji alima ajonga anitak.

⁴Aser parnoki ngüm molutzürangji külem, kechiaser iba shiruru nem pei bangdak tashiji agütsü. Aser parnoki shiruruji külema ashi, “Iba shiruru mesükba shiba lir? Aser pa anema shibai raratettsü?”

⁵ Iba shiruru nem asüküm o tululu aser tatalaba otem jembitsü tebang agütsü, aser ita lir-ana tashi inyaktsü pa nem bangdak agüja liasü.

⁶Aser pai pei tebang lapoka Tsüngrem anema atalaba o agi pa tenüng aser pa talidak aser kotak nung alir ajak atalatsü tenzük.

⁷ Aser Tsüngrem nübur temeshipurtem den raratsü aser parnok akoktsü aser pa nem kidong, nübur, oshi aser kin shia madak bangdak agüja liasü.

⁸ Aser alima meyangludang nungi tetepsetba San Chanu taküm kaket nung alima nung alir ajak shirnok tenüng zülua mali parnoki iba dang külem.

⁹Shiba tenarong aten pai angang.

¹⁰ “Nisung kar tepuoktsü lira, pa tepuokba tiai aitsü; nisung kar nok agi lepsettsü lira, pa nok agi lepsetdaktsütsü. Idakji temeshipurtem asoshi taremzük aser tamang tenüngdaktsü.”

¹¹Idangji san chanu ka ama tezü ana tener aser ngüm molutzürang ama jembiba tanga shiruru ka ali nungi adokya ni angu.

¹²Mezüngbuba shiruru bangdak ajakji iba yagi pa madang amshir. Iba yagi alima aser idakji alir ajak nem mezüngbuba shiruru koba zübu anebadoker ali, ibaji külemdaktsü.

¹³Aser pai nisungtem madang kotak nungi mi aludakja temaitsü tulu inyaka sayur.

¹⁴Aser shiruru madang koba temaitsütem inyaktsü asoshi pa nem agüja liasü; item agi pai alima nung alirtem külakoktsü; aser pai koba shiruru nok zübu aket aser kümtet, pa süngyanglu ka yanglutsü alima nung alirtem dang pai ozüng agütsü.

¹⁵Aser iba shiruru süngyanglu jagi o jembitettsü, asoshi, shiruru süngyanglu nemji taküm tangula agütsütsü asoshi pa nem ain agütsü.

¹⁶Pai tulu aser tila takar aser sensaker, nüji aser alar, item ajak teka tajichilen mesüra tenütsü nung temaitsü ajendaktsü.

¹⁷Aser iba temaitsü, oda iba shiruru tenüng, mesüra pa tenüng yongsük shiba maka, pai alitsü mesüra ayoktsü makoktsü.

¹⁸Idaki shisatsü lir. Shiba tangatettsü aka pai iba shiruru yongsükji züngdangang; kechiaser ya nisung ka yongsük lir, aser pa yongsükji noklang trok ser roker trok.