Read njo JUNGKAI ADOKBA 9 Bible Online

JUNGKAI ADOKBA 9 - njo bible

JUNGKAI ADOKBA 9

¹Idangji tenyar pungububai pei jangzüji apu, aser anüng nungi alima dangi petinu ka tsükba ni angu, aser bonglang makaba ongken[2] süngkhümrütsü pa nem agütsü.

² Pai iba bonglang makaba ongken teshibangbaji lapok aser ongken nungi mimong misen tulu mokozü ama adok. Aser iba ongken mokozü agi anü aser anüng tammang aküm.

³ Mokozü nung jagi süngkosen alima nung adok, aser alima nung jepja tashi ama parnok nem tashi agütsü.

⁴ Alimai ai mesüra ai tajem meiba mesüra süngdong kecha mekangshitsü, saka shirnok tenütsü nung Tsüngremi temaitsü ajenba mali, item purtemji dang kangshitsü asoshi parnok dang ashi.

⁵Parnokji tepsettsüba masü, saka ita pungu tashi timtem ngudaktsütsü asoshi mela, aser jepjai nisung dak metepdang komama timatemer, yamaji parnoki agütsüba timtemji liasü.

⁶ Item anogo nungji nisungtemi tasüba bushitsü, saka aji mangutsü; aser parnoki sünütsü saka tasübai parnok nungi ajentsü.

⁷ Aser süngkosentem tereprangtsüji tongbang raratsü asoshi renemba kortem ama liasü. Parnok tekolak nung hon korang mesüka aser parnok tejak nisung mesüka liasü.

⁸ Parnok kuji tetsür ku ama aser parnok tepu molusongzü tepu ama liasü.

⁹ Parnok kepdang merang kepdang ama, aser parnok tashikang ola tongbang raradaki asemtepa aoba kor talungtsü aika ola ama liasü.

¹⁰Jepja ama parnok dak tepu keta liasü aser ita pungu tashi nisungtem kangshitsü. Parnok ainji parnok tepen nung liasü.

¹¹Bonglang makaba ongken tenyarji parnok madak chuba liasü. Pa tenüng Ibri o nung Abadon, aser Grik o nung Apolyon, (tetezü “Teraksatsüsang.”)

¹²Mezüngbuba aiatai tejashitsüji süiogo; ajiang, iba sülen tejashitsü aiatai ana arudagi.

¹³ Idangji tenyar trokbubai pei jangzüji apu, aser Tsüngrem madang aliba hon tekülemdak tezütem pezü nungi ola ka ni angashi.

¹⁴Jangzü amer aliba tenyar trokbuba dangji ashi, “Shibanga aliba kotak tenyar pezüji Eufrata ayong tulu nungi chiokang!”

¹⁵Meimchirtem shilem asemsü nung ka tepsettsü asoshi, koba kotak tenyar pezüji ghonda aser anogo aser ita aser küm asoshi renemogo parnok chiok.

¹⁶Kor nung amenba temeranger yongsükji million noklang ana liasü ta ni angashi.

¹⁷Kü mangdang nung ni item kortem aser iba manung amenertem yamai angu: parnok teku nung kepdangji mi ama temerem, naknaka tanen aser tenenya aser kortem tekolakji molusongzü tekolak ama, aser parnok tebang nungi mi aser mokozü aser mitsüktsü mozü adok.

¹⁸Parnok tebang nungi adokba mi aser mokozü aser mitsüktsü mozü item temerenshi asem jagi meimchirtem shilem asemsü nung ka tepset.

¹⁹Kechiyong kortem ainji parnok tebang aser tepen nung liasü; kechiaser parnok tepen per mesüker; aser tekolak keter aser item jagi parnoki yirutsür.

²⁰ Item temerenshitem agi koba tanüngba nisungtem metepset, parnoki süngyanglutem kobai angutsü, angashitsü aser jajatsü makoker, ibala hon, taribi, yongmenyin, lung aser süng agi yangluba süngyanglutem aser temenen tanelatem külemba toktsütsü parnok teka mapa nungi temulung memeyip.

²¹Mesüra parnoka nisung tepsetba, mesüra arasenba mapa, nüktapangta mesüra auyaba, item nungia temulung memeyip.