Read njo JUNGKAI ADOKBA 3 Bible Online

JUNGKAI ADOKBA 3 - njo bible

JUNGKAI ADOKBA 3

¹Sardia nung aliba arogo tenyar dangi ya züluang: “Shiba Tsüngrem Tanela tenet aser petinu tenet aka pai item o ashir: Ne mapatem ni metet, oda tenüng agi na taküm lir saka na tasü.

²Na saksalemang, aser tanüngba kechisa tasü lir, itemji akangdakjang; kechiyong kü Tsüngrem madang ne mapa tabensa akümba ni kecha mangu.

³ Anungji nai kechi agizük aser angashi aji bilemtetang, aser benshiang, aser temulung meyipang. Anungji nai saksalema melira, ni auür ama arutsü, aser ni kodang ne dangi arutsü nai memetettsü.

⁴Saka shirnoki pei süoshi memenen, na Sardia nung ibala tenüng ishika lir. Aser parnoki sobutsü temesüng nung kü den jajatsü, kechiyong parnok tetemsü lir.

⁵ Shibai akoker pa aji oda sobutsü temesüng nung sobudaktsütsü; aser ni kodaka-ang pa tenüng taküm kaket nungi maidoktsü aser kü Bu madang aser pa kotak tenyartem madang pa tenüng ni nangzüktsü.

⁶Arogotem dang Tanelai kechi ashir, shiba tenarong aten pai angang.”

⁷ Filadelfia nung aliba arogo tenyar dangi ya züluang: “Shiba temeshi aser ochi, shiba ket nung Dawid süngkhümrütsü aka, shibai lapok nung shingaia meshibangteter, pai item o ashir.

⁸Ne mapa ni metet ajiang ni ne jakdang kishi ka koba shingaia meshibangtettsü aji lapoka yuja kar, oda ne tashi tera lir, aser kü o anga-a benshi, aser kü tenüng menangzüki mali.

⁹ Ajiang Satan sinagog purtem shirnoki pei dang Yihuda nunger ta ashi, aser parnok Yihuda nunger masü, saka tiyazü, aser ni ne dang meimogo ta parnok nem metetdaktsütsü.

¹⁰Nai kü taremzükba o anga-a benshi nung, koba tatitang mapang alima nung alir ajak dangi tarutsü lir, iba mapa nungi ni na kümzüktsü.

¹¹Ni yakta arutsü. Ne chuba korang shingaia merakzüktsü asoshi, na kechi aka aji akanga ametang,

¹² Shibai akoker pa kü Tsüngrem tenla kidang ni tongshi ka kümdaktsütsü, aser pa idak nungjagi joko maenshitsü, aser kü Tsüngrem yimti tenüng tasen Yirusalem koba kotak nungi kü Tsüngrem nungi alur, aser kü pei tenüng tasen ni pa dak zülutsü.

¹³Arogotem dang Tanelai kechi ashir, shiba tenarong aten pai aji angang.”

¹⁴ Laodikia nung aliba arogo tenyar dangi ya züluang: “Shiba Amen lir, Shiba temulung lemtetba aser ochi kuli shiba Tsüngrem teyangluba ajak madak tekolak lir, pai item o ashir.

¹⁵Ni ne mapatem metet, oda na temokonga masü, tatsüka masü. Na temokong mesüra tatsük asütsü ni mulunger

¹⁶Yamai na tatsüka masü, temokonga masü, telempet asünung, ni kü bang nungi na saktsüdoktsü.

¹⁷Ni takar rongsen nguogo, aser ni kecha anüngtsü maka ta nai ashi nung, saka nai ne timtemba, tekangshiba, sensaker, nükpok aser mangsa, ta nai memetet,

¹⁸aji nai memetet nung, na takar akümtsü asoshi mi nung molua temerük yangluba hon, aser mangsa aliba maksü, jungkai madokdaktsütsü asoshi, nai ne sasa sobutsü asoshi süoshi temesüng, aser tangutsü asoshi, ne tenük nung mezütsü mozü, ya ajak kü dang nungi aliang, ni ne nem iba shisa agütsür.

¹⁹ Kwika dang ni meimer parnok dang ni arütsür aser merenshir. Anungji nai jangra-a temulung meyipang.

²⁰Ajiang, ni kishi züng nung noktaker kishi nung akoshir, kari kü ola angashir kishi lapokra, ni pa dangi aittsü, aser pa den chiyunga ajemtsü, aser pai kü den chiyunga ajemtsü.

²¹Ni kechi koda koker kü Bu den pa chuba menden nung amener, aji oda shibai akoker pa kü den chuba menden nung ni mendaktsütsü.

²²Arogotem dang Tanelai kechi ashir, shiba tenarong aten pai aji angang.”