Read njo 1 SAMUEL 13 Bible Online

1 SAMUEL 13 - njo bible

1 SAMUEL 13

¹Saul chubatsü tenzükdang pa küm semer liasü; aser pai Israel madak küm lir[6] yimsü asü.

²Aser Sauli pa asoshi Israel nisung meyi asem shimtet; meyi ana pa den Mikmas aser Bethel tenem linük nung, aser meyi ka par jabaso Yonathan den Benjamin litsü Gibea nung yutsü. Tanüngba nisungtem pei pei süki-i yok.

³Gibea nung Filistia nunger temeranger telokji Yonathani akok, aser Filistia nungeri aji angashi. Idangji Sauli linük ajak nung jangzü apua ashi, “Ibri nungeri angang.”

⁴Aser Israel ajaki Sauli Filistia nunger kokogo aser ano Filistia nungeri Israel nunger tsübur ta angashi. Anungji nisungtemji Saul sülen Gilgal nung külemi sentep.

⁵Israel nunger den raratsü asoshi Filistia nunger külemi sentep. Parnok kor talungtsü meyi semer, kor temeranger meyi trok, aser nisungtemji tzüyim küm lisem ama liasü. Parnoki Beth-aven anüdoklen Mikmas nung tua anen.

⁶Idangji parnoki Israel anema kanga sashia apuso. Israel nisungtem kechi mesayangi aküm. Anungji parnoki pei sasa lungpok nung, mungur nung, lung yongtsü, süngsem aser ongkentem nung atsükok.

⁷Ano Ibri nunger karbo Yordan ajanger Gadasa Gilead linüki ao. Saka Saulbo Gilgal nungsa liasü aser pa den aliba nisung ajak tetsübu agi atentena liasü.

⁸Samueli mapang atakteta toktsüba mapang tashi pai anogo tenet ata-a ali; saka Samuel Gilgali maru; aser nisungtem pa nungi prokshia liasü.

⁹Anungji Sauli ashi, “Kü dangi yangi tarongba tenla aser tesünep tenla yagi bener arung.” Aser Sauli tarongba tenlaji agütsü.

¹⁰Aser pai tarongba tenla tenlaba temlidang, ajiang, Samuel aru; aser pa nem salem agütsütsü Saul pa lenji ao.

¹¹Samueli asüngdang, “Nai kechi inyak?” Sauli langzü, “Kechiaser nisungtem ni toktsür prokshia aoba ni angu, aser mapang shitak nung na-a maru, aser Filistia nunger Mikmas nung külemi sentepa liasü.

¹²Anungji ni bilem, Filistia nungeri kü madak Gilgali alutsü aser ni KIBUBA maongka memepishi; anungji ni kü sasa kangshia tarongba tenlaji agütsü.”

¹³Samueli Saul dang ashi, “Nai tamashi inyakogo; nai KIBUBA ne Tsüngrem temelaba koba pai ne dang mela aji meinyak; kechiyong ne yimli Israel madak teti asoshi KIBUBAi yanglutsür lila.

¹⁴Saka tang ne yimli anentsü KIBUBAi pei asoshi pa mulung asüba nisung ka bushiogo, aser KIBUBAi pa pei nübur madak tanishir asütsü shimtetogo, kechiaser KIBUBAi koba ne dang mela aji nai mebenshi.”

¹⁵Idangji Samuel Gilgal nungi aramesoa pei lenmangi ao. Aser Saul den aliba nisungtem pa den külemi Gilgal nungi Benjamin nunger Gibeai ao. Sauli pa den aliba nisungtemji züngdang aser parnokji noklang trok shi liasü.

¹⁶Saul pa jabaso Yonathan aser tena den aliba nisungtemji Benjamin nunger Gibea nung anen, aser Filistia nungerji Mikmas nung anen.

¹⁷Aser yimakertemji Filistia nunger tanendak nungi telok asemsü kümer adok; telok ka Ofrai aoba lenmang, Shual lima dangi meyip;

¹⁸aser tangar telok Bethhoron lenmangi meyip; aser tangar telok arem tsütsülen Zeboiim lenten arrtsü leni meyip.

¹⁹Tang Israel lima ajak nung yintsünger maliasü, kechiyong Filistia nungeri ashi, “Ibri nungeri parnok sasa nok aser nü yanglura koda.”

²⁰Saka Israel nunger ajak pei alu alaba koterang, mertsüng, pu aser ninok ayitsü asoshi Filistia nunger dangi alu.

²¹Koterang aser mertsüng ayiba ta-aji senpak asem, aser pu o ninok ayiba ta-a sempak ana liasü.

²²Aser tongbang anogo nung, Saul aser Yonathan den aliba nisungtem kar ket nungdanga nok mesüra nü maliasü. Saul aser par jabaso Yonathan ket nungdang liasü.

²³Aser Filistia nunger temeranger telok Mikmas ongdang lenmangi ao.