Read njo JUNGKAI ADOKBA 2 Bible Online

JUNGKAI ADOKBA 2 - njo bible

JUNGKAI ADOKBA 2

¹Efesa nung aliba arogo tenyar dangi nai ya züluang: “Shibai pei teka tajichi nung petinu tenet amer, aser hon milen atalokdak tenet tiyong nung jajar, pai item o ashir.

²Ni ne indang ajak metet, ne mapatem aser nai meranga inyakba aser ne taremzükba; nai tamajungertem dang maremzüktetba, shirnoki pei sasa tenyartem ta ajar parnokji nai tendang, parnokji tenyartem masü, saka parnokji tiyazürtem ta nia angu.

³Aser na taremzük akaba aser kü nung atema aremzükba aser ania makümba item ajak ni meteta lir.

⁴Saka ne mezüng temeim nai toktsü nung na anema ni ya kar.

⁵Anungji na kechi nungi tsük aji bilemtetang; temulung meyipang aser mezüng inyakba mapatem inyakang. Aji oda mesüra ni ne dangi arua milendong pei talidak nungi agientsü.

⁶Saka nai aginübaji ya; oda nai Nikola teloki inyakba mapatem sempar, yamaji kasaji nia sempar.

⁷ Tanelai arogotem dangji kechi ashir shiba tenarong aten pai angang. Shibai akoker pa nem taküm süngdong koba Tsüngremer atsüki nung lir, iba süngjang achitsü agütsütsü.”

⁸ Smerna nung aliba arogo tenyar dangi ya züluang: “Shiba tetenzük aser tatembang, shiba sür shia aru, pai item o ashir.

⁹Ne timtem tekangshi aser ne sensak tia ni metet saka na takar lir! Aser shirnoki pei sasa Yihuda nungertem ta ashir aser parnokji Yihuda nungertem masü saka Satan sinagog lir, parnok tatalaba oji ni meteta kar.

¹⁰Na kechi timtem angutsü anasa lir, aji tetsübuma. Ajiang, nenok atidangtsü asoshi mojingi nenok kar tsüngden chiokdak puoktsü anasa lir, aser nenok anogo ter tashi timtem tekangshi alitsü. Nai tasü tonga aremang aser ni ne nem taküm korangji agütsütsü.

¹¹ Arogotem dang Tanelai kechi ashi shiba tenarong aten pai angang. Shibai akoker tanabuba tasübai pa mekangshitsü.”

¹²Pergama nung aliba arogo tenyar dangi ya züluang: “Shiba techira anatsü nok aka pai item o ashir.

¹³Na kong alir, oda kong Satan menden ali, aser nai kü kulisür Antipa, kü temulung lemtetba kulisür, tepsetba anogo nunga nai kü dak amangba menangzüki maliasü. Satan amungdak nenok rongnung pa tepset, item ni meteta lir.

¹⁴ Saka na anema ni o ishika lir, shibai Israel chirtem anema temetsükdaktsü yutsü, kechiaser na Balam tesayuba akanga ametbatem kar, koba süngyanglutem dang tenlaba osettem chidaktsütsü aser jabujaridaktsütsü Balak dang sayua liasü.

¹⁵Yamajisa Nikola telok tesayuba ametbatem nai ayur.

¹⁶Anungji temulung meyipang, aji mesüra ni ne dangi yakta arutsü, aser kü bang nok agi parnok anema rarateptsü.

¹⁷ Arogotem dang Tanelai kechi ashir shiba tenarong aten pai angang. Shibai akoker pa nem miima aliba mana achitsü ni agütsütsü; aser pa nem lung temesüng ka ni agütsütsü; aser iba lung nungji tenüng tasen ka koba tagizüksang dak alema shingaia memetet aji zülua lir.”

¹⁸Tiatria nung aliba arogo tenyar dangi ya züluang: “Shiba tenük milak ama aser shiba tetsüng senti merang ama, Tsüngrem Chiri item o ashir,

¹⁹“Ne mapatem, ne temeim, ne tamang, ne tenzükba, ne taremzük; aser ne mezüng mapatem dang nungi tesülen inyakbatem tajungba, item ni meteta lir.

²⁰ Saka ni na anema ya kar, kechiaser Yezebel koba tsüri pei sasa ainkerla ta shia kü tenzükertem dang jabujaritsü aser süngyanglutem dang tenlaba osettem achitsü sayur, nai la dang aremzüker.

²¹Temulung meyiptsü ni la nem mapang agütsü, saka lai pei shi jabujari nungi temulung meyiptsü memulunger.

²²Ajiang ni la toushiba yipten ka nung laodaktsür aser shirnoki la den nüktapangta benshidir, parnoki la mapa nungi temulung memeyipra, parnok timtem tekangshi tulu alitsü.

²³ Aser tasüba agi ni lar chirtem tepsettsü, aser ni mulungsentsü aser temulungjang bushiba lir ta arogo ajaki metettsü aser nenok nisung shia nem pei mapa yari agütsütsü.

²⁴Saka Tiatria nung anünga aliba kwikati iba tesayuba magizük, oda kari Satan meyong tarok mapatem ta ajaba shirnoki memetet, nenok dang ni ya ashir, nenok dak ni tanga khu kecha mebenloktsür.

²⁵Aji saka nenok kechi aka ni maru tashi ameta liang.

²⁶ Aser shibai akoker aser tatem tonga kü mapatem inyaker ni koda Tebu nungi angu pa nem kintem madak tashi-ain ni agütsütsü.

²⁷Pai merang ajok agi parnok madak yimsü asütsü aser alipo ama akusatsütsü.

²⁸Oda ni kü Bu nungi tashi-ain agizükba ama, ni pa nem atunütsük petinuji agütsütsü.

²⁹Arogotem dang Tanelai kechi ashir shiba tenarong aten pai angang.”