Read njo JUNGKAI ADOKBA 20 Bible Online

JUNGKAI ADOKBA 20 - njo bible

JUNGKAI ADOKBA 20

¹Idangji bonglang makaba ongken süngkhümrütsü aser merangsen tulu ka pa teka nung amer tenyar ka kotak nungi aluya ni angu.

²Pai iba ngüm molutzürang, oda tejen per, koba Mojing aser Satan lir, pa pua küm meyi ka asoshi alen,

³aser bonglang makaba ongken nungji puok, aser küm meyi kaji mabensa tashi pai kintem külakoktsütsü makoktsü asoshi, aji shibang, aser iba manung temaitsü ajen, iba sülen mapang tatsüka asoshi pa chioktsü.

⁴Idangji chuba mendentem ni angu, aser item nung amenbatem nem o bendangtsü tashi agütsü, Yisu kuli atema aser Tsüngrem o atema shirnok tekolak atang, aser shirnoki iba shiruru mesüra iba süngyanglu mekülem, aser shirnok tenütsü aser parnok teka nung temaitsü ajenba magizük, parnok angu. Aser parnok takümtem shia aru aser Khrista den küm meyi ka yimsü asü.

⁵Küm meyi kaji mabensa tashi tanüngba tasürtem shia maru. Ibai mezüngbuba shia arubaji alitsü.

⁶Mezüngbuba shia aruba nung shilem akartemji tepelatsü aser temeshi alitsü. Tanabuba tasübai item madak tashi-ain maka, saka parnok Tsüngrem aser Khrista putirtem akümtsü, aser parnok pa den küm meyi kaji yimsü asütsü.

⁷Aser kodang küm meyi kaji abensadir, Satan pa tsüngden chiokdak nungi chioktsü,

⁸Aser alima kinük pezüsülen aliba kintem, Gog aser Magog, shirnok yongsük tzüyim lisem ama, parnok külakokja, rarai sentepdaktsütsü asoshi pa arutsü.

⁹Parnoki temeshipurtem tanendak aser temeimba yimtiji meketbang; saka kotak nungi mi alu, aser parnok rongtok.

¹⁰Aser parnok külakokdaktsüba mojingji mi aser mitsüktsü mozü kangla nung, kong iba shiruru aser parnok mangli sangwali teti tatem makai kangshia alitsü.

¹¹Idangji chuba menden temesüng tulu ka aser iba manung amenba ni angu, pa jakdang nungi alima aser kotak jena ao; aser parnok asoshi talidak joko mangu.

¹²Aser chuba menden madangji tasür tulu aser tila ajak noktaka ni angu; aser kakettem lapok, aser tanga kaket koba taküm kaket lir aji lapok. Aser item kaket nung zülua aliba ama, tasürtem pei mapa amato o bendang.

¹³Tzüyimtemi pei dak aliba tasürtem bendanga agütsü, aser tasüba aser asüyimi pei dak aliba tasürtem bendanga agütsü; aser nisung shia pei mapa amato o bendang.

¹⁴Idangji tasüba aser asüyimji molumi nung enok. Iba ya tanabuba tasüba, oda mi kangla.

¹⁵Aser kar taküm kaket nung zülua mungura, pa molumi nung puoktsü.