Read njo JUNGKAI ADOKBA 8 Bible Online

JUNGKAI ADOKBA 8 - njo bible

JUNGKAI ADOKBA 8

¹Kodang San Chanui temaitsü ajenba tenetbubaji lapok, kotak nung ghonda tesadang ka shi süngjem süngjema liasü.

²Idangji Tsüngrem madang noktaka aliba tenyar tenetji ni angu, aser parnok nem jangzü tenet agütsü.

³ Aser hon agi yangluba liangmesen arongba su amba kotak tenyar tangar ka aru, aser chuba menden madang aliba hon tekülemdak manung temeshipur ajak sarasadem den meyoktepdaktsütsü pa nem liangmesen jenti agütsü.

⁴Temeshipurtem sarasadem den kotak tenyar teka nungi liangmesen mokozüji Tsüngrem madangi atu.

⁵ Aser kotak tenyar jagi liangmesen arongba suji bena arur iba nungji tekülemdak aliba miji enoker aji alima nung tsüdaktsü, aser tsüngmok olatem, tsüngpret aser menoknok anokba liasü.

⁶Idangji jangzü tenet amba kotak tenyar tenet jagi jangzü aputsü asoshi pei sasa renem.

⁷ Mezüngbubai pei jangzü apu, aser azü den meyokteper rür aser mi adok, aser itemji alima nung tsükdaktsü; aser alima shilem asemsü nung ka rongtok aser süngdongtem shilem asemsü nung ka rongtok aser ai tajem ajak rongtok.

⁸Idangji tenyar tanabubai pei jangzüji apu, aser mi jangrua aliba tenem tulu ama langka tzüyim nung enoktsü.

⁹Aser tzüyim shilem asemsü nung ka azü aküm, aser tzüyim nung aliba taküm shirurutem shilem asemsü nung ka asü, aser rong shilem asemsü nung ka sama.

¹⁰ Idangji tenyar tasembubai pei jangzüji apu, aser milen ama jangrua petinu tulu ka anüng nungi tsük. Aser ayong shilem asemsü nung ka manung aser tzüpokdak manung tsük.

¹¹ Aser petinu tenüngji Taku ta aja; aser tzü shilem asemsü nung ka taku aküm, aser tzü taku aküm nung, iba tzü ajemertem nisung jenti asü.

¹² Idangji tenyar pezübubai pei jangzü apu, aser anü shilem asemsü nung ka, ita shilem asemsü nung ka tammang akümtsü aser anogo shilem asemsü nung ka tesangwa malitsü aser petinutem item shia shilem asemsü nung ka dak zükoktsü.

¹³Idangji ni repranga yok aser anüng tiyong nung mongzü ka yimzüa ola tulu agi yamai shia ayimtenba ni angashi, “Ano kotak tenyar asemi aputsü renema aliba tanga jangzü olatem atema alima nung alirtem asoshi Aiatai! Aiatai! Aiatai!”