Read njo 1 SAMUEL 15 Bible Online

1 SAMUEL 15 - njo bible

1 SAMUEL 15

¹ Samueli Saul dang ashi, “KIBUBAi pei nübur madak aser Israel chuba asütsüsa na mezüja shimtettsü ni yok. Anungji tang KIBUBA O angang.

² Yamai Temeranger KIBUBAi ashir, Amaleki Israel dang kechi inyak oda pa Ijip nungi adokdang pai lenmang nung noktangba asoshi ni Amalek merenshitsü.

³Tang oang aser Amalek makang, parnok akaba ajak meshimeshia samajang. Parnok kecha anünga teyutsü, saka tetsür, tebur, tanur aser kinütem; nashi, san, ut aser gado ajak tepsetang.”

⁴Sauli nisungtem aja, aser Telaim nung parnok züngdang, tetsüng temeranger meyi noklang ana, aser Yihuda nisung meyi ter.

⁵Saul Amalek yimti-i aru, aser lenten nung pai mita ali.

⁶Sauli Ken nunger dang ashi, “Oang, pilaang, Amalek nunger den ni nenok samadakja lir; parnok rongnungi nenok luang; kechiyong Israel nunger Ijip nungi adokdang nenoki Israel chirtem dang yimlibilem sayu.” Anungji Ken nungerji Amalek nunger rongnungi pila-a ao.

⁷Sauli Amalek nungertemji Havila nungi Shuri tashi Ijip anüdoklen tashi amak.

⁸Pai Amalek nunger chuba Agag taküm apu, aser nokpu agi nisungtem meshimeshia samatsü.

⁹Saka Saul aser nisungtemi Agag, san tajungtibatem, nashi tejebketbatem, san chanutem aser kechi tajung ajak mesamatsüi anünga ayu, saka tamajung aser teshimzük ajak meshimeshia samatsü.

¹⁰Idangji KIBUBA o Samuel dangi ya oda arua ashi,

¹¹“Ni Saul chuba kümdaktsüba asoshi jashir, kechiaser pai kü temelaba meinyak aser ni nungi pila.” Aser iba jagi Samuel jashidaktsü, aser aonung tepiyong pai KIBUBA dang ayimten.

¹²Anepdang Samueli Saul ajurutsü ao. Saka Sauli pei asoshi nüngshilung ka Karmel nung yangluogo aser Gilgali meyipa luogo ta Samueli angashi.

¹³Samuel Saul dangi aru; aser Sauli pa dang ashi, “KIBUBAi na moajang, ni KIBUBAi melaba inyakogo.”

¹⁴Saka Samueli ashi, “Süra kü narong nung san aser nashi asatepba koba ni angashir ya kechi tetezü?”

¹⁵Sauli langzü, “Itemji parnoki Amalek nungi bener aru; kechiaser KIBUBA ne Tsüngrem nem tetepsetba tenla agütsütsü asoshi nisungtemi san aser nashi tajungtiba anünga ayu; aser tanüngbaji meshimeshia onoki samatsüogo.”

¹⁶Idangji Samueli Saul dang ashi, “Ata-a liang, KIBUBAi kü dang iba aonung kechi ashi aji ni ne dang shidi.” Aser pai pa dang ashi, “Shiangma.”

¹⁷Samueli ashi, “Na ne nükdang tila liaka, na Israel kidongtem madak tazüngba mekümdaktsü no? Aser KIBUBAi na Israel madak chuba asütsü mezüja shimtet;

¹⁸aser KIBUBAi na mapa kati yok, aser ashi, oang aser parnok temenen nisung Amalik nunger mesamatsü tashi parnok anema rara-ang.

¹⁹Ajangla kechiba nai KIBUBA o manga, saka temakzükba oset bushia asem, aser KIBUBA tsüngdang kechi tamajung aji inyak?”

²⁰Sauli Samuel dang langzü, “Hau, ni KIBUBA o angaogo, aser KIBUBAi kü dang sayuba lenmangi ogo, aser Amalek chuba Agag bener aru, aser Amalek nunger meshimeshia samatsüogo.

²¹Saka nisungtemi san aser nashi pungchi, samatsütsü aliba oset tongtibangtem, Gilgal nung KIBUBA ne Tsüngrem nem tetepsetba tenla agütsütsü agi.”

²²Samueli ashi, “KIBUBA o tashi angaba nung pelaba teka tarongba aser tetepsetba tenla tenladak KIBUBAi tepela ali asü? Ajiang, tashi angabaji tetepsetba tenla dang nungi tajungba, aser o angabaji san tepung temo dang nungi tajungba.

²³Kechiyong anema apusobaji arasentsür temenen amato lir, aser temulung merangbaji süngyanglu külemba temenen amato lir; nai KIBUBA o magizük nungji paia na chuba asütsü magizüker.”

²⁴Idangji Sauli Samuel dang ashi, “Ni temenen benshiogo; kechiyong ni KIBUBA aser ne o temelaba ozüng anema inyakogo; kechiaser ni nisungtem tsübu aser parnok o anga.

²⁵Anungji tang ni ne dang mepishir, Kü temenen tai tokang, aser ni KIBUBA külemtsü na kü den meyipangma.”

²⁶Saka Samueli Saul dang langzü, “Ni ne den memeyiptsü, kechiaser nai KIBUBA o magizük aser KIBUBAi na Israel madak chuba asütsü magizüker.”

²⁷Samueli oadoktsü meyipdang Sauli pa tetsünglen sobutsü nung amet aser aji shisatsü.

²⁸Samueli pa dang ashi, “Tanü KIBUBAi Israel yimli na nungi shidangogo aser aji ne dang nungi tajungba ne kiyonger ka nem agütsüogo.

²⁹Ano pa shiba Israel sentsüwangshi lir, pai meyazütsü mesüra temulung memelenshir; kechiaser temulung meyiptsüsa pa nisung ka masü.”

³⁰Idangji Sauli ashi, “Ni temenen benshiogo; aji saka ni ne dang mepishir, kü nübur tambur madang aser Israel madang kü dang akhüm tsübu sayuangma, aser KIBUBA ne Tsüngrem ni külemtettsüsa kü den meyipa arungma.”

³¹Anungji Samueli Saul sülen tanaben meyipa ao, aser Sauli KIBUBA külem.

³²Idangji Samueli ashi, “Amalek nunger chuba Agag kü dangi yagi anir arung.” Aser Agag pa dangi pelashishia arua ashi, “Atangji tasüba taku süitema ogo.”

³³Samueli ashi, “Ne nok agi tetsürtem tanur mali kümdaktsüba ama yamaji tetsür rongnung netsü tanur malitsü.” Aser Gilgal nung KIBUBA madang Samueli Agag anüka lepsatsü.

³⁴Idangji Samuel Ramai ao aser Saul pei kidangi Gibeai ao.

³⁵Samueli Saul dangi pa asüba anogo matong tashi joko maru; saka Samueli Saul asoshi mang ayim; aser KIBUBAi Saul Israel madak chuba kümdaktsüba asoshi sasa-a liasü.