Read njo JUNGKAI ADOKBA 18 Bible Online

JUNGKAI ADOKBA 18 - njo bible

JUNGKAI ADOKBA 18

¹Item süir külen ni bangdak tashi tulu anguba tenyar tangar ka kotak nungi aluya angu; aser pa sentsüwangshi agi alima tesangwa aküm.

²Aser pai tashi agi ayimten: “La lao-ogo, lao-ogo Babilon tulu lao-ogo! La temenen tanelatem alidak kümogo; memerükba tanelatem memerükba aser tesempatsü ozü-sangnu amungdak la kümogo.

³ Kechiyong kin ajak la jabujariba ain adokba yi agi mesepogo, aser alima chubatemi la den shi jabujari benshiogo; aser lar lalushibong agi shishirtem takar kümdaktsüogo.”

⁴Idangji kotak nungi tanga ola ka ni angashi, “Kü nüburtem, nenoki la temenen den melemsateptsü asoshi, aser la temerenshi magizüktsü asoshi la nungi pila-a adokang.

⁵ Kechiyong la temenentem anüng tonga nangtenogo, aser lar temenentem Tsüngremi bilemtetogo.

⁶ Lai kechi koda agütsü aji oda la nem shia agüjang, aser la mapa yari la nem anasü nung anasü shia agüjang, aser koba marok nung lai meyoktepa renem, iba marok nung la nem anasü meyoktepa renemjang.

⁷Lai mezümeküma aser lalushibonga benshiba ama, patakaji la nem tekangshi aser tajebtsü agüjang, kechiaser lai pei temulung nung ashir, ‘Ni chubatsür lir; ni amitsürla masü, ni mangyimba kodanga mangutsü.’

⁸Anungji tasüba, mangyimba, ayawara item ajak la dangi kenüyongi arutsü, aser la mi agi rongtoktsü; kechiaser la obendanger Kibuba Tsüngrem tashi tait lir.”

⁹Alima chubatem shirnoki la den nüktapangta benshi aser jabujaria ali; kodang parnoki la arongba mokozü angu, la atema jeba mang ayimtsü,

¹⁰aser la kangshiba tsübu nung, parnoki talang nung noktaka ashitsü “Aiatai! Aiatai! Yimti tulula Babilon yimti tashi taitla! Ghonda ka nung ne obendangba aruogo!”

¹¹Aser alima shishirtemi la asoshi ajeber aser mang ayimer, kechiyong parnoki shishilembatsü makok,

¹²oda hon, taribi, senti lung, berem, sü tanük tajung, nakrema meremba sü, lota sü, temerem sü, süngya yintsü, shidi tepu agi yangluba kechisarena, aser marbel agi yangluba kechisarena;

¹³süngshi, aon menemtsü, aser liangmesen teronem totzü, mesen, yi totzü, am tanük, item nisung shingai malir.

¹⁴“Aser ne tanelai azüabungba süngjangtem na nungi ogo aser tobur tajung aser sentsüprang osettem na nungi sama-a ogo, joko itemji kodanga mangutsü.”

¹⁵Shishirtemi item oset ayok, shirnok la agi takar kümdaktsü, saka parnoki la timtemba ngua oji nung noktaktsü, aser la atema parnoki mang ayimtsü,

¹⁶aser ashi, “Sü tanük, nakrema meremba aser temeremso, hon aser senti lung, aser berem agi sobuba iba yimti tulula, Aiatai! Aiatai! Aiatai!

¹⁷Kechiaser ghonda ka nung item oset ajakto samaogo.” Aser rong kiburtem aser rong agi külen küleni aortem aser rong nung inyakertem, aser kwikati tzüyim nung inyaka chiyungtsü angur,

¹⁸parnok ajaki ojita noktaker, la arongba mokozü ngur ayimtena ashi, “Iba yimti tulu mesüka kechi yimti ali?”

¹⁹Aser parnok kolak nung auyi paloka jeba mang ayim, aser ashi. “Kong rong kiburtem la rongsen tulu agi takar aküm. Aiatai! Aiatai! Aiatai! Kechiaser ghonda ka nung la samaogo!

²⁰ Kotaki pela-ang, nenok temeshipurtem, tenyartem aser ainkartem, la teraksaba nung pela-ang. Kechiyong nenok asoshi Tsüngremi la madak o bendangogo.”

²¹Idangji tenyar tashi tait kati temenüngba lungpak tulu ama lung ka ajunga arur tzüyim nung ajungokja ashi, “Babilon yimti tuluji tashiyim agi laodaktsütsü, aser joko kodanga mesaktsü.

²²Aser kongki awartem o ken tenertem ola, jemji aser jangzü apurtem ola na nungi kodanga mangashitsü; aser temenüngba ola ne dak kodanga mangashitsü.

²³Ne dak milen tesangwa kodanga madoktsü; kiyimba aser kiyimla ola ne dak kodanga mangashitsü. Kechiaser ne shishirtemji alima tongtipurtem liasü; aser ne temezünger mapatem agi kin ajak ashioktsüogo.

²⁴ La dak ainkartem azü angu, aser Tsüngrem nübur züji angu; aser alima nung tepsetba zü iba yimti nung nguogo.”