Read njo 1 SAMUEL 2 Bible Online

1 SAMUEL 2 - njo bible

1 SAMUEL 2

¹ Idangji Hannai sarasadem aser ashi, kü mulungjangi KIBUBA nung pelar; KIBUBA nung kü jangzü tashi tematibai ajungketa lir. Kü tebang kü tsükchir anema lapoka lir, kechiaser ne tekümtetba nung ni pelar.

²KIBUBA ama shinga temeshi mali; ne dak alema tangar shinga mali, ozü Tsüngrem mesükba tangar Lung kecha mali.

³Joko asüküm o kanga tejembi mesüra ne bang nungi mezümeküm o tatokdaktsü, kechiaser KIBUBAji temetetba Tsüngrem ka lir, aser pai pa mapatemji odanger.

⁴Temerangertem lijak raksaogo, saka tashi maitertem tashi agi nangri kanga lir.

⁵Shirnok tepok sünga liasü, parnok chiyungtsü asoshi ayangi ao, saka yaseta alirtem joko mayar. Shiba tapung liasü lai tanur tenet soja lir, saka tanur aika asola rongjenseta lir.

⁶KIBUBAi tepseter aser taküm agütsür, leperi bener alur aser bener adokdaktsür.

⁷KIBUBAi takar aser sensaker yanglu. Pai ajemaludaktsür aser ajungketer.

⁸Tamarenertem den mendaktsütsü, aser parnok nem tetushi menden amangdaktsütsü asoshi Pai auyi nungi sensaker mesor, timtem nungi mokokminer ajungketer; kechiaser alima tongshitemji KIBUBA meyong lir, aser item madak pai alimaji yutsü.

⁹Pa temeshipur tetsüng pai nüka alitsü, saka tamajungpur ammang nung ola makai yutsütsü; kechiaser nisung tashi agi dangbo takok mangutsü.

¹⁰KIBUBA den toktepertem anüka ajensatsütsü, parnok anema Pai anüng nungi tsüngmok atentsü. Alima ajonga KIBUBAi o bendangtsü, pai pa chuba nem tashi agütsütsü, aser pai mezüja shimtetba tashi uludaktsütsü.[2]

¹¹Idangji Elkana pei kidangi Ramai ao, saka tanur Samueli Eli putir madang Shilo nung KIBUBA tenzük.

¹²Eli jabasotemji samesa nisung liasü. Parnoki KIBUBAji mezüngok.

¹³Putirtemi yimsü amato nübur den yamai inyaka liasü; kodangsa nisungtemi tetepsetba tenla agütsüdir, putir tenzüker jagi shi metaya alidak jagi tatutsü asem aketba shijok ka bener arutsü.

¹⁴Po koba nung shiji metaya lidir idakji pai shijokji tuoktsütsü, aser shijok jagi tutetba ajakji putir meyong asütsü. Shiloi arur Israel nunger ajak dang parnoki yamaji inyak.

¹⁵Ano temoji marongdang yongi putir tenzüker jagi tetepsetba tenla agütsüba nisung dang ashitsü, “Putir asoshi asangtsü shi agüjang, kechiaser pai na nungi tasoba shi masü tazü dang agitsü.”

¹⁶Saka nisungba jagi, “Asenoki temoji tamasa rongdi, ajiser nai kechisa aginür agiang” ta shira idangji putir tenzüker jagi ashi, “Masü nai aji kü nem tangsa agütsütsüla, aji mesüra ni tashiyim agi aji rakzüka agitsü.”

¹⁷Yamaji asangurtem temenenji KIBUBA madang tulu liasü, kechiaser nisungtemi KIBUBA dang tenlabaji parnoki yamaji mezüngmeshi.

¹⁸Saka Samuel tanur ka dang aser KIBUBA madang, temeshi putir sobutsü kümpa sü agi nangri kanger tenzük.

¹⁹Ano küm shia tetsüi pa nem süpoksü tila ka yanglutsü, aser la kinungpu den küm shia tetepsetba tenla tenlatsü la atudang, aji küm shia bener arutsü.

²⁰Aser Eli-i Elkana aser tebutsü moaja ashi, “KIBUBA asoshi agütsüba melena, KIBUBAi iba tetsür agi ne nem metsü agüjangma.” Aser parnok pei kidangi ao.

²¹Aser KIBUBAi Hanna semdang aser la mashisa aküm, aser jabaso asem, aser jala ana aso. Aser tanur Samuel KIBUBA madang ain.

²²Tang Eli kanga tambur aküm; aser Israel ajak dang par jabasotemi inyakba, aser koda sentep süki kikümbang nung tenzüker tetsürtem den parnoki nüktapangta benshiba, ajak pai angashi.

²³Aser pai parnok dang ashi, “Kechiba nenoki ibala mapa inyaker, kechiyong nenoki tamajung benshiba iba nübur ajak nungi ni angashir.

²⁴Masü, kü chirtem kechiyong ni angashiba osang ya tajung masü; nenoki KIBUBAr nüburtem ozüng raksadaktsür.

²⁵Nisung kati ka anema temenen menara, Tsüngremi pa bendangtsü; saka nisung kati KIBUBA anema temenen menara, shibai pa asoshi mepishitsü?” Aji sakasa parnoki tebu o manga, kechiaser KIBUBAi parnok tepsettsü mulungteter liasü.

²⁶ Aser tanur Samuel tain aküm, aser KIBUBA aser nisung anaprongla den yimli angu.

²⁷Tsüngrem nisung ka, Eli dangi aru, aser pa dang ashi, “Yamai KIBUBAi ashir, Ni nebu kidong dangi parnok Ijip nung Farao kidang alarsa alidang kü sasa jungkai madok no!

²⁸ Israel kidong ajak nungi kü putir asütsü, kü tenladaki atutsü, liangmesen arongtsü, kü madang putir temeshi sobutsü agitsü ni pa meshimtet no, aser Israel chirtemi tenlaba ajak ni nebu kidong nem magütsü no?

²⁹Ajangla, kechiba ni lateta yutsüba kü tetepsetba tenlatem aser tenlatenjitemji nenoki mezüngmeshir? Kü nübur Israel puri tenlaba tajungtiba ajak agi nenok sasa teyiraba kümdaktsüba ajanga kü dang nungibo tali ne chirtem tushir?

³⁰Anungji KIBUBA, Israel Tsüngremi ashir, ni atangji ne kidong aser nebu kidongi teti kü madang jajatsüla ta ashi: saka tang KIBUBAi ashir, aji kü dang nungi talangka piladakjang; kechiyong kü akhüm tsüburtem asoshi ni akhüm tsübutsü aser ni sensamasatsürtem ni hau ta mezüngshitsü.

³¹Ajiang, ne kidang tambur kata malitsüsa ni ne tashi aser nebuer kibong tashi leptoktsütsü anogotem arudagi.

³²Aser Israel nem azükaru agüjaka kü kidang toushi angutsü; aser ne kidang teti asoshi tambur kata malitsü.

³³Aser ner nisung shiba ni kü meyong tenladak nungi melepdoki yuja ali, pa jagi ne tenük raksatsütsü aser ne mulungjang jashidaktsütsü alitsü; aser ne kidang nungi adokba ajak tebenjem mapang asütsü.

³⁴ Aser ibaji jabaso ana Hofni aser Finehas madak ataloktsü, ibai na asoshi temaitsü alitsü; tenaprongla asütsü.

³⁵Aser ni asoshi ni temulung alemba putir ka, kü mulung aser shisatsü nung aliba ama inyaktsüsa adoktsütsü, aser ni pa asoshi kidong ka yanglutsü; aser pai teti asoshi totzü mezüa kü teshimtetba madang jajatsü.

³⁶Aser ne kidong anünga alir shiai pa dangi arua apudaka ashitsü, ‘Yimlibilema taribi telong ka aser amtsük tebang ka danga achitsüsa putir mapa kar nung nia enokjangma.’ ”