Read njo 1 SAMUEL 11 Bible Online

1 SAMUEL 11 - njo bible

1 SAMUEL 11

¹Ita ka shi lir külen, Amon chuba Nahasi Gilead nung Yabes anema atua aji meketbang. Idangji Yabes nunger ajaki Nahas dang ashi, “Onok den tenangzüktepba ka yangluang, aser onoki na[5] tenzüktsü.”

²Amon nunger Nahasi langzü, “Nenok tenük tajichi aroktok nung dang ni ibaji nenok den yanglutsü, aser aji Israel madak maksütsü asoshi ataloka yutsütsü.”

³Yabes tamburtemi pa dang ashi, “Israel litsü ajaki osang benertem yoktsü asoshi onok nem anogo tenet agüjangma, ajiser onok kümzüktsü shinga melira onoki ne dangi atutsü.”

⁴Idangji osang benertemji Saul alidak Gibea-i aru aser iba osang nisung ajak dang ashi, aser parnok ajaki ola adoka ajeb.

⁵Tang Saul alu nungi nashitem sülen adokya liasü, aser pai asüngdang, “Kechiba nisungtemji jebteper?” Parnoki Yabes nisungtem oji pa dang ashi.

⁶Aser kodang item o pai angashi, Tsüngrem tanela tashi tulu agi pa madaki aru, aser pa mit kanga adok.

⁷Pai nashi jura ka bena aru, aser parnok anüka alangsar itemji Israel litsü ajaki osang benertem ket nung ya shia yok, “Shibaisa Saul sülen aser Samuel sülen marulir, yamai par nashitem dang inyaktsü.” Aser ajak madaki KIBUBA tsübuba arua, parnok nisung ka amai sentep.

⁸Pai parnok Bezek nung züngdang, aser Israel nunger meyi noklang asem aser Yihuda nunger meyi semer liasü.

⁹Aser osang benertem dang parnoki ashi, yamai nenoki Yabes-Gilead nisungtem dang ashitsüla, “Asüng anü tsüka alidang nenok tekümzük alitsü.” Osang benertem aru aser Yabes nisungtem dang aji ashi; aser parnok pela-a liasü.

¹⁰Anungji Yabes nisungtemi ashi, “Asüng onok nenok dangi adoktsü, aser nenoki onok dak nenoki tajung ta bilemba ajak inyakang.”

¹¹Tasüngji Sauli nisungtemji telok asem küma lemsa, aser anepungi Amon nunger tanendak tiyong jagi aru, aser anepdang nungi anjongmeshi tashi parnok tepset. Tanüngbatemji anata külemi metoktsüi pei pei meten prokshia liasü.

¹²Idangji nisungtemi Samuel dang ashi, “Sauli onok madak chubatsü no ta ashibato shiba? Parnokji onok nem agüjang, onoki parnokji südaktsütsü.”

¹³Saka Sauli ashi, “Tanü Israel nung shinga mesüdaktsütsü, kechiaser tanü KIBUBAi Israel kümzükogo.”

¹⁴Idangji Samueli nisungtem dang ashi, “Arung, asenok Gilgali odi, aser yimliji yanglushidi.”

¹⁵Nisung ajak Gilgali ao; aser parnoki Saul Gilgal nung chuba kümdaktsü; aser yangji parnoki telungjem tenla tenla, aser Saul aser nüburtem ajak kanga pelatep.