Read njo JUNGKAI ADOKBA 5 Bible Online

JUNGKAI ADOKBA 5 - njo bible

JUNGKAI ADOKBA 5

¹ Iba chuba menden nung mena aliba teka tajichi nung telunglen o temalen anatsülen zülur, kaketlong ka temaitsü tenet agi ajener ni angu.

²Tashi tait kotak tenyar kati ola tulu adoka sangdongba ni angu, aser pai ashi, “Iba kaketlongji lapoktsü aser temaitsü ajenbaji salatsü shiba temsüa ali?”

³Aser kotak nung mesüra alima nung mesüra ali telung[1] nung alir shingaia iba kaketlongji lapoktsü, mesüra reprangdangtsü mokoki liasü.

⁴Iba kaketlong lapoktsü akokba mesüra aji reprangdangtsü temsüa shinga mangu nung ni kanga ajeb.

⁵ Idangji tamburtem rongnung kati kü dang ashi “Tejebma, ajiang, Yihuda kidong nungi adokba molusongzü, Dawid tera, pai koktetogo; anungji kaketlong aser iba temaitsü tenetji pai lapoktsü akok.”

⁶ Aser iba chuba menden tiyong nung aser shiruru pezü tiyong rongnung aser tamburtem, rongnung tetepsetba San Chanu ka ama tezü tenet aser tenük tenet tener noktaka aliba ni angu. Itemji alima ajak dangi yokba Tsüngrem Tanela tenet lir.

⁷Pa aru aser chuba menden nung amenba teka tajichi nungi kaketlongji agizük.

⁸ Kaketlongji pai kodang agizük, tambur metsür pezü aser taküm shiruru pezü jagi San Chanu madangji apudak. Parnok ket shia nung kongki kaka aser liangmesen agi sünga aliba hon susa kaka liasü; itemji amangbapurtem sarasadembaji lir.

⁹ Aser parnoki ken tasen ka tena ashi: “Kaketlongji agizüktsü aser iba temaitsü ajenbatem lapoktsü na tetemsü, kechiaser na tepsetogo, aser ne zü agi kidong, oshi nübur aser kintem ajak nungi Tsüngremer nüburtem asütsü parnok alangzükogo.

¹⁰ Asen Tsüngrem madang tenzüktsü asoshi, nai parnok chuba yimli aser putirtem kümdaktsü aser parnoki alima nung yimsü asütsü.”

¹¹ Aser ni repranga yok aser iba chuba menden, taküm shirurutem aser tamburtem meketa noktaka aliba kotak tenyartem jenti ola ni angashi; aser parnok yongsükji meyirijangben meyirijang aser meyisa meyi liasü.

¹²Parnoki ola tulu agi ayimtena ashi: “Tetepsetba San chanui ain, rongsen, shisatsü, tashi, tetushi, Sentsüwangshi aser nüngsang angutsü tetemsü.”

¹³Aser kotak nung aser alima nung, ali telung nung aliba teyangluba shiai aser idakji aliba ajaki ya ashiba ni angashi, “Chuba menden nung amenba dang, aser San Chanu dang nüngsang, tetushi, sentsüwangshi, aser takokba teti tatem makai sang.”

¹⁴Aser taküm shiruru pezü jagi ashi, “Amen” aser tamburtemi apudak aser külem.