Read njo 1 SAMUEL 17 Bible Online

1 SAMUEL 17 - njo bible

1 SAMUEL 17

¹Tang Filistia nungertem tongbang raratsü asoshi Yihuda meyong Soko nung külemi sentep, aser Efes-Damin nung Soko aser Azeka tsüngda tanendak yanglu.

²Saul aser Israel nungertema külemi sentepa Ela lenten nung amen, aser Filistia nunger anema raratsü taren kümteta liasü.

³Filistia nunger tenem külen aser Israel nunger tenem külen aser parnok tsüngda ali telemok ka liasü.

⁴Filistia nunger tanendak nungi walunir ka tenüng agi Goliat, Gat nunger ka adok, shiba tar süklep trok aser aka ka liasü.

⁵Pa kolak nung yongmenyin korang ka sema liasü, aser pa merang semoksü sobua liasü; aser semoksüji yongmenyin shekel meyi pungu taret liasü,

⁶pa tetsüngji yongmenyin agi meia liasü aser tapubang tsüngda nung yongmenyin nü liasü.

⁷Pa nülakji sütaker alem amai liasü, aser pa nü o merang shekel noklang trok taret liasü aser pa jong abener ka jakdang ao.

⁸Aser pa noktaka Israel temeranger telok dang ayimtena parnok dang ashi, “Kechiba nenok tongbang taren sena noktaktsü adok? Ni Filistia nunger ka aser nenok Saul tenzükertem masü no? Nenok asoshi nenoki nisung ka shimtetang, aser pa kü dangi aludakjang.

⁹Pai kü den raratsü kokra aser ni tepsetra, idangji onok nenok alar asütsü; saka ni pa kokra aser pa tepsetra, idangji nenok kü lar asütsü aser onok tenzüktsü.”

¹⁰Aser Filistia nungbai ashi, “Tanü ni Israel temeranger telok anema ayongzüker; küna külemi rarateptsü kü nem nisung ka agüjang.”

¹¹Kodang Saul aser Israel ajaki Filistia nungba otemji angashi, parnok aoksa aser kanga tsübu.

¹²Tang Dawidji Yihuda nung Bethlehem meyong Efrat nunger tenüng agi Yesse jabaso liasü; pa jabaso ti liasü; nisungbaji Saul tensa nung tambur, nisung rongnung arishir nisung ka liasü.

¹³Yesse jabaso tambusang asembo Saul sülen tongbangi or liasü; tongbangi aoba par jabaso asem tenüngji Eliab mezüng asoba, aser pa den tatong Abinadab aser tasembuba Shamma.

¹⁴Dawid tanubuti liasü: aser tambusang asemji Saul sülen anidak.

¹⁵Tang, Bethlehem nung pa tebuer san mesütsü Dawid Saul nungi oli aruli ta asü.

¹⁶Filistia nungbai anogo lirnü tashi anepdang aser nikongtsütsü adoka kasaji jembia noktak.

¹⁷Yesse-i par jabaso Dawid dang ashi, “Tang nedi nunger asoshi iba kongnüng efa ka, aser item amtsük ter benang, aser itemji kara-a nedi nunger tanendaki bener oang.

¹⁸Aser item mamatzülong ter, meyi madak tir dangi benang, aser nedi nunger kodasa ali reprangang, aser parnok indang jungjunga metetang.”

¹⁹Tang Saul, aser Israel nisung ajak, Ela lenten nung Filistia nunger den rara-a liasü.

²⁰Dawid anepdang yakta shishi aser santemji tanüker nem toktsür tebu Yesse-i ashiba ama renemer apuso. Aser temerangertemji tongbang asoshi washia taren sena noktakya lia pai tanendakji tonga aru.

²¹Filistia aser Israel nunger temerangertemji tongbang asoshi tejak o tejak na jitepa noktaka liasü.

²²Dawidi pa khuji chiyungtsü anebalur tanishirtem nem yutsür tongbanglen jagi pa tedi nunger dangi asema oa parnok koma lir ta asüngdang.

²³Pai parnok den jembia alidang Filistia nunger walunir Gat nunger Goliati parnok taren nungjagi adoka mezüng ama kasa oji jembi, aser Dawidia itemji angashi.

²⁴Kodang Israel nungertemi nisungbaji angu, parnok ajaki tetsübu nung pa nungi ajen.

²⁵Israel nungertemi ashi, “Tang atua aliba nisungji nenoki angur südi? Israel jazüktsü pa atua lir. Shibai iba nisungji tepsetdir chubai pa rongsen tulu agi paji takar kümdaktsütsü aser pa nemji pa jala agidaktsütsü, aser pa tebuer kibong Israel nung ali melen kecha magi-i sademsadema lidaktsütsü ta nangzükogo.”

²⁶Dawidi pa anasa noktaka alirtem dang asüngdang, “Nisung shibai iba Filistia nungbaji tepsetdir aser Israel maksü nungi kümzükdir pa sempetji kechi asütsü? Taküm Tsüngremer temerangertem jazüktsüba iba memejeptokba Filistia nunger ya shiba?

²⁷Shibai iba nisungji tepsetdir pa sempetji yamai alitsü ta nisungtemi pa dang langzü.”

²⁸Pai nisungtem den jembia alidang tedi tambusang Eliabi angashi, aser Dawid anema Eliab ain adoka ashi, “Na kechiba alu? Aser san ishikato arem nung shiba den toktsü? Na asüakümba aser ne mulungjang majungba ni metet; kechiyong tongbang reprangdangtsü na alua lir.”

²⁹Dawid ashi, “Ni tang kechi inyak aji o ka dang masü no?”

³⁰Aser pai pa nungi tangar tsütsü meyip, aser iba amajisa jembi; aser nisungtemi tanaben mezüng amajisa langzü.

³¹Kodang Dawidi jembiba otem angashi, parnoki item Saul dang metetdaktsü; aser pai pa ajai yok.

³²Dawidi Saul dang ashi, “Pa indang shinga temulung makai teli. Ne tenzüker aotsü aser iba Filistia nungba den raratsü.”

³³Sauli langzü, “Iba Filistia nunger anema pa den raratsü na aotsü makok; kechiyong na tanur ka dang aser pa lanuwa nungi raraba nisung lir.”

³⁴Dawidi Saul dang ashi, “Ne tenzükeri pa tebuer san anük; aser kodang molusongzü ka mesüra shirem ka arua san telok nungi san chanu ka bener ao,

³⁵ni iba sülen oa, pa tepset aser pa tebang nungi aji kümzük, kodang pai ni anema noktak, ni pa bangsemo nung am, aser pa dak zükokja pa tepset.”

³⁶Ne tenzükeri molusongzü aser shirem anaprong tepset aser iba memejeptokba Filistia nungbai taküm Tsüngrem temeranger telok sensatsü nungji, parnok rongnung ka mesüka pa-a alitsü.

³⁷Dawidi ashi, Molusongzü kabu nungi aser shirem kabu nungi ni kümzükba KIBUBA, pai ni Filistia nungba ket nungi kümzüktsü. Sauli Dawid dang ashi, “Oang, KIBUBA ne den liang.”

³⁸Sauli pei sobutsü Dawid nem sobutsü, aser pai pa tekolak nung yongmenyin korang semoktsü, aser pai pa merang sobutsü agi sobutsü.

³⁹Dawidi pa nok pa sobutsü manung asem, aser pai aotsü merang, saka makok; kechiaser pai itemji yimya mesüpa, aser Dawidi Saul dang ashi, “Ni item deni aotsü makok; kechiyong ni item agi yimya mesüpa” aser Dawidi itemji sepzük.

⁴⁰Pai pa ket nung mechi am, aser ayong nungi lung tesüsü pungu pa asoshi shimtet, aser pai abenba sannükdang amshiba shiküp juli nung enok, aser pa ket nung lung yokba shiküp liasü; aser pai Filistia nungba anasa ao.

⁴¹Filistia nungba Dawid anasa aru aser pa jong abenba pa jakdang ao.

⁴²Kodang Filistia nungbai meketa reprang, aser Dawid angu, pai pa atalatsü; kechiyong pa aso-ajen aser tobur tajung tanur ka liasü.

⁴³Filistia nungbai Dawid dang ashi, “Na kü dangi mechi amer arutsüba, ni azüa na?” Aser Filistia nungbai pei tsüngremtem tenüng atemer Dawid ataka jembi.

⁴⁴Filistia nungbai Dawid dang ashi, “Kü dangi arung, aser ni ne shi anüng ozü aser arem shiruru nem agütsütsü.”

⁴⁵Idangji Dawidi Filistia nungba dang ashi, “Na kü dangi nok, nü aser sangja bener arur: saka nibo nai sensatsüba Israel temeranger telok Tsüngrem, Temeranger KIBUBA tenüng nung ne dangi arur.

⁴⁶Iba anogo KIBUBAi na kü ket nung bendanga agütsütsü; ni ne dak azüktsü, aser na nungi ne kolak leptoktsütsü, aser Filistia nunger telok tasü mang ni anüng ozü aser arem shiruru nem agütsütsü, ajagi alima ajaki Israel nung Tsüngrem ka lir ta metettsü.

⁴⁷Aser item tesenteper ajaki KIBUBAi nok aser nü agi mekümzüker ta metettsü; kechiyong tongbangji KIBUBA meyong, aser pai onok ket nung na agütsütsü.”

⁴⁸Kodang Goliat aramesoa Dawid den ajuruteptsü anasa aru, Dawid yakta ao, aser Filistia nungba den ajuruteptsü temeranger telok tsütsüi asem.

⁴⁹Dawidi pei teka juli nung amuok, aser iba nungi lung ka agiteta ondaktsü, aser Filistia nungba dak tenütsü nung aon; aser lungji pa tekolaki ai, aser pa tejak rembanga ali nung lao.

⁵⁰Anungji Dawidi Filistia nungba madak lung yokba shiküp ka agi takok angu, aser Filistia nungba dak aon, aser pa tepset; saka Dawid ket nung nok mali asü.

⁵¹Idangji Dawid asem aser Filistia nungba manung noktak, aser pa nokji atsüteta pa tekolak tangzük. Kodang Filistia nungeri parnok walunir asübaji angu, parnok jena ao.

⁵²Idangji Israel aser Yihuda nisungtemi tashi agi ayimtena aramesoa Gath tashi, oda Ekron süngkhümbongtem tashi Filistia nungertemji parnoki aria ao, anungji teyirur Filistia nungertemji lenmang nung Sharaim nung Gath aser Ekron tashi lao.

⁵³Aser Israel chirtem Filistia nunger sülen aria aoba nungi meyip aser parnoki parnok tanendak amak.

⁵⁴Aser Dawidi Filistia nungba tekolak agi, aser aji Yirusalemi bener aru; saka pai pa nok o nü pa süki nung ayu.

⁵⁵Kodang Filistia nunger anema Dawid aoba Sauli angu, pai temeranger telok tanishiba Abner dang ashi, “Abner iba asangur ya shir chir?” Abneri ashi, “Oh chuba, ni ashitsü makok.”

⁵⁶Chubai ashi, “Asangubaji shir chirar nai asüngdangtepang.”

⁵⁷Filistia nunger tepsetba nungi Dawid meyipa arudang, Abneri pa ania aru, aser pa Saul madangi pa ket nung Filistia nungba tekolak amer anir aru.

⁵⁸Sauli pa dang asüngdang, “Asangur, na shir chir?” Dawidi langzü, “Ni Bethlehem nunger ne tenzüker Yesse chir lir.”