Read njo 1 SAMUEL 22 Bible Online

1 SAMUEL 22 - njo bible

1 SAMUEL 22

¹ Dawidi yang nungjagi pila aser Adullam lungpok nung jenok. Kodang pa adianutemi aser kinunger ajaki aji angashi, parnok ajak ajagi ao.

²Aser nisung shirnok tajemzük tia nung sentsühtsürtem aser temulung mechi-i alirtem ajak külemi pa dangi senden, aser parnok madak pa tanishir aküm. Parnokji nisung noklang pezü shi liasü.

³Yang nungjagi Dawidi Moab lima Mizpai ao, aser Moab chuba dang ashi, “Tsüngremi ni asoshi kechi inyaktsü aji ni memetet tashi, kübu aser kütsü nenok den arua lidakjangma.”

⁴Aser pai parnok Moab chuba madangi anir aru: aser Dawid mitsa nung aliba mapang tepiyong pa den liasü.

⁵Aser ainkar Gadi Dawid dang ashi, “Mitsa nung teli, aenshiang, aser Yihuda limai iang.” Idangji Dawidi aenshia ao, aser Heret aremi aru.

⁶Sauli Dawid aser pa den aliba nisungtem bushitetogo ta angashi: tang Saul pa ket nung nü amer, aser pa tenzüker ajak pa anasa noktaka lia Rama tenem kolak nung tamarisk süngdong kübok Gibea nung mena liasü.

⁷Sauli pa anasa noktaka alir tenzükertem dang ashi, “Nenok Benjamin nüburtem, angang! Yesse chiri nenok nisung shia nem alu aser tsükmenatzü lu agütsütsü asü? Pai nenok ajak meyirijang madak tanishir aser noklang madak tanishir kümdaktsütsü asü?

⁸Oda nenok ajaki ni anema tasa asa aser kodang kü chiri Yesse chir den azüngashi aji kü dang metetdaktsütsü shinga mali aser ni asoshi jashia bilemtsür nenok rongnung shinga mali; mesüra kü chiri ni anema kü tenzüker ajiokja, tanü anogo amai mita aliba kü dang memetetdaktsür no?”

⁹ Idangji Saul tenzüker madak aliba Edom nunger Doegi langzü aser ashi, “Ni Yesse chir Nobi Ahitab chir Ahimelek dangi aruba nguogo.

¹⁰Pa indang pai KIBUBA dang asüngdang, aser pa nem chiyungtsü agütsü aser pa nem Filistia nunger Goliat nok agütsü.”

¹¹Idangji chubai Ahitab chir Ahimelek putir, aser pa tebuer kidang-kimang ajak Nob nung aliba putirtem ajatsü yok: aser parnok ajak chuba dangi aru.

¹²Sauli ashi, “Tang angang, na Ahitab chir” aser pai langzü, “Yangi ni lir, kü kibur.”

¹³Aser Sauli pa dang ashi, “Pai ni anema apusotsü aser tanü anogo amai ni mita ata-a alitsü kechiba nenoki ni anema tasa asa, oda nenoki Dawid nem amtsük, aser nok ka agütsü, aser pa indang Tsüngrem dang asüngdang?”

¹⁴Idangji Ahimeleki chuba dang langzüa ashi, “Ne tenzüker ajak rongnung Dawid ama, shiba nanük lir, aser ne taküm anüker madak tanishiba lir, aser ne kidang tushia lir, pa ama temulung alemba shiba lir?

¹⁵Tanüang ni pa indang Tsüngrem dang asüngdang asü? Aji oda kodanga masü: chubai pei tenzüker dak mesüra par kidang-kimang dak kecha tai tagütsüma; kechiyong ne tenzükeri ya ajak ajema mesüra talia kecha memetet.”

¹⁶Chubai ashi, “Atangji na asütsü, Ahimelek, na aser ne kidang-kimang ajak.”

¹⁷Chubai pa anasa noktakba pa anüker dang ashi, “Meyipang aser KIBUBA putirtem tepsetang; kechiaser parnok teka Dawid den lir, kechiaser pa jena ao ta parnoki metet, aser aji kü dang memetetdaktsü.” Saka chuba tenzükertemi parnok teka KIBUBA putirtem dak mesangtet.

¹⁸Chubai Doeg dang ashi, “Na meyipang aser putirtem dak teka sangang, aser Edom nunger Doegi meyip aser pai putirtem dak teka asang, iba anogo nung pai putir temeshi sobutsü sobur nisung tir-pungu tepset.”

¹⁹Aser putir yimti Nob pai nok agi tebur aser tetsür, tanur aser mamayonger, nashi pungchitem, gado aser santem lepset

²⁰Ahitab chir Ahimeleker par chir rongnung ka tenüng agi Abiathar jentet, aser Dawid sülen jena ao.

²¹Abiathari Dawid dang KIBUBA putirtem Sauli tepsetogo ta ashi.

²²Dawidi Abiathar dang ashi, “Kodang Edom nungba yangji liasü, pai atangji Saul dang ashitsü ta ni iba anogo nung metet; nebur kidang-kimang ajak asüba atema kü khu lir.

²³Na kü den liang, tetsübu, kechiyong shibai kü taküm bushir, ne taküma bushir: saka kü den na kümzüka lir.”