Read njo JUNGKAI ADOKBA 19 Bible Online

JUNGKAI ADOKBA 19 - njo bible

JUNGKAI ADOKBA 19

¹Item süir külen kotak nung aliba telok tulu ola ama adoka ni angashi. “Haliluya! Tekümtet, aser sentsüwangshi, aser ain asen Tsüngrem meyong lir, kechiyong pa o bendangba ochi aser temeshi;

²kechiaser koba nüktapangtalai pei nüktapangta mapa agi alima menentsü, pai la o bendang, aser nüktapangtala teka agi tepsetba Tsüngrem tenzükertem azü mang yangogo.”

³Aser parnoki tanaben ashi, “Haliluya! La mokozü teti tatem makai atur.”

⁴Aser tamburtem metsür pezü aser taküm shiruru pezü jagi chuba menden nung amenba madang apudak aser Tsüngrem külem, aser parnoki ashi, “Amen, Haliluya!”

⁵ Aser chuba menden nungi ola ka adoka ashi, “Tsüngrem tenzükertem aser pa tsüburtem, nenok tulu tila ajaki asen Tsüngrem tenüng sangang!”

⁶Idangji telok tulu ka ayimtenba ola ka ama ni angashi, aser tzü jenti arrürba ola ama aser tsüngmok tashi agi amokba ola ama liasü, aser ashi, “Haliluya! Kechiaser Ajak Takoksang, asen Kibuba Tsüngrem chubar.

⁷Asenoki lungsoa pelatepdi, aser pa nem sentsüwangshi agütsüdi, kechiaser San Chanu kiyimba mapang tongogo, aser pa kinungtsü pei sasa renema lir.

⁸Sü tanük, sentsüprang aser temerük la sasa sobutsü asoshi Tsüngremi la dang mela-a kar, kechiyong sü tanükji temeshipur temeshiba mapa lir.”

⁹Idangji pai kü dang ashi, züluang, “San Chanu kiyir benjong jagi shirnoksa jaok parnok tepelatsü”. Ano pai kü dang ashi, “Item Tsüngremer ochi o lir.”

¹⁰Idangji pa külemtsü ni pa tsüngdang apudak, saka pai kü dang ashi, “Nungma, Ni ne külem tenzüker aser ne adianu rongnung ka lir, aser Yisu kulisüba abenertem lir. Tsüngrem tsüngdang apudakang.” Kechiyong Yisu kulisübaji tanela shin o lir.

¹¹Idangji Kotak lapoka ni angu; idakji kor temesüng ka liasü, aser iba manung amensang dang Temulung Lemtetba aser Ochiba ta aja, kechiyong pai temeshiba nung o bendanger aser rara.

¹²Pa tenükji milak ama, aser pa tekolak nung chuba korang aika liasü, Pa tenüng ka zülua lir koba pa dak alema shingai memetet.

¹³Azü nung aremba sobutsü ka pai sobua lir, aser pa tenüngji Tsüngrem O ta ajar.

¹⁴Aser kotak nung aliba temerangertemi sü tanük temesüng aser temerük sobur, kor temesüngtem nung mener, pa sülen anidak.

¹⁵Aser pai kintem dak azüktsü asoshi pa tebang nungi nok techira ka adok aser pai ajak Takoksang Tsüngrem ain tesashi adokba merang ajok agi parnok madak yimsü asütsü tsükmenatzü menünga pai ajemshitsü.

¹⁶Pa sobutsü aser pa tepi manung ta tenüng yamai zülua lir: “CHUBATEM MADAK CHUBATIBA ASER KIBURTEM MADAK KIBUBA.”

¹⁷Idangji tenyar ka anü nung noktaka ni angu. Anüng tom nung yimzüba ozüsangnu jakdang ola tulu agi ayimtena pai ashi, “Arung, aser Tsüngremer benjong tuluba dangi sentepang.

¹⁸Arung aser chubatem shi, tirtem, temerangertem shi, kortem aser item madak asangbatem shi meimchir ajak shi, alar aser nüji, tulu aser tila item shi chiang.”

¹⁹Idangji kor nung amensang aser temerangertem anema raratsü asoshi iba shiruru aser alima chubatem aser parnok temerangertem külemi sentepba ni angu.

²⁰Shiruru aser pa den koba tiyazü ainkari pa madang temaitsü inyak, aser item agi pai shiruru temaitsü agizükertem aser pa süngyanglu külemertem külakoktsü, parnok anaprongla apu, aser mitsüktsü mozü agi jangrua aliba misem nung taküm lia tenaprongla puok.

²¹Aser tanüngbatemji kor nung amenba tebang nungi adokba nok agi tepset; aser ozüsangnu ajaki parnok shiji jangratema achi.