Read njo JUNGKAI ADOKBA 6 Bible Online

JUNGKAI ADOKBA 6 - njo bible

JUNGKAI ADOKBA 6

¹Idangji San Chanui temaitsü ajenba tenet rongnungji ka lapokba ni angu, aser taküm shiruru pezü rongnungi kati tsüngmok ola ama agi ya shia ni angashi, “Arung.”

² Ni repranga yok aser ajiang, kor temesüng ka liasü. Iba manung amenbai lijak ka am, aser pa nem korang ka agütsü, aser pai kokyonga aser maktoktsü ao.

³Kodang temaitsü ajenba tanabubaji pai lapok, taküm shiruru tanabubai ya shia ni angashi, “Arung.”

⁴ Idangji kor temerem tanga ka adok. Alima nungi tesünep aser yimjung agienadoktsü aser kati ka anema tepsetdaktsütsü asoshi iba manung amenba nem temelaba agütsü; aser pa nem nok tulu ka agütsü.

⁵ Kodang temaitsü ajenba tasembubaji pai lapok; taküm shiruru tasembubai ya shia ni angashi, “Arung”. Aser ni repranga yok aser idakji kor tanak ka liasü. Iba manung amenba ket nung seret ka ama liasü.

⁶Taküm shiruru pezü tiyong rongnungi adoker ama ola kati ya shia ni angashi, “Wheat tsük tatakzük ka asoshi senpak ka aser barley tsük tatakzük asem asoshi senpak ka; saka oliv süngdong aser tsükmenatzü nai teraksatsüma.”

⁷Kodang temaitsü ajenba pezübubaji pai lapok, taküm shiruru pezübuba olai ya shia ni angashi, “Arung.”

⁸ Ni repranga yok aser idakji kor pula pular ka liasü. Iba manung amenba tenüngji Tasüba liasü. Aser Tasü Yimi pa sülen anitak. Aser nok agi, ayawara agi, tashitak agi, aser arem shiruru agi, alima shilem pezüsü nung shilem ka tepsettsü asoshi parnok nem tashi agütsü.

⁹Kodang pai temaitsü ajenba pungububaji lapok, shirnok Tsüngrem o asoshi aser parnoki ayuba kuli asoshi tepset, parnok tanelatem tekülemdak teküboklen ni angu.

¹⁰Parnoki ola tulu agi ayimtena ashi, “Oh Kibuba, Temeshi aser ochiba, alima nung alirtem dang ozü azü meyong parnok dak mang ayangtsü nai kopiga menua alitsü?”

¹¹Aser parnok nisung shia nem sobutsü temesüng kaka agütsü, aser parnok medemer tenzükertem aser parnok adianu nungertem parnok amajisa tepsettsü, parnok yongsük mabensa tashi parnoki kenpiga süngjem süngjema ata-a alitsüla ta parnok dang ashi.

¹² Kodang pai temaitsü ajenba trokbubaji lapok, aji ni angu, aser menoknok tulu ka anok. Aser anüji anem sü tanak ama aküm, aser ita rangbenji azü ama aküm.

¹³ Aser mopung tulu agi anokshitsüdang munguzünu lanu tsükba ama, anüng petinutem alima nung tsük.

¹⁴Anüngji kaket atsüdang atsürepa aoba ama sama-a ao; aser tenem aser asetkong shiaji pei talidak nungi atsüngena ao.

¹⁵ Idangji alima chubatem aser tamarenertem, aser temaba tirtem, aser takartem aser tashi taitertem aser alartem, aser nüjitem ajaki lungpok nung aser tenem lung rongnung parnok sasa atsük.

¹⁶ Aser parnoki tenemtem aser lungtem dang ashi, “Onok manung tsükang, aser chuba menden nung amenba tejak nungi, aser iba San Chanu ain adokba nungi onok atsükdakjang!

¹⁷ Kechiyong parnok ain adokba anogo tulu arua lir, aser iba madang shibai noktaka litettsü?”