Read njo JUNGKAI ADOKBA 16 Bible Online

JUNGKAI ADOKBA 16 - njo bible

JUNGKAI ADOKBA 16

¹Idangji tenla kidang nungi tenyar tenet dangji yamai ola tulu kati ashiba ni angashi, “Oang aser Tsüngrem ain adokba terasaba marok tenetji alima nung meküplokjang.”

² Anungji mezüngbuba tenyarji ao aser marokji alima nung meküploktsü; aser shiruru temaitsü ajena akaba aser iba süngyanglu külemertem dak tetsübutsü aser tangotsü komo adok.

³Tanabuba tenyar jagi pa marok tzüyim nung meküploktsü, aser aji nisung tasü azü ama aküm, aser tzüyim nung aliba taküm shiruru ajak asü.

⁴ Tasembuba tenyar jagi pa marok ayongtem aser tzüpokdaktem nung meküploktsü; aser itemji azü aküm.

⁵Aser tzütem nung aliba tenyari yamai shia ni angashi. “Oh na Temeshiba, shiba lir aser liasü Ne obendangbatem nungji na ochi lir.

⁶Kechiaser parnoki temeshipurtem aser ainkartem azü tokshitsü aser naia parnok nem tajemtsü azü agütsü.”

⁷Aser tenla sabangi ya ashiba ni angashi, “Hau, Oh Ajak Takoksang Tsüngrem, Kibuba, ne obendangbatem chichiba aser ochi lir.”

⁸Pezübuba tenyari pa marok anü nung meküploktsü; aser nisungtem ajak dak mi ama rongdaktsütsü tashi pa nem agütsü.

⁹Anungji nisungtem dak tatsük tesashi agi rongloka apu, aser item temerenshi madak ain akaba Tsüngrem tenüng anema parnoki atala; saka parnoki temulung memeyip aser pa nem sentsüwangshi magütsü.

¹⁰ Pungububa tenyari shiruru chuba menden nung pa marokji meküploktsü, aser pa yimli tammang aküm. Parnoki tekangshi agi pei temeli metepshi,

¹¹aser parnok timtem tekangshi aser komo atema kotaker Tsüngrem anema atala, saka parnoki pei mapatem nungi temulung memeyip.

¹² Trokbubai pa marokji Eufrata ayong tulu nungji meküploktsü, aser anüdoklen nungi aruba chubatem lenmang renemtsütsü asoshi iba ayong tzüji kongadok.

¹³Idangji ngüm molutzürang tebang nungjagi, aser shiruru tebang nungjagi aser tiyazü ainkar tebang nungjagi memerükba temenen tanelatem, allutem mesüker adokya ni angu.

¹⁴Kechiaser parnokji temenen tanelatem aser parnoki sayatenya temaitsütem inyak. Aser ajak Takoksang Tsüngremer anogo tulu nung tongbang raratsü asoshi alima chubatem ajak külemi sentepdaktsütsü parnok dangi ao.

¹⁵ “Ajiang, ni auür ama arur. Shibai mangsa mejajatsü aser maksü mangutsü asoshi saksalema alir aser sobutsü renema ayur pa tepelatsü.”

¹⁶ Aser Ibri o nung Armageddon ta ajaba tesem ka nung parnoki parnokji sentepdaktsü.

¹⁷Aser tenetbuba tenyari pa marokji mopung nung meküploktsü; aser tenlaki chuba menden nungi ola tulu ka adoka ashi, “Ya renemogo.”

¹⁸ Alima nung nisung lili nungi kodanga matalokdangba menoknok tulu, tsüngpret pretba, tsüngmok ola tulutem liasü.

¹⁹ Yimti tulubaji asemsü küma lemdang, aser kintem yimtitemji chirepa lao; aser Tsüngrem ain adoka tesashi yi marok iba Babilon tulu nem agütsütsü asoshi Tsüngrem madang paji bilemtetogo.

²⁰ Aser asetkong ajak jena ao, aser tenemtem joko mangu.

²¹ Kotak nungi seret tenem-nem shi taret rür nisungtem dak tsük aser temerenshi atema nisungi Tsüngrem atala kechiyong iba temerenshiji kanga tulu liasü.