Read njo 1 SAMUEL 1 Bible Online

1 SAMUEL 1 - njo bible

1 SAMUEL 1

¹Tang Efraim kidong nungi nisung ka tenüng Elkana, Efraim tenem linük Ramath yimti nung liasü, pa Yeroham chir, Efraim nunger Zuf chir Tohu aser Elihu semchir liasü.

²Pa kibutsü ana liasü: ka tenüng Hanna, aser ka tenüng Peninna, Peninna tanur ali, saka Hanna tanur mali asü.

³Iba nisung küm shia yimti nungi, Shilo nung Temeranger KIBUBA dangi tekülemtsü aser tenla agütsütsü atu. Aser Eli jabaso ana Hofni aser Finehas KIBUBA putirtem, yangji liasü.

⁴Aser Elkanai tenla agütsüba anogo atongdang, pai tebutsü Peninna, aser la jabaso aser jala ajak nem tenlaba shi nungi shilem agütsü;

⁵Saka Hanna nembo pai shilem anasü agütsü, kechiaser pai la meim. Saka KIBUBAi la nu menden shibangtsür liasü.

⁶Aser la medemnunglai la nemnemtsüsa kanga jashidaktsü, kechiaser KIBUBAi la nu menden shibangtsü.

⁷Aji küm shia yamaji atalok. Kechiaser kodangsa Hanna KIBUBA kidangi atu la medemnunglai lai jeba chi mechiyung tashi la jashidaktsü.

⁸Aser la kinungpu Elkanai la dang ashi, “Hanna, kechiba na ajeber aser mechiyunger? Kechiba ne mulung jashir? Jabaso ter dang nungi ne madang ni taoba masü no?”

⁹Kenü anogo parnoki Shilo nung chiyunga jemer külen Hannai arameso. Tang Eli putir KIBUBA tenla ki kiküm tongnü anasa pei menden nung mena liasü.

¹⁰La tanela nung kanga nünga liasü, aser KIBUBA dang sarasadem dang lai kanga ajeb.

¹¹ Lai tatemzükba ka atemzüka ashi, “Oh Temeranger Telok KIBUBA, nai atangji ne kilitsür ala-ashi reprangra, aser ni bilemtetra aser ne kilitsür mamara, aser ne kilitsür nem jabaso ka agütsüra idangji pa taküm arishi anogo ajak KIBUBA nem ni agütsütsü; aser pa tekolak nung kusünok kodanga mataloktsü.”

¹²Lai KIBUBA madang maneni sarasadem dang, Eli-i la tebang dak ranglok.

¹³Tang Hanna, la mulung nung sarasadem, la tebangmechi dang arakzü, saka la olabo mangashi; anungji la yi agi mesep ta Eli-i bilem.

¹⁴Aser Eli-i la dang ashi, “Na kopiga yi agi mesepa alitsü? Ne dak nungi yi endokang.”

¹⁵Hanai langzü, “Yamaji masü, kü kibur, ni tanela nung kanga jashiba tetsür ka lir. Ni yi mesüra mejemtzü majemer, saka ni kü tanela KIBUBA madang tokzüka yutsür.

¹⁶Ne kilitsür samesatsür ama tezüngshima, kechiaser ni kü tejashi tulu aser timtem tulu nungi sarasademdagi.”

¹⁷ Eli-i langzü, “Tesünep nung oang, aser Israel Tsüngremi nai pa dang asüngdangba ajak ne dang mela-angma.”

¹⁸ Lai ashi, “Ni ne tenzüklai ne tsüngdang taochi ngudakjangma.” Idangji lai pei lenmangi ao aser chiyung; aser la tejak nung tejashi joko maliasü.

¹⁹Anepdang yakta parnoki sak, aser KIBUBA madang külem, aser pei ki Ramai parnok meyipa aru. Elkanai pei kibutsü Hanna den medem, aser KIBUBAi la bilemtet.

²⁰Kodang mapang tonga aru, Hanna mashisa aküm aser jabaso ka aso. Lai pa tenüng Samuel ta aja, kechiaser lai ashi, “Ni pa KIBUBA dang meshizük.”

²¹Elkana aser par kibong kümshi tetepsetba tenla aser pai atemzükba ama tenlatem KIBUBA nem agütsütsü atutsü mapang tonga aru,

²²saka Hannabo matu, kechiaser lai pei kinungpu dang ashi, “Kodang tanurji mama tokdir,[1] idangji ni pa KIBUBA kidangi anir tua agütsütsü, aser pa arishi anogo tepiyong yangji alitsü.”

²³Tebuba Elkanai la dang ashi, “Ne dang ajungba ka sang, pa mama matok tashi yangi ata-ang, oda KIBUBAi dang pa o atalokjangma.” Anungji tetsür jagi kidang ata-a liasü, aser pei chir mama matok tashi lai pa anebalua liasü.

²⁴Kodang tanurji mama tokdaktsü, lai la den nashi pungchi asem aser amzü efa ka, aser yi meso ka bener Shilo nung KIBUBA kidangi pa anir aru, aser techirji ano tanur liasü.

²⁵Aser parnoki nashi pungchiji tepset, aser tanurji Eli dangi anir aru.

²⁶Aser lai ashi, “Oh kü kibur, na taküm ali nungji, kü kibur, KIBUBA dang sarasadema, yangi na anasa noktaka alila tetsürto ni lir.

²⁷Iba techir asoshi ni sarasadem; aser KIBUBA dang ni kechi mepishi, pai kü nem agüja lir.

²⁸Anungji nia pa KIBUBA nem bendanga agütsür; pa taküm ali tashi pa KIBUBA asoshi alitsü.” Aser yangji parnoki KIBUBA külem.