Read njo 1 SAMUEL 19 Bible Online

1 SAMUEL 19 - njo bible

1 SAMUEL 19

¹Sauli par chir Yonathan aser pa tenzüker ajak dang pai Dawid tepsettsü sentongji ashi. Saka Yonathani Dawid kanga meim,

²anungji pai Dawid dang ashi, “Kübu Sauli na tepsettsü bushir, ne sasa asüngnep mita liang, shingaia mangutsüsa temiimdak kati oa atsüka liang.

³Ni na alidak moapu jagi oa kübu dang ne indang jembiteptsü; aser ni langka danga lazükra ne dang ashitsü.”

⁴Yonathani tebu Saul dang Dawid indang tajung jembia ashi, “Chubai pei tenzüker Dawid dak tamajung tebenshima; kechiaser pai na anema tamajung kecha mebenshi, aser pai kechisa inyak aji na asoshi tajangzük dang liasü.

⁵Kechiaser pai Filistia nunger den raradang pai pei taküm bendanga agütsü, aser KIBUBAi Israel ajak asoshi takok tulu agütsü. Nai aji ngua na pela-a liasü. Sürabangla kecha kuli maka sür kechiba nai tai maketba nisung Dawid tepsetba agi temenen menatsü?”

⁶Sauli Yonathan o anga aser pai azüngashi, “Atangji KIBUBA taküm alinung, ni Dawid metepsettsü.”

⁷Yonathani Dawid aja aser item ajakji ashi. Pai Saul dangi Dawid anir aru, aser akhi ama pai pa tsüngdang liasü.

⁸Tanaben rara adoka Dawidi Filistia nunger den oa rara; pai parnok jenti tepset aser parnoki pa nungi ajen.

⁹Saul pei ket nung nü amer mena alidang tanela tamajung ka KIBUBA nungi pa madaki aru; Dawidi kongki temya liasü.

¹⁰Sauli pei nü agi Dawid jara nung menaloka atsüngtsü merang saka Dawidi ibaji paitok aser Saul nüji jara nungji tsüngoktsü. Paonungji Dawidi jenteta liasü.

¹¹ Paonungjisa Sauli Dawid mita atatsü aser tasüngnepji tepsettsü asoshi nisung kar yok. Saka Dawid kibutsü Mikali pa dang ashi, “Ne taküm asoshi taonung nai mejenra asüngbo na tepsettsü.”

¹²Anungji Mikali kichiba ajanga Dawid ajongzüka yoka jendaktsü.

¹³Idangji Mikali kidang aliba süngyanglu ka bener arua iba kolak nungji nabong züng ataloka yutsü aser aji yipten ka nung sü agi meibanger yutsü.

¹⁴Kodang Dawid aputsü asoshi Sauli nisungtemji yok, Mikal ashi, “Pa shiranga lir.”

¹⁵Idangji Sauli nisungtemji Dawid reprangtsü tanaben yoka ashi, “Ni pa tepsettsüsa pa yagi yipten nungji bener arung.”

¹⁶Saka kodang nisungtemji kilungi ait, yipten nung süngyanglu kolakji nabong züng agi meibanger liasü.

¹⁷Sauli Mikal dang ashi, “Kechiba nai ni yamai ashioktsür, aser kü tsükchir jenbudaktsü?” Mikali Saul dang langzü, “Pai kü dang ashi, ni odakjang, mesüra ni na tepsettsü.”

¹⁸Kodang Dawid jenteta ao, pai Ramai Samuel dangi arua Sauli pa dak inyakba ajak pa dang ashi. Idangji pa aser Samuel Naioti oa idakji ali.

¹⁹Iba osangji Saul dang ya oda metetdaktsü, “Ajiang Dawid Rama nung Naiot nung lir.”

²⁰Anungji pai pa aputsü nisungtem yok. Saka kodang ainkar telok ka Samuel lenir sür ainkar o shina jembiba parnoki angu, Tsüngrem tanela parnok madaki alu, aser parnokia ainkar o shina jembi.

²¹Kodang iba indangji Saul dang ashi, pai ano nisung tali yok, aser parnokia shin o jembi. Anungji Sauli tasembena nisungtemji yok, aser parnokia shin o jembi.

²²Idangji pa-a Ramai ao, aser Seku nung aliba tzübu tulu jagi aru aser pai asüngdang. “Samuel aser Dawid kong ali? Kati ashi, parnok Rama nung Naiot yim nung lir.”

²³Pai Rama nung aliba Naiot len jagi ao, saka Tsüngrem tanela pa madakia alu, aser pai Naiot matong tashi ainkar o shina aru.

²⁴ Pai pei süoshi agizüka yur Samuel madang ainkar o shina jembi. Aser iba anogo tepiyong aser aonung tepiyong mangsa ontaka ali. Anungji iba shin o ya parnoki ashi, “Ainkar rongnung Saula aden asü?”