Read njo JUNGKAI ADOKBA 21 Bible Online

JUNGKAI ADOKBA 21 - njo bible

JUNGKAI ADOKBA 21

¹Idangji kotak tasen aser alima tasen ka ni angu; Kechiyong mezüngbuba kotak aser mezüngbuba alima süitemogo; aser tzüyim joko mali.

²Aser pei kinungpu asoshi kiyimlai sobutsü sobuba ama renemer temeshi yimti, tasen Yirusalem, Tsüngrem nungi kotak nungi aluya ni angu.

³Aser iba chuba menden nungi ola tulu ka agi shia ni angashi, “Ajiang Tsüngrem süki nisung den lir, aser pa parnok den alitsü, aser parnok pa nübur akümtsü, aser pai pei sasa parnok den alitsü, aser parnok Tsüngrem asütsü.

⁴ Aser parnok tenük nungi nüktzü ajak pai aidoktsütsü; aser tasüba joko malitsü, mangyimtsü mesüra tajebtsü mesüra tekangshitsü joko malitsü. Kechiyong tejenbatem süitemogo.

⁵Aser chuba menden nung amenbai ashi, “Ajiang, ni ajak tasen yanglur.” Ano pai ashir, “Züluang, kechiyong item o tamangtsü aser ochi lir.”

⁶Idangji pai kü dang ashi, “Ya renemogo. Ni Alfa aser Omega, tetenzük aser tatem. Tzüraba nem taküm tzü Tzüpokdak nungi ni angati dang agütsütsü.

⁷Shibai akoker pai item senmang angutsü aser ni pa Tsüngrem akümtsü, aser pa kü chir akümtsü.

⁸Saka tasü maitertem tetsübuba, mamangba, tesempatsü nisung tepsetertem, jabujarirtem aser tiyazürtem, ajak mi aser mitsüktsü mokozü agi jangrua aliba molumi nung pei shilem angutsü, aser aji tanabuba tasüba asütsü.”

⁹Idangji tatembangba temerenshi tenet agi sünga aliba marok tenet amba tenyar tenet rongnung ka aru, aser pai kü den jembi. Pai ashi, “Arung, ni ne dang kiyimla, oda San Chanu kinungtsü sayudi.”

¹⁰Pai ni Tanela nung tenem tulu aser talang kati anir atu, aser temeshi yimti, Yirusalem, kotak nungi adoka Tsüngrem nungi aluba kü dang sayu.

¹¹Ibai Tsüngrem sentsüwangshi agi prangshia liasü. Pa tesangwa senti lung, temerük lungkonglapu mesüka liasü.

¹²Iba lung tsüki tulu aser talang aser süngkhümbong terana liasü, aser süngkhümbong nung Israel kidong terana tenüng zülua liasü:

¹³Anüdok süngkhümbong asem, aser anüdoktip süngkhümbong asem aser anüolen süngkhümbong asem aser anüolentip süngkhümbong asem liasü.

¹⁴Aser yimti lung tsükiji tazüngdak terana liasü aser idakji San Chanu tenyar terana tenüng zülua liasü.

¹⁵Iba yimti, süngkhümtem aser jara asadangtsü asoshi kü den jembiba ket nung hon rangdong tasadangba ka liasü.

¹⁶Iba yimtiji kinük pezü, lenten metong kasadang; aser pai rangdong jagi yimtiji asadang nung mile meyi ka noklang pungu liasü; lenten, metong aser talang kasadang.

¹⁷Pai lung tsükiji asadang nung nisung ka, oda tenyar meyong tasadangbaji süklep noklang ka ser lirpezü liasü.

¹⁸ Jaraji jasper agi yanglu, aser yimtiji hon temeja tanüdangtsü temerük mesüker liasü.

¹⁹Yimti lung jara tamentakdakji senti lung tapu ajak agi tobur junga yanglu. Mezüngbuba tamentakdakji jasper liasü, tanabubaji sapfir, tasembubaji chalcedony, pezübubaji emerald,

²⁰pungububaji sardonix, trokbubaji sardis, tenetbubaji chrysolite, tibubaji beryl, tukubabaji topaz, terbubaji chrysoprase, terkabubaji jacinth, teranabubaji amethyst.

²¹Süngkhümbong terana liasü, oda süngkhüm bong shiaji berem kaka agi yanglu. Yimti yimdongji sentsüprang tanüdangtsü ama hon temeja liasü.

²²Yimti nungji ni tenla ki kecha mangu; kechiyong Ajak Takoksang Tsüngrem aser San Chanuji iba tenla kiji lir.

²³Iba yimti nung anü mesüra ita sangwa tenüngdaktsü maka, kechiyong Tsüngremer sentsüwangshi jagi ibaji sangwadaktsü aser San Chanuji iba milen lir.

²⁴Kintemi iba tesangwa nung jajatsü, aser alima chubatemi parnok sentsüwangshi iba tiyongi bener arutsü.

²⁵Iba süngkhümbongtemji anüngdang kodanga meshibangtsü, kechiyong idakji aonung malitsü.

²⁶Parnoki kintem sentsüwangshi aser tetushi iba dangi bener aittsü.

²⁷ Saka langka memerükba mesüra tesempatsü benshiba, aser tiyazür shingaia ajagi kodakang maitsü; saka shir tenüngsa iba San Chanu taküm kaket nung zülua lir, parnok dang aitsü.