Read njo JUNGKAI ADOKBA 22 Bible Online

JUNGKAI ADOKBA 22 - njo bible

JUNGKAI ADOKBA 22

¹Idangji Tsüngrem San chanu chuba menden nungi adoka, lungkonglapu mesüker sentsüprang, taküm tzü ayong iba yimdong nung ayimba tenyar jagi kü dang sayu.

²Iba yimti yimdong tiyongji ajanga ayongji ayimer. Ayong ileni aser külenji taküm süngdongji lir, iba süngdong süngjang tapu ter-ana atanger, aser ita shia khen atanger, aser süngdong süngoji kintem anebtsü asoshi lir.

³Joko atakatem kaoba kecha malitsü. Iba tiyong nungji Tsüngrem aser San Chanu menden alitsü, aser pa tenzükertemi pa külemtsü;

⁴Aser parnoki pa jak angutsü, aser pa tenüng parnok tenütsü nung alitsü.

⁵ Aser joko aonung malitsü aser milen tesangwa mesüra anü tesangwa parnok asoshi tenüngdaktsü maka, kechiaser Kibuba Tsüngremji parnok tesangwa asütsü, aser parnoki teti tatem makai yimsü asütsü.

⁶Idangji tenyari kü dang ashi, “Item o tamangtsü aser ochi lir, aser yakta kechisa ataloktsü lir, aji pei tenzükertem dang sayutsü asoshi, ainkar tanelatem Tsüngrem Kibubai pei tenyar yok.”

⁷Yisui ashir “Ajiang, ni yakta arur, shibai iba kaket nung shinba otem anga-a benshir pa tepelatsü.”

⁸Ni, Yohani, item o angashi aser angu. Kodang ni item angashi aser angu, kotak tenyar shibai kü dang item sayua liasü pa külemtsü ni pa tsüngdang apudak.

⁹Saka pai kü dang ashi, “Yamaji nungma, ni ne den külem tenzüker ka lir aser ne adianu ainkartem rongnungi lir, aser iba kaket nung aliba otem tashi anga-a benshirtem rongnungi ka lir. Nai Tsüngrem tsüngdang külemang.”

¹⁰Aser pai kü dang ashi, “Iba kaket shin otem temaitsü ajena teshibang, kechiyong tabensaba mapang anasa lir.

¹¹ Tamajung inyakertem maneni tamajungsa inyakdakjang, memerüki alirtem memerükisa lidakjang, ochishiri ochisa inyakdakjang, aser temeshipurji temeshisa lidakjang.”

¹²Yisui ashir, “Ajiang, ni yakta arur, nisung shia pei mapa amato sempet agütsütsü aji kü den lir.

¹³Ni Alfa aser Omega mezüngbuba aser tesübuba, tetenzük aser tatembang.”

¹⁴Shirnok sobutsü shitok parnok tepelatsü; anungji parnoki taküm süngdong agitsü tashi ain angutsü aser süngkhümbongtem ajanga yimti jagi itettsü.

¹⁵Azütem, arasenertem, jabujarirtem, nisung tepsetertem aser süngyanglu külemertem aser tiyazü meimer aser tiyazü yanglurtem ajak yimti tezülen alitsü.

¹⁶“Ni, Yisui, arogotem asoshi nenok dang item kuli südaktsütsü kü tenyar yokogo. Ni Dawider tera aser pa nungi jakzükba, sentsüprang atunütsük petinu.”

¹⁷ Aser Tanela o kiyimla nati ashi, “Arung,” aser shiba angashir shidakjang, “Arung,” shiba tzürar arung, aser shibai takümtzü aginür, pa nem angati agidakjang.

¹⁸Iba kaket nung ainkar shin o-tem angashirtem shia dang ni kuli agüja ashir; Kari item nung langka bendenlokra, iba kaket nung zülua aliba temerenshitem pa dak Tsüngremi bendenloktsütsü;

¹⁹aser kari iba ainkar shin o kaket otem nungi langka endokra, iba kaket nung rateta zülubatem ama taküm süngdong aser temeshi yimti nungi Tsüngremi pa shilem endoktsü.

²⁰Shibai item kuli o agütsür pai ashi, “Hau, Ni yakta arur.” Amen, Kibuba Yisu, Arung!

²¹Kibuba Yisu taochi temeshipur[4] ajak den liang. Amen