Read njo 1 SAMUEL 23 Bible Online

1 SAMUEL 23 - njo bible

1 SAMUEL 23

¹Parnoki Dawid dang ashi, “Ajiang, Filistia nungeri Keila anema raradagi, aser parnoki motsüngnem rakzükraktemdagi.”

²Aji asü nung Dawidi KIBUBA dang asüngdanga ashi, “Item Filistia nunger den raratsü ni aotsü asü?” KIBUBAi Dawid dang ashi, “Oang, aser Filistia nunger den rara-ang, aser Keila kümzükang.”

³Saka Dawid nüburtemi pa dang ashi, “Ajiang, yangi Yihuda nung asenok tsübuseta lir: Filistia nunger telok anema asenok Keilai odi süra koda tali asütsü?

⁴Idangji Dawidi KIBUBA dang ano tanaben asüngdang. KIBUBAi pa dang langzü, Aramesoang, Keilai luang: kechiyong ni Filistia nungerji ne ket nung bendanga agütsütsü.”

⁵Dawid aser pa nisungtem Keilai oa, Filistia nunger den rara, aser parnok kiset shirurutem bena aru, aser parnok jenti tepset. Yamaji Dawidi Keila nungertem kümzük.

⁶Kodang Abiathar Ahimelek chir Dawid dangi Keilai jena ao, pai pa ket nung putir temeshi sobutsü bener alu.

⁷Dawid Keilai arua lir ta Saul dang ashi: aser Sauli ashi, “Tsüngremi kü ket nung pa agütsüogo; kechiyong süngkhüm aser tartangtsü aliba yimti kati ait nungji pa shibanga lir.”

⁸Aser nisung ajak dang raratsü Keilai alutsü, Dawid aser par nübur makbangtsü Sauli mela.

⁹Dawid anema Sauli tamajung tasa asa ta meteta pai Abiathar putir dang ashi, “Yagi putir temeshi sobutsü bener arung.”

¹⁰Idangji Dawidi ashi, “Oh KIBUBA Israel Tsüngrem, ni atema yimti samatsütsü Sauli Keilai arutsü angashir.

¹¹Keila nisungtemi ni pa ket nung bendanga agütsütsü no? Ne tenzükeri angashiba ama Saul alutsü asü? Oh KIBUBA Israel Tsüngrem, ni ne dang mepishir, ne tenzüker dang shiangma.” KIBUBAi ashi, “Pa alutsü.”

¹²Idangji Dawidi ashi, “Keila nisungtemi ni aser kü nübur Saul ket nung agütsütsü asü?” KIBUBAi ashi, “Parnoki na bendanga agütsütsü.”

¹³Idangji Dawid aser pa nisungtem shirnok noklang trok shi liasü, arameso aser Keila nungi pila, parnoki otetleni ao. Dawid jenteta ogo ta Saul dang ashi nung pa moteti aküm.

¹⁴Dawid arem nung mitsa nung ali, aser Zif arem tenem linük nung ali; aser Sauli anogo shia pa bushi, saka Tsüngremi pa ket nung bendanga magütsü.

¹⁵Tang Dawidi tsübua liasü, kechiaser pa taküm bushitsü Saul Zif arem Hores nung adoka liasü.

¹⁶Tang Saul chir Yonathan aramesoa Dawid dangi Hores ao, aser Tsüngrem dak tasü aittsü pa ajongshi.

¹⁷Pai pa dang ashi, “Tetsübu kechiyong kübu ket agi na magitsü aser na Israel madak chuba asütsü, aser ne den atongba ni asütsü, aser ajia kübu Sauli meteter.”

¹⁸ Tenapronglai KIBUBA madang tezüngzüktepba yanglu; aser Dawid arem nung ali, aser Yonathan pei kidangi ao.

¹⁹ Idangji Zif nunger Saul dangi Gibeai atua ashi, “Dawidi ozü litsü Hores linük Hakela tenem koba lisem lima anüolentip nung lir, idakji pei sasa atsüka mali no?

²⁰Anungji tang Oh chuba, kodang nai lunüdir alungma; aser chuba ket pa bendanga agütsütsübaji onok teinyaktsü asütsü.”

²¹Sauli langzü, “Nenoki kü dang meimba asoshi KIBUBAi nenok moajang.

²²Oang aser pa kong lir aser shibai pa idakji angu iba indang kanga junga metetang, kechiaser pa kanga tekülak ta ni angashiogo.

²³Pai kongsa miima jenoker itemji kanga junga metetang aser osang tejangja bener kü dangi arung. Idangji ni nenok den aotsü, aser pa linük nungji lira oda Yihuda kidong ajonga nung ni pa arishitsü.”

²⁴Anungji parnoki Saul dang tama Zifi ao. Tang Dawid aser pa nisungtemji Araba nung Yeshimom anüdoklentip aliba Maon arem nung liasü.

²⁵Saul aser pa nisungtem Dawid bushitsü apuso. Saka pai aji angashia lung jagi alu aser Maon arem nung ali. Kodang Sauli aji angashi, pai Dawid aputsü asoshi Maon arem jagi alu.

²⁶Saul külen tsütsü tenemleni ao, aser Dawid o pa nisungtem tenem külen tsütsüi ao; aser Dawidi Saul tsübuba agi ilunga oadoknü; kechiyong Saul aser pa nisungtemi Dawid lungbang aser pa nisungtemi parnok aputsü meketbanga liasü.

²⁷Saka osang abener ka Saul dangi arua ashi, “Na iluangang, aser arung, kechiaser Filistia nunger yimaki arua lir.”

²⁸Anungji Dawid sülen aria aoba nungi Saul meyip, aser Filistia nunger anema ao; anungji parnoki iba linük dang ‘Jentetba Lung’ ta aja

²⁹Dawid idak nungjagi atu, aser Engedi mitsa nung ali.