Read njo JUNGKAI ADOKBA 14 Bible Online

JUNGKAI ADOKBA 14 - njo bible

JUNGKAI ADOKBA 14

¹Idangji ni reprang, aser ajiang San Chanuji Zion tenem nung noktaka liasü; aser pa den meyi noklang ka ser lir pezü, parnok tenütsü nung pa tenüng aser Tebu tenüng zülua liasü.

²Aser kotak nungi tzü jenti arrürba ola ama aser tsüngmok ola tulu ama ola ka ni angashi; aser ni angashiba olaji kongki awartemi kongki aika sashia awar ama liasü.

³Chuba menden madang aser shiruru pezü madang aser tamburtem madang parnoki ken tasen tenya liasü. Aser alima nungi alangzükbatem meyi noklang ka ser lir pezü dak alema shingaia iba kenji angazüktsü mokoki liasü.

⁴Parnokji pei sasa tetsürtem den memerük maküm, kechiyong parnokji tasüngtetpurtem. San Chanuji kolenisa odir parnoki pa sülen anitaka aor. Tsüngrem aser San Chanu atema parnokji nisungtem rongnungi mezüng tangzükba süngjangtem ama lir.

⁵ Parnok tebang nung tiyazüji mangu; kechiaser parnokji pungmen maketbatem lir.

⁶Aser anüng tiyong nung tenyar tanga ka yimzüa ni angu. Alima nung alirtem kin, kidong, oshi aser nübu ajak madang sangoktsütsü, teti tatem makaba osangtajung pai bena lir.

⁷Aser pai ola tulu agi ashi, “Tsüngrem tsübuang, aser pa sentsü wangshidakjang, kechiaser pa obendangba mapang arua lir; aser kotak aser alima aser tzüpokdaktem ajak shibai yanglu pa külemang.”

⁸ Aser tangar tanabuba tenyari anitaka ashi, “Kobai pei nüktapangta ain adokba yi kin ajak nem jemdaktsü, iba Babilon tulu laogo, laogo.”

⁹Aser tasembuba tenyari parnok sülenji anitaka ola tulu agi ashi, “Shirisa iba shiruru aser süngyangluji külemdir, aser pei tenütsü nung mesüra teka nung temaitsü ajenbaji agizükdir,

¹⁰ Tsüngrem ain adokba marok nung, pa ain adokba yi, koba memeyoktepi jung junga renema lir, aji paia ajemtsü aser Temeshi tenyartem aser San Chanu madang mi aser mitsüktsü mozü agi pa kangshitsü.

¹¹ Aser parnok timtem mokozü teti atur; aser shirnoki iba shiruru aser pa süngyanglu külemer, aser pa tenütsü temaitsü ajenba agizük, mangli sangwali parnok anisüngzük maka.”

¹²Idaki temeshipurtem shirnoki Tsüngrem ozüngtem benshir aser Yisu dak tamang ayuba akanga azüita alirtem asoshi taremzük ayutsü nüngdaker.

¹³Aser kotak nungi ola kati shia ni angashi, “Züluang tang nungi shirnok Kibuba nung asü parnok tepelatsü.” Tanelai ashir, “Hau, Parnok belema inyakba nungi anisüngzüktsü, kechiyong parnok mapa parnok den anidaker.”

¹⁴ Aser ni reprang aser mepet temesüng ka angu; aser iba mepet manung nisung chir mesüker ka mena ni angu. Pa kolak nung hon korang semer aser teka nung ninok techira ka liasü.

¹⁵Aser tenla kidang nungi tenyar tangar ka adoka, mepet nung mena aliba dang ola tulu agi ayimtena ashi, “Ne ninok yokang, aser ruang, kechiyong tarutsü mapang tongogo, kechiaser alima alurutsü tongogo.”

¹⁶Idangji mepet nung amenbai alima nung pei ninok yok, aser alimaji aru.

¹⁷Kotak nung aliba tenla kidang nungi ano tenyar tanga ka adok. Pa teka nunga ninok techira ka liasü.

¹⁸Aser mi madak, ain akaba tenyar tanga ka tekülemdak nungi adok, aser pai iba ninok techira amba dangji ola tulu agi ayimtena ashi, “Ne ninok techiraji yoka, alima tsükmenatzü tezü tejeptemji bendenang; kechiyong pa süngjang junga menogo.”

¹⁹Anungji iba tenyari alima nung pei ninokji yok, aser alima tsükmenatzü benden, aser Tsüngrem ain adokba tsükmenatzü ajetzükdak tulu temenüngdakji enok.

²⁰ Aser yimti tezülen iba temenüngba ajemshi, aser temenüngdak nungi azü adoka kor lakem tonga tua mile noklang ana tashi ayimsünga ao.