Read njo 1 SAMUEL 20 Bible Online

1 SAMUEL 20 - njo bible

1 SAMUEL 20

¹Idangji Rama nung Naiot nungi Dawidi ajen aser Yonathan dangi arua asüngdang, “Ni kechi inyak? Kü tai kechi aser nebui kü taküm bushitsüsa pa madang kü temenen kechi?”

²Yonathani langzü, “Yamaji kodanga masü. Na masütsü. Ajiang mapa tulu saka tila saka kübui kü dang memetetdaktsü kecha meinyaker, aser kechiba kübui ibaji kü dang nungi miimtsü? Aji kodanga yamaji masü.”

³Saka Dawidi azüngashia ashi, “Nai ni koda meim aji nebui jungjunga meteta kar, aser na jashia lir ta pai ne dang aji memetetdaktsü. Atangji KIBUBA tenüng atemer aser ne tenüng nung ni shidi, ni aser tasü na tsüngda nung jenjang ka dang lir.”

⁴Idangji Yonathani Dawid dang ashi, “Nai kü nem kechisa inyakdaktsünür aji oda ni inyaktsü.”

⁵ Dawidi langzü, “Ajiang, asüng Ita Tasen benjong lir, aser ni chiyungdak chuba den medeni malitsüla, saka nai ni moapu jagi yokang aser yanü tashi ni atsüka atadi.

⁶Ni madenbaji metetra pa dang shiang, Dawidi kü dang par yimti Bethlehemi ilunga aotsü kanga mepishi;” kechiaser kinunger ajak yangji küm shia tetepsetba tenla agüja arur.

⁷“Junger ta pai shira ne tenzüker kümzüktsü saka pai ain adokra pai ni tepsettsü mulungteta lir ta nai metetang.

⁸Anungji ne tenzüker dang meima benshiangma, kechiaser nai ne tenzüker den KIBUBA madangi tezüngzüktepba dangi aitogo. Saka kü tai lirabang ne sasa ni tepsetang, kechiba nai ni nebu dangi anir aotsü?”

⁹Yonathani ashi, “Aji oda kodanga masü, kübui ne dak tamajung inyaktsü mulungteta lir ta ni metetra aji ni ne dang mashitsü no?”

¹⁰Idangji Dawidi asüngdang, “Nebui ne dang sashia langzü nunga ibaji shibai kü dang ashitsü?”

¹¹Yonathani Dawid dang ashi, “Arung anabo moapu jagi odi.” Anungji tenaprongla moapu jagi ao.

¹²Idangji Yonathani Dawid dang ashi, “Israel Tsüngrem KIBUBA asenok kuli sangma, kodang iba mapang kasa nung asüng mesüra yanü ni kübu dang asüngdangtsü. Ne tsütsü tajung lira ni ne dangi osang yoka metetdaktsütsü no?

¹³Saka kübui ne dak tamajung inyaktsü alibaji ni meteter ne dang aji meshira aser na jenteta meyokra; KIBUBAi Yonathan dak tali benshiang.

¹⁴Saka ni taküm ali tashibo KIBUBAi sayuba ama kü dang yimlibilem sayuangma, aser nia taküm alitsü.

¹⁵ Aji oda kodang KIBUBAi Dawider tsükchirtem ajak alijak nungi leptokdanga ozü kibongbo teleptokma.

¹⁶Aser Yonathani Dawider kibong den tezüngzüktepba yanglua ashi,KIBUBAi Dawid tsükchirtem ket nungi aji akhangtsü.”

¹⁷Anungji Yonathan o Dawid nati temeim agi iba tezüngzüktepbaji akangshi kechiaser pai pei taküm ama pa meim.

¹⁸Idangji Yonathani ashi, “Asüng Ita Tasen benjong lir, na madenbaji metettsü kechiaser ne mendenji tazüng alitsü.

¹⁹Yanüjiang ano na malibaji tali metettsü, anungji na tanga mapang nung atsüka alidakji oa ne sasa Ezel lung sülenji atsüka atang.

²⁰Langka dak akar amai iba tsütsüji ni lijakjang asem kaloktsütsü.

²¹Aser ni kü kilir ka yoka itemji bener arung ta ashitsü. Ni pa dang: Ajiang lijakjangji ne tsütsü lir, aji bener arung ta shira; idangji na arung, kechiaser KIBUBA taküm alinungji na asoshi yimjung alitsü.”

²²Saka ni kilir dangji, “Lijakjangji na atena oa lir ta shira, idangjibo ne lenmangi ajentsüla, kechiaser KIBUBAi na yoka lir.

²³Aser ana tsüngda tezüngzüktepba atema kechi ali, KIBUBAi aji teti ayutsü.”

²⁴Anungji Dawid alu nung atsüka ali, aser Ita Lanu benjong nung chubai chiyungdak pei sasa amen.

²⁵Akhi ama pai jara anasa pa menden nung amen. Abner Saul anasa amen, aser Yonathan tebu den tejak jitepa amen; saka Dawid mendenji tazüng liasü.

²⁶Saka panüji Sauli kecha mashi, kechiaser pai bilem oda “pa dak langka atalok südi aser ajagi pa memerükteti lir.”

²⁷Tasüngji aji Ita Lanu benjong sülenjia Dawid mendenji tazüng liasü. Sauli pei chir Yonathan dang asüngdang, “Kechiba Yesse chir Dawid yashi o tanü na chiyungdaki marur?”

²⁸Yonathani Saul dang langzü, “Dawidi kü dang Bethlehemi aotsü kanga mepishi.

²⁹Pai ashi, ‘Ni ne dang mepishir, ni odakjang; kechiaser ozü kinunger yimti nung tetepsetba tenla ka lir; aser küdi-i yangji adentsü kü dang ashi, aser tang, ni ne dang yimli ngura ni odakjang, ni ne dang mepishir aser kü adianutem dang nguyudakjang. Anungji pa chubar langbangi maru.’ ”

³⁰Idangji Yonathan anema Saul ain adok; aser pai pa dang ashi, “Na mashileni aoba tashi mangala tetsür chir, na pei maksütsü aser netsü mangsa aliba maksütsü atema Yesse chir nai shimtet ta ni memetet no?

³¹Kechiyong Yesse chir alima nung ali tashi, na aser ne yimli metoktsütsü, anungji tang yokang aser pa anir arung kechiyong pa atangji asütsüla.”

³²Yonathani tebu Saul dang langzü, “Kechi atema pa südaktsütsü? Pai kechi inyak?”

³³Sauli pa tepsettsü pa nü tsüloktsü; aji agi Yonathani, tebui Dawid tepsettsü mulungtet ta metet.

³⁴Anungji Yonathan kanga ain adoka langbang nungi arameso, aser ita lanu benjong tananübuba nung chiyungtsü kecha mechiyung; kechiyong pai Dawid asoshi jashia liasü, kechiaser tebui pa dak maksütsü inyak.

³⁵Anepdang Dawid den jembiba mapang nung Yonathani tanur ka anir aremi ao.

³⁶Pai tanur dangji ashi, “Asümang, ni yokba lijakjangtemji tang bushiang.” Aser tanurji asema aodang, pai pa sülen lijakjang ka pa atena kadok.

³⁷Kodang Yonathani kadokba lijakjang alidak jagi tanurji aru, Yonathani tanur sülen ayimten aser ashi, “Lijakjangji na atena or mali no?”

³⁸Yonathani tanur sülen ayimtena ilungang, kara kara-a oang, anena teli ta ashi; aser tanur jagi lijakjangji benden Yonathan dangi bener aru

³⁹Saka tanur jagi kecha memetet, Yonathan aser Dawid nati dang aji metet.

⁴⁰Yonathani pei nok o nü pa tanur nem agüja ashi, “Oang, itemi yimti jagi bener iang.”

⁴¹Tanurji oli dang Dawidi lungnang tsüngda nungi shishi aser pa tejak alilen mechiok aser asemben apudak; aser tena tebang meseptep aser külemi ajeb, Dawidi tashi agi ajeb aser kati ka den jebtep.

⁴²Yonathani Dawid dang ashi, “Tesünep nung oang, kechiaser anapronglai KIBUBA tenüng nung azüngashitepa lir, KIBUBA ni aser ne tsüngda, kü metsü aser ne metsü tsüngda nung teti liang.” Dawid aramesoa pila-a ao, aser Yonathana yimti-i ai.