Read njo JUNGKAI ADOKBA 17 Bible Online

JUNGKAI ADOKBA 17 - njo bible

JUNGKAI ADOKBA 17

¹ Idangji marok tenet amba tenyar rongnungi ka aru aser kü den jembia ashi, “Yagi arung, tzü jenti manung mena aliba nüktapangtala tulu anema o bendangbaji ni ne dang sayudi.

²Alima chubatemi la den jabujari benshi aser alima nung alirtem la jabujariba yi agi mesep.”

³ Idangji pai ni Tanela nung aremi anir ao aser Tsüngrem atalaba tenüng agi sünga aliba tekolak tenet aser tezü ter aketba shiruru temerem ka nung mena aliba tetsür ka ni angu.

⁴ Iba tetsürji nakrema meremba aser temerem sobutsü sobur, aser hon aser senti lung aser berem azüker liasü. Aser la teka nung tesempatsütem aser la jabujari memerükba oset agi sünga hon marok ka liasü:

⁵La tenütsü nung miim o tetezü aketba tenüng ya zülu liasü: “BABILON TULU JABUJARIRTEM ASER ALIMA TESEMPATSÜTEM TETSÜDI.”

⁶Aser iba tetsürji temeshipurtem azü aser Yisu atema tepsetbapur azü agi mesepba ni angu. Kodang ni la angu, ni kanga süngmangadok

⁷Saka tenyar jagi kü dang ashi, “Nai kechiba süngmanger? Iba tetsür aser la bener jajaba tekolak tenet aser tezü ter atenba shiruru indang miim o ni ne dang shidi.

⁸ Nai kechi shiruru angu, la liasü, saka tang mali. La bonglang makaba ongken nungi adoktsü, aser tesamadaki aotsü anasa lir, aser alima yangludang nungi taküm kaket nung shirnok tenüng mali, item alima nung alirtemi iba shiruru koda liasü, saka tang mali aser tarutsü lir, pa kodang ngudir parnoki süngmangtsü.

⁹Idaki shisatsü akaba tetezü lir. Tekolak tenetji tenem tenet; koba manung tetsürji mena lir.

¹⁰Itemji chuba tenet lir; parnok pungubo lao-ogo, ka tang lir. Tangarji ano maru, aser kodang pa arudir pa kenpiga dang alitsü.

¹¹Aser koba shiruru liasü aser tang mali paji tibuba, aser pa parnok rongnung ka aser pa tesamadaki aotsü.

¹² Nai anguba tezü terji chuba ter lir; parnoki ano chuba yimli tashiji magizük, saka ghonda ka asoshi shiruru denji parnoki chuba bangdak agizüktsü.

¹³Parnoki temulung ka sür parnoki pei tashi aser bangdak iba shiruru nem agütsür.

¹⁴Parnoki San Chanu anema raratsü, aser San Chanui parnokji akoktsü, kechiaser pa kiburtem madak Kibuba, chubatem madak Chuba. Aser pa den alirtema, oda shir jatetba aser temulung lemtetbapur lir, parnoki akoktsü.”

¹⁵Idangji tenyar jagi kü dang ashi “Nai koba tzütem angu, oda kong nüktapangtala mena liasü, itemji nüburtem aser teloktem, kintem aser oshitem lir.

¹⁶Nai anguba tezü ter aser shiruru jagi nüktapangtala sempatsü; parnoki la azünga aser mangsa kümdaktsütsü, aser la shi achitsü, aser la mi agi ajonga rongtoktsü.

¹⁷Kechiyong Tsüngrem O matalok tashi la sünütsü, asütsü, aser temulung ka küma parnok yimli shiruru nem agütsütsü Tsüngremi parnok temulung nung yutsü.

¹⁸Aser koba tetsür nai angu, la alima chubatem madak yimsü asüla yimti tuluji lir.”