Read njo JUNGKAI ADOKBA 4 Bible Online

JUNGKAI ADOKBA 4 - njo bible

JUNGKAI ADOKBA 4

¹Item süir külen ni repranga yok aser ajiang kotak nungi kishi ka lapoka angu, aser mezüngbuba ola ni kechi angashi aji jangzü ola ka ama kü den jembia liasü. Iba ola jagi ashi, “Yagi atung, aser iba sülen kechisa tataloktsü lir aji ne dang sayudi.”

² Idangyongjisa ni Tanela nung liasü; aser ajiang kotak nung chuba menden ka liasü, aser chuba menden nungji ka mena liasü.

³Aser mena alisang tereprangtsüji jasper aser sardia lung ama liasü; aser chuba mendenji meketa tongnüsen ka tereprangtsü nung emerald lung mesüka liasü.

⁴Chuba mendenji meketa ano tanga chuba menden metsür pezü ni angu. Aser item chuba menden nungji tambur metsür pezü mena liasü. Parnokji sobutsü temesüng sobur aser parnok kolak nung chuba korang sema liasü

⁵ Aser chuba menden nungjagi tsüngpret prangshiba aser olatem aser tsüngmok ola adok. Chuba menden jakdangji milen tenet jangrua liasü, itemji Tsüngrem Tanela tenetji lir.

⁶Aser chuba menden jakdangji tanüdangtsü mesüka sentsüprang tzüyim ka ama liasü. Aser chuba menden tiyong nungji aser ibaji meketa aser tesülen tenükjang agi sünga zükbanger taküm shiruru pezü liasü.

⁷Mezüngbuba taküm shiruruji molusongzü mesüker, aser tanabuba shiruruji nashi pungchi chanu mesüker, aser tasembuba shiruruji nisung ama tejak tener; aser pezübuba shiruruji yimzüba mongzü mesüker liasü.

⁸ Aser taküm shiruru pezüji tashikang trokrok tener, aser telunglen aser temalen tenükjang agi sünga lir, aser mangli sangwali tanen makai parnoki ashir, “Temeshi, temeshi, temeshi, Kibuba Tsüngrem Takoksang, shiba liasü aser tang lir aser tarutsübaji lir.”

⁹Aser kodang item taküm shirurutem jagi teti tatem makai aliba iba chuba menden nung amenba nem sentsüwangshi tetushi aser tenüngsang agütsüdir,

¹⁰item tambur metsür pezü jagi, chuba menden nung amenba madangji apudaka teti tatem makai taküm aliba dang külemer, aser chuba menden madangji pei korang semzüker ashir,

¹¹“Ozü Kibuba Tsüngrem! Nasa sentsüwangshi, tetushi aser ain angutsü tetemsü; kechiyong nai ajak yanglu, aser nai mulungba agi item ajak poktetdaktsü, aser taküm lidaktsür.”