Read njo 1 SAMUEL 12 Bible Online

1 SAMUEL 12 - njo bible

1 SAMUEL 12

¹Samueli Israel ajak dang ashi, “Ajiang, nenoki kü dang asüngdangba ajak ni nenok dang angaogo, aser nenok madak chuba ka yutsüogo.

²Tarutsü nung pai nenok anitsü. Joko ni tambur aser kupu pua lir, aser kü jabasotem nenok den lir. Kü asangwa nungi tanü tashi nenok anishia aruogo.

³Yangi ni lir, ni anema KIBUBA madang aser pai mezüja shimtetba madang kuli agüjang. Shir nashi ni agi? Mesüra shir gado ni agi Ni shiba kangshi mesüra ashioktsü? Kü tenük shibangtsüsa ni shiba nungi süpokrem agi? Ni yamaji inyaka lira ni nenok nem shia agütsüdi.”

⁴Parnoki langzü, “Nai onok mashioktsüka mesüra mekangshika, aser nisung shinga ket nungi kecha magika.”

⁵Samueli parnok dang ashi, “Nenoki kü ket nung kecha mangu ta nenok anema KIBUBA aser pai mezüja shimtetba chubaji tanü kuli lir.” Aser parnoki langzü, “KIBUBA kuli lir.”

⁶ Samueli nüburtem dang ashi, “Mosa aser Aron shimtetba aser nenok tsüraburtem Ijip lima nungi anitetbaji KIBUBA lir.

⁷Tana aji asünung, KIBUBA madang pai nenok dang aser nenok tsüraburtem dang inyakba, KIBUBA temeshi mapatem indang ajak ni nenok den lemsateptsü nenok noktaka liang.

⁸Kodang Yakob Ijipi ai, Ijip nungeri parnok rishikangshi, aser nenok tsüraburtemi KIBUBA dang ayimten. Idangji KIBUBAi Mosa aser Aron yok, shirnoki parnok Ijip nungi anitet aser iba li nung lidaktsü.

⁹ Saka parnoki KIBUBA parnok Tsüngrem amadok aser pai parnok Filistia nungertem, Moab chuba aser Sisera, aser Hazor telok tanishirtem ket nung parnok ayok, aser parnoki parnok anema rara.

¹⁰ Idangji parnoki KIBUBA dang ayimten aser ashi, “Onoki temenen menaogo, kechiaser onoki KIBUBA senzüka toktsüogo, aser Baaltem aser Ashtarot tenzük, saka tang onok tsükchir ket nungi kümzükangma, aser onoki na tenzükdi.”

¹¹ KIBUBAi Yeru-baal, Bedan, Yeftha, aser Samuel yok, aser ajaklen nenok tsükchir ket nungi nenok kümzük, aser nenok tekümzük nung alir.

¹²Kodang Amon nunger chuba Nahas nenok anema arua angu, KIBUBA nenok Tsüngrem nenok chuba aliba mapang nung nenoki ashi, “Masü, chuba katiang onok madak chubatsü.”

¹³Anungji tang nenoki shiba chuba shimtet aser shiba nenoki meshi, ajiang, KIBUBAi nenok madak chuba ka yuja lir.

¹⁴Nenoki KIBUBA akhüm tsübutsü, aser pa tenzüktsü, aser pa o angatsü, pai melaba anema madoktsü süra, nenok aser ano chuba shibai nenok madak yimsü asür KIBUBA nenok Tsüngrem sülen anitakertem süra junger.

¹⁵Saka nenoki KIBUBA o mangatsü, saka Pa temelaba anema adokdi süra idangji nenok tsürabur tendak ama KIBUBA teka nenok anema alitsü.

¹⁶Anungji tang noktaka liang aser nenok madang KIBUBAi kechi mapa tulu inyakdir ajiang.

¹⁷Tanü wheat tsük aruba mapang masü no? KIBUBAi tsüngmok aser tzünglu yoktsüsa ni pa dang asüngdangtsü; nenoki chuba ka asüngdangba nung nenoki inyakbaji tamajung mapa tulu ta nenoki metettsü aser angutsü.

¹⁸Anungji Samueli KIBUBA dang aja; aser KIBUBAi iba anogo nung tsüngmok aser tzünglu yok; aser nisung ajaki KIBUBA aser Samuel kanga tsübu.

¹⁹Nisung ajaki Samuel dang ashi, “Onok masütsü asoshi KIBUBA ne Tsüngrem dang ne tenzükertem asoshi sarasademangma; kechiyong onok temenen ajak nung, onok asoshi chuba ka meshiba iba temenen onok madak benloktsüogo.”

²⁰Samueli nisungtem dang ashi, “Tetsübu, nenoki atangji iba tamajung ajak inyakogo; aji saka KIBUBA sülen anitakba nungi temeyip, saka nenok mulungjang ajak agi KIBUBA tenzükang;

²¹tajangzük magütsüba mesüra kümzüktsü makokba amajok osettem sülen meyipa tuo.

²²Kechiyong KIBUBAi pa tenüng tulu atema pei nübur senzüka metoktsütsü; kechiaser KIBUBAi pei asoshi nenok nübur ka kümdaktsütsü mulunga lir.

²³Talisa ni asoshibo, nenok asoshi sarasademtsü anenba agi KIBUBA anema temenen memenatsü Tsüngremi ni songtemangma; saka ni nenok lenmang tajung aser shitakba nung sayutsü.

²⁴KIBUBA tsübuang, aser nenok mulungjang ajak agi atangji nung pa tenzükang; kechiyong nenok asoshi koda mapa tulu pai inyak bilemdangang.

²⁵Saka nenoki ano mejungi inyakdi süra, nenok aser nenok chuba anaprongla samatsü.”