Read njo RUTH 4 Bible Online

RUTH 4 - njo bible

RUTH 4

¹Tang Boaz süngkhümbongi tua idakji amen; aser ajiang, par sosem shiba indang Boazi jembi pa aruya liasü. Anungji Boazi ashi, “Hai, adianu! Arungjong aser yangi menang” aser pai arua amen.

²Aser pai yimti tambur ter anir arua ashi, “Nenok yangi menangjung,” aser parnoki arua amen.

³Aser pai par sosem dang ashi, “Naomi shiba Moab lima nungi meyipa aru, lai asen adianu Elimelek li yokdi asür:

⁴Anungji ni ne dang yamai shidi ta bilem, yangi mena alir tsüngdang aser kü nübur tambur tsüngdang aji aliang. Nai aji alangzükdi süra, ni metettsüsa kü dang shiang, kechiaser ne dak alaka aji alangzüktsü shinga mali; aser ne sülenbo niang.” Aser pai ashi, “Ni aji alangzüktsü.”

⁵Idangji Bozai ashi, “Nai kechi anogo Naomi ket nungi alu alir, iba den tasüba tenüng pa senmang den züngshitsüsa asür kibutsü Ruth-a nai alitsü tim.”

⁶Idangji par sosem jagi ashi, “Kü senmang meraksaibo ni iba ya alangzüktsü makok; kü alangzüktsüba timji nai agiang, kechiyong ni aji alangzüktsü makok.”

⁷Tang alangzüktepba aser melentepba asoshi Israel rongnung akhi yimsü yamai liasü; shishi shitak ta asütsü atema, nisung kati pa tsüngsem semzüker pai aji tangar nem agütsü; aser ya akhidang Israel nunger kuli yitepba yimsü liasü.

⁸Anungji sosem jagi Boaz dang ashi, “Aji nai aliang.” Aser pai pa tsüngsem semzüka agütsü.

⁹Aser Boazi tambur aser nübur ajak dang ashi, “Elimelek meyong ajak aser Malon o Kilon na meyong ajak Naomi ket nungi ni aliogo ta tanü nenok kuli lir.

¹⁰Iba dak alaka tasür tenüng pa senmang den alitsüsa aser asür tenüng par adianu rongnungi aser pa alidak süngkhüm nungi mepilatsüsa Malon kibutsü Moabtsür Ruth kü kibutsü asütsü ni aliogo; tanü nenok kuli lir.”

¹¹Aser süngkhüm nung alir nisung aser tambur ajaki ashi, “Onok kuli lir. Ne keti aitba tetsürji Rachel o Lea, shirnoki Israel kidong yangerogo, tena mesüka KIBUBAi kümdakjang; aser na Efrata nung azükaruang, aser Bethlehem nung merenang.

¹²Aser KIBUBAi ne nem agütsüba iba tetsür metsü nungi Perez kidong shiba Tamar nungi Yihuda jakzük aji mesüka ne kidong lidakjang.”

¹³Anungji Boazi Ruth agi, aser la tebutsü aküm, aser pai la dangi ai aser KIBUBAi la mashisa kümdaktsü aser lai jabaso ka aso.

¹⁴Aser tetsürtemi Naomi dang ashi, “KIBUBA shibai tanü kinunger ka meyutsüi na metoktsü, pa sangang; aser Israel nung pa tenüng merena lidakjang.

¹⁵Pa ne taküm soter aser na tantsür mapang nung temesür ka alitsü; kechiyong ne jabaso kibutsü shibai na meimer aser shiba ne tsüngdang jabaso tenet dang nungi taoba lir, lai jabaso ka aso.”

¹⁶Idangji Naomi-i tanurji ajunga arua aji la teku nung ajung aser laji pa yarila aküm.

¹⁷Aser lar kiyonger tetsürtemi pa nem tenüng ka agüja ashi, “Yangi Naomi nem jabaso ka soja lir; aser parnoki pa tenüng Obed aja”; pa Dawid tebu, Yesse tebu lir.

¹⁸Tang item Perez nungi jakzükba lir: Perez nungi Hezron jakzük;

¹⁹Hezron nungi Ram jakzük aser Ram nungi Amminadab jakzük;

²⁰Amminadab nungi Nashon jakzük aser Nashon nungi Salmon jakzük;

²¹Salmon nungi Boaz jakzük aser Boaz nungi Obed jakzük;

²²aser Obed nungi Yesse jakzük, aser Yesse nungi Dawid jakzük.