Read njo 1 SAMUEL 10 Bible Online

1 SAMUEL 10 - njo bible

1 SAMUEL 10

¹Idangji Samueli totzü bongdangji bena arua aji Saul kolak nung shiloktsü, aser pa dak tebang mesep aser ashi, “KIBUBAi pei nübur Israel madak lenir asütsü ne dak totzü mezütsü masü no?

²Kodang na ni nungi tanü pila-a odir, nai nisung ana Benjamin litsü Zelza nung Rachel leper anasa nai ajurutsü.” Parnoki ne dang ashitsü, Gadotem koba nai bushia ao, ibato nguogo, aser nebui gadotem indang masü saka ne indang tebilemtsü ka-a ashir, ozü chir asoshi ni kechi inyaktsü?

³Ajiser idak nungjagi na tejakleni oang, aser na Tabor sülemdong dangi arutsü, aser yangji nai nisung asem Betheli Tsüngrem dangi tuya ajurutsü; kati nabong chanu asem aben, tangar kati amtsük asem aben, aser tangar kati yi bongdang ka bener;

⁴aser parnoki ne nem salem agüja amtsük asem agütsütsü; koba nai parnok ket nungi ana agizüktsü.

⁵Iba sülenji Filistia nunger temeranger alidak Tsüngrem tenemi na arutsü; aser kodang na yimti len jagi arudir, ainkar telok ka, tsürang kongki, asem, aser jemji balala parnok jakdang bener alua nai ajurutsü aser parnoki shina jembiya alitsü;

⁶KIBUBA tanela ne madak tashi tulu agi arutsü, nai parnok den shina jembitsü, aser na nisung tanga ka kümadoktsü.

⁷Kodang item temaitsü ne dangi arudir, ne mapangi melaba ama inyakang; kechiyong Tsüngrem ne den lir.

⁸Na kü dangi jelia Gilgali aotsü; aser ajiang, ne dangi, tarongba tenla aser telungjem tenla tenlatsü: ni ne dangi maru tashi aser nai kechi inyaktsü ne dang mesayu tashi anogo tenet nai atatsüla.

⁹Samuel nungi aotsü pa tesülen meyipdang, Tsüngremi pa nem temulungjang tasen ka agütsü: aser item temaitsü ajak iba anogo nungji atalok.

¹⁰Kodang parnok Gibea leni aru, ainkar telok kati pa den ajuruteptsü aru. Aoksa-a Tsüngrem Tanela pa madaki aru aser pai parnok rongnung shina jembi.

¹¹Kodang akhidang metetepa alirtemi atangji pai ainkar den shina jembir ta angu, nisungtemi kati ka dang ashi, “Kiser jabaso dak atalokba ya kechi? Saula ainkar rongnung aden asü?

¹² Anasa noktaker kati langzü, parnok tebu shiba lir? Anungji ibai apijemtsü shin o aküm, Saula ainkar rongnung aden asü?

¹³Kodang pai shina jembiba tatem aküm pa tenem jagi aru.”

¹⁴Saul tebu tanubui pa aser pa kilir dang ashi, “Nenok koleni ao?” Aser pai ashi, “Gadotem bushitsü ao; aser onoki parnok mangu nung, onok Samuel dangi aru.”

¹⁵Aser Saul tebu tanubui ashi, “Yimlibilema Samueli ne dang kechi ashi, kü dang shiangma”;

¹⁶Aser Sauli tebu tanubu dang langzü, “Pai onok dang jangjajangja-a gadotem nguogo ta ashi.” Saka yimli mapa koba indang Samueli jembi, aji pai pa dang mashi.

¹⁷Samueli nisungtemji KIBUBA dangi Mizpai aja,

¹⁸aser parnok dang ashi, “Yamai KIBUBA Israel Tsüngremi ashir, Ni nenok Ijip nungi anitet aser Ijip nunger ket aser nenok kangshiba yimlitem ajak nungi ni nenok kümzük.”

¹⁹Saka tanü nenoki nenok Tsüngrem shibai nenok lendong aser tejashi ajak nungi kümzük paji nenoki magizüki ashi, “Masü, nai onok madak chuba ka yutsütsüla. Anungji tang nenok sasa KIBUBA madang kin kin aser kidong kidong noktakang.”

²⁰Idangji Samueli parnok kin ajakji tejakleni arudaktsü, aser KIBUBAi Benjamin kin shimtet.

²¹Ano pai Benjamin kinji kidong kidong anasa anir aru Matri kinunger shimtet, aser Matri kinungerjia anasai anir aru aser Kis jabaso Saul shimtet, saka kodang parnoki pa bushi parnoki paji mangu.

²²Ano parnoki KIBUBA dang asüngdang, “Nisungbaji yangi arua mali no?” KIBUBAi langzü, “Pa oset nangdendakji atsüka lir.”

²³Anungji parnoki asema or nisungtem dangi Saul anir aru, shiba nisungtem dang nungi tapubang nungi shir temalen agi talangba liasü.

²⁴Idangji Samueli nisungtem dang ashi, “KIBUBAi shiba shimogo nenoki nguali ma? Asenok rongnung pa mesüka shinga melika.” Aser nisung ajaki ayimtena ashi, “Chubaji talangka lidakjang.”

²⁵Ajiser Samueli nisungtem dang chuba yimli mapadong indangji ashi, aser aji kaket ka nung zülu, aser aji KIBUBA madang ataloka ayu, aser Samueli nisung ajak pei kidangi yok.

²⁶Aser Saula par kidangi Gibeai ao, aser pa den tasü tait nisung kar shir mulungjang nung KIBUBAi kongshi parnoka pa den ao.

²⁷Saka samesa nisung kari ashi, “Iba nisung yagi asenok koda kümzüktsü?” Yamaji parnoki Saul sensatsü aser pa dangi sempet bener marutsü. Saka pai ola madoki ali.