Read njo JUNGKAI ADOKBA 7 Bible Online

JUNGKAI ADOKBA 7 - njo bible

JUNGKAI ADOKBA 7

¹ Ajisür alima kinük pezüsülen kotak tenyar pezü noktaka aliba ni angu. Ali mesüra tzüyim mesüra süngdong mesüra kecha nunga mopung agi maontsüsa parnoki alima mopung pezüji sota liasü.

²Aser taküm Tsüngrem meyong temaitsü ajenba bener anüdoklen nungi kotak tenyar tanga ka adokba ni angu; aser tzüyim aser ali raksatsütsü asoshi Tsüngremi shirnok nem tashi agütsü, parnok dang pai ola tulu agi ayimtena ashi,

³ “Onoki ozü Tsüngrem tenzükertem parnok tenütsü nung temaitsü majen tashi, nenoki alima mesüra tzüyim mesüra süngdongtem tekangshi.”

⁴Aser Israel chirtem kidong shia nungi iba temaitsü ajenbatem ajonga yongsükji meyi noklang ka ser lir pezü tashi ta ni angashi.

⁵Yihuda kidong nungi meyi terana Reuben kidong nungi meyi terana, Gad kidong nungi meyi terana,

⁶Asher kidong nungi meyi terana, Naftali kidong nungi meyi terana, Manase kidong nungi meyi terana,

⁷Simon kidong nungi meyi terana, Levi kidong nungi meyi terana, Issakar kidong nungi meyi terana,

⁸Zebulun kidong nungi meyi terana, Yosef kidong nungi meyi terana, Benjamin kidong nungi meyi terana.

⁹Item süir külen ni repranga yok aser ajiang, shingaia mezüngdangtettsüsa telok tulu ka ni angu; parnokji kin, kidong, nübur aser oshi shia nungi sobutsü temesüng sobur aser parnok teka nung asang tu amer, iba Chuba menden aser San Chanu madang parnokji noktaka liasü.

¹⁰Parnoki ola tulu agi ayimtena ashi, “Tekümtetji chuba menden nung mena aliba asen Tsüngrem, aser San Chanu meyong lir!”

¹¹Aser chuba menden aser taküm shiruru pezü meketa kotak tenyartem ajak noktaka liasü, aser parnoki chuba menden madangji tejak ali nung chiloka apudaker Tsüngrem külema ashi,

¹²“Amen, temoatsü, sentsüwangshi, shisatsü, tenüngsang, tetushi, ain, aser tashi teti tatem maka asen Tsüngrem dang sang! Amen.”

¹³Idangji tamburtem rongnung kati kü dang ashi, “Temesüng sobutsü soburtemji shir? Aser parnok kong nungi aru?”

¹⁴ Ni pa dang langzü, “Kü kibur, nai meteter.” Aser pai kü dang ashi, “Item ya timtem-tekangshi tulu nungi arubatem, aser parnoki San Chanu zü nung pei sobutsü shidoka temesüng kümdaktsü.

¹⁵Anungji parnoki Tsüngrem chuba menden madang lia, mangli sangwali pa külemer aser chuba menden nung amenbai pei süki agi parnok sübangtsü.

¹⁶ Parnok joko kodanga mayatsü mesüra metsüratsü, mesüra parnok dak anü tesashi agi mekongshitsü mesüra tatsük kechai mepuloktsü.

¹⁷ Kechiyong chuba menden tiyong rongnung aliba San Chanuji parnok sannüker asütsü, aser taküm tzü tzülok dangi pai parnokji anir aotsü aser Tsüngremi parnok tenük nungi nüktzü ajak aidoktsütsü.”